گڵکۊی بېنازو ئەحمەڎ پریسی (مەجزووب)
نویستەی: جەلیل عەباسیجەلیل عەباسی
ئەژنەوابێم مەجزووب تانێش دێنە ئەو شاو وەرزەکا، یانی وەهاری و هانیش دان یەکەم مەنزڵەو کەژاوەی ڕەنگاڵەییەکەیش پریسەنە ور بدۆ:
وﮪار! ئەر پریس نەکەی وە مەنزڵ
جە کۊ ڕەنگی وېت مەڕێژی وە دڵ؟
ئی تانە و تەشریە (جەزب) کەردا و لوانێ خزمەتو (مەجزووب)ە  (ڕجالولغەیب)ەکەو سەردەمو مەولانای  تاکو پەیامە ستایشئامێزەکەو مەولەویش یاونوو لا.
دەسم گرت ئەڵقەڕېزو بەرەکەیشۆ و عەرزم کەرد:
بڕیا وە باڵاش کاڵای ڕەئیسی
ڕجال الغەیبە ئەحمەد پریسی
چۆپەڕو تەنیایی و بێنازی و لانەوازینە، ڕۊحی مانیاش ئاماوە جواب:
جە لای لەیلەوە.. جە لای لەیلەوە
ئەحواڵێ ناما جە لای لەیلەوە
وەختەن جە ﮪیجران ئەو بۍ مەیلەوە
چوون (مەجنون) وێڵ بوون وە دوجەیلەوە
ئێتر یاوانێنە جە بێتاقەتی و جە تووڕەیی و جە بېزاری و جە ناهومېڎیش جە نەوەکاو ئی سەردەمیشە.
پەرسامەنە: چېش بېیەن بایێسو نەبانی ڕۊڵەکات؟ چی کەسشا لات مەکەرۊ لاوە؟ چەنی دڵشا ئامان مەنزڵگاو یادی و یادگاریت پاسە بێناز و بێکەس بازاوە؟
هەناسێوی سەردش ورکېشا و تەنیا بە ورتێوە پەڕ جە ناڵە و پەڕ جە سکاڵا و پەڕ جە دەردەدڵ، سۊزو گلەیاش وارنارە سەرمەرە:
شارەزووری دڵ سەمووم کەردەوە
گرەو جە گڕەی دۆزەخ بەردەوە
سوپای بۍ مەیلی ئازیز سان بەستەن
فەتحی قەڵایچەی ئەرواشا قەستەن
هیچم نەبۍ جوابشەنە، بېژگە گلەیی هەناسەکەو گۊرانی. بە شەرمێوە چپنام گۊششەرە و بە دڵێ مەڕیا و دەروونێ کەیلو خەم و حەسرەتی و، بە بۍ ماڵاواییچ، جیام ئاست:
بەڵۍ دیارە لەناو قەومی بەسیتا قەدری سنعەتکار
وەکو عەکسی قەمەر وایە لەناو حەوزێکی لیخندا.[1]