کورد دلې چەرخەکا تاریخینە
بەشەی: دوەسەڎ و حەفتا و یەرەمە
هۊرگېڵنای و ئاماڎەکەرڎەی: #ئەسعەد ڕەشید#
ساڵەو (1919ز.): چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە، ڕەشید ئەفەڼی ئاسیە خان جە چەمچەماڵ شەهید کریان، نامبریا ئەفسەرو دلې سوپاکې شېخ مەحمووڎی بیەن.
* پایېزو ئی ساڵېنە، سمکۆ ناوچەکانو سەرنیشتو ڕۊخانەو ورمێش وستې چېرو دەسەڵاتو وېش.
* هامنو ئی ساڵېنە، سمکۆ ڕاگاو میانو ورمێ و تەورېزی مەوزۊ چېرو کۊنترۆڵو وېش.
* ئەچی ساڵېنە، عەلیکی سەرخېڵو هەڤێرکانی دلې قۊمیێوە لېڵ و نادیارېنە کوشییان.
* کۊچی دمایینو ئەمین یمنی سڵێمان ئەحمەدی شاعېر ئەچی ساڵېنە بیەن.
* ئەچی ساڵېنە، حەمە عەلی مەدهۆشی شاعېر بەدنیائامان.
* ئەچی ساڵېنە، عەبدولمەجید ڕەشید بەرواری بەدنیائامان.
* ئەچی ساڵېنە، سمکۆ وېش ئاماڎەکەرد پەی ئانەی سەربەوېیی کورڎەسانی مسۆگەر بکەرۊن، پا نیازیچۆ پېوەڼییش کەرد بە سەرخېڵە کوردەکاوە، سەی تەهای ژەنبراش کیاست پەی بەغڎای تاکو پېوەڼی چەنی ئینگلیزەکا پتەو بکەرۊن.
* ئەچی ساڵېنە، کتېبیانەو بابانەکا دلې مزگی گۆرەو شارو سلېمانینە بە دەسو ئینگلیزەکا سۊچیان، کە شش هەزار کتېبېش چەنەبیېنې، دماتەر تەنیا چوارسەڎ کتېبېشا مەنېنێ و بریێنې پەی کتېبیانەو ئەوقافو سلېمانی.
* جافەکې ناوچەو هەڵەبجەی بە فیتو ئینگلیزی، کۆتې دژبەری چەنی شېخ مەحمووڎی.
* ئەچی ساڵېنە، ناکۊکی میانو داگیرکەری ئێرانی و کورڎی زیاڎبی، ئانەیچە بە هۊکارو پیلانەو کوشتەی سمکۆی و کیاستەی فەرماندارێ تازەی بې پەی ورمێ.
* پەی یەکەمین جاری ئەچی ساڵېنە، ئینگلیزەکې سەیارەشان ئاردەنە شارو سلېمانی.
* ئەچی ساڵېنە، ئینگلیزەکې (ئیسماعیل سەعید بەگ)شا کەرد بە فەرمانڕەواو ڕەواندوزی.[1]