بانەناوو باڵەخانەو چەما
نویستەی: #ئەسعەد ڕەشید#
شەوێ جە شەوە سەردەکا زمسانی و چەرمە پۊشی تەوېڵۍ بە وەرۋۍ، مامۊسا مەولەوی بەسواری هەری وردە وردە مەیاوۊ دلۍ دەگێ.
مەولەوی مەیاوۊ نزیکو خانەقای و وەزۊرە دلۍ باڵەخانۆ سەرو دەرەکەی کە یانۆ شېخی بەهادینیا. چاگە مېمان بۊ،
وەختێ ملۊ چۊوەر و نیشۊرە وینۊ یانەکەش دڵۊپە کەرۊ و پی حاڵۆ نمەتاوۊنە چەنەش بنیشۊرەو بلۊنە خەڵوەتۆ، جە ۋەرو ئانەیە مەکیانۊ خزمەتو شېخی بەهادینی کە بانگۊشێ بکیانۊ بانەکەش پەی بگېرۊرەو دڵۊپەکەی نازۊ، ئەوەڵ جار ویرکەرۊوە کە دڵیش کیانۊ پەی خزمەتو شېخی، بەڵام دماتەر چەنی وېش مەگنۊ قسۍ و ماچۊ: نەکەری دڵی بکیانی، چوونکوم دڵ لوایش هەن و ئامایش نیەن.
دماتەر تەکلیف مەکەرۊ نەسیمی کە بلۊ خزمەتو شېخی:
های نە دڵ لواو ئاماش پەی نییەن
مەکیانەش پەی چېش نەسیم کۊ شییەن.
نەسیمی مەکیانۊو داواش وەنە مەکەرۊن وەختێ یاوا حزورو شېخی بەهادینی ئی چن هۊنیا وزۊ خزمەش:
باڵەخانەی چەم دېوانەکەی تۊ
بانەناو وە گڵ ئاسانەکەی تۊ
تکەش عاجز کەرد خەیاڵت تېشدا
ئازیز بۊ جارێ پا بنیە پۑشدا.
مەولەوی داواو خوڵەبانی مەکەرۊن پەی بانو باڵەخانەو چەماش، خوڵەو وەردەمو یانەکەیش، ئاسانەو یانەکەیش، یانەو پیرەکەیش، پەی بانەناو کەردەیشان، پەی ئانەی هەڵسیشان مدراوە. چن بە ئەدەبێ بەرزی عاریفانۆ داواش کەردەن، نەتاوانش حزورو مورشیدەکەیشەنە تەکلیفی چامنە بکەرۊن، پەوکەی وېنایێ جوانش ئەرمانان.[1]