لاچەمێوی گولانە سەرو ڕۊمانو دێڕ بە دێڕ حەسەرەت
بەشەی دوەمە
دەس پەنە کەرڎەو داستانی بە ئەژناسیای جوغرافیاو یاگەکې فرە بە کوڵی و زەریفی پەنەما نیشانە مڎریۆ. ئینە یۊ جە خاڵە عالەکاو هەر ڕۊمانێویەنە.
موعەرەفی کەرڎەی و ئەژناسنای کەسایەتیەکا، کە یوە یوەی مەیانە دلې داستانەکەی بە حەدېو بە ژیری و هونەرمەندانە باس کریان، کە وانەری بەرۆ خیاڵەرە و وزۆشەنە دلې شکێ: تۊ واچی ئی کەسمە من یاگېوۆ نەدیە بۊ؟!
تاتەم مامۊ سەعە، پېیێوی باڵا بەرز و هەژار و سەوزەڵە بې. دایېمە کەواپانتۊڵېوی سیاو و بیبنېوی مەخمەڵی سیاوش بەسەبێ و زم و هامن کېش و تاقیلە سەرەشۆ بې و فەرەنجیێو قۊڵشەنە. دڎانېش مەسنۆعیێ بېنې و کاتېوو خوێ ددانێوی تەڵایین دەمشەنە درۆشیېوە. هەمیشە ڕیش و سمێڵش ئاما بې و چن موێ چەرمێچ کەوتێبېنېنە ڕیشیش. هەمیشە جگەرێو تەماکۆی لچشۆ بې و مارەزای پایېوش شەل بې و ئانە بې پەنج دەگاکەنە بە سەعە شەل ژناسیێ. ل23-د-16
دلې هەر ڕۊمانێوی عالیەنە نیشاندای و ئەژناسنای کەسایەتی دەروونی و ڕواڵەتی زاهېری کاراکترە ئەسڵیەکا نیشانێ سەرکۆتەی ڕۊمانەکەیەنە.
ئەرەمەرزنای و تاشای داستانی جە دەسپەنەکەرڎەیەنە فرە خاس ملۆ وەرۆ. لکێ وەشێ مدریا و وانەری وزا شۊنۊ وېشا تاکو بزانۆ چکۆ کریاوە.
کوچە کوچەی کە چەنی داستانی ملمێ وەرۆ، سارا بۊ بە بەشېو جە خیاڵیما و ویر و هۊشما گېرۆرە. پەرسې جۊراوجۊرێما پەی وەشێ با؟!
سارا کێنە؟ سارا چ تەوفیرېوش چەنی کناچەکاتەری هەنە؟ ئینە لکەی ئەسڵی داستانەکەیەنە.
سارا کناچېوە وت و وریا و ژیرەنە، هەر ئا ژیری و ئاوەزشەنە جیاش کەرۊوە جە کناچەکاتەری.
دلې ئی داستانییەنە متاومې ژیوای سارای کەرمې چوار بەشێ. بەشی یۊوەم: دەورانوو زارۆڵەیی وانگەیش. چی دەورانەنە گرڎ چېو پڕێوەنە قۆمیۆ. سارا ڕوێو وانگەنە مەیوە یانە و بې خیاڵ جە گرڎ چېوی، گوشش جە قسێوەو ئەدایشۆ بۊ، کە؛ وڕە و سەرسامەش کەرۊ. باسو هیجبی کەرڎەی کەسېویش پەی کەرا کە نە دېیەنش و نە مژناسۆش. چا کاتەنە ئادە بېژگەم بە قەڵەم و دەفتەری و ڕەفێقە هامکەڵاسیەکاش بە هیچیتەری ویرێ نمەکەرۊوە.
هەر ئەچا سەرەتاوە سارا ڕۊح و ڕەوانش جەرێحەدارە بۊ و گنوونە دلې گێجاوېوې کە بەشېوو فرەو ژیوایش تاکو ئاخر وېران کەرۊ پێوەرە.
بەشی دوەموو داستانی، دەورانێوا کە سارا شووش کەرڎەن و زارۆڵێش هەنې، جە سەراسەرو ئی دەورانییەنە یەک جاریچ بەر نمەگنۊ کە سارا تۊزقاڵێو دڵش وەش بۊ پا وەزعێ جە ئیناش چەنە. هەمیشە چەنی وېش جەنگشا و تاوانوو ئانەیە کە ئامان سەرەشەرە منیۊش ملو بەڎئێقباڵێ و چارە سیاوی وېش. ئی بەشو داستانیە ئاڼە خەمبار و تەرسناکا کە هەڵسی وزۆنە دلې چەما وەردەنگی. هەرچی کەرۊ بە جۊرېو بتاوۊ چەنی ئا نەدامەتیا جۊرە بۊ و عادەت کەرۊ، وەلێم نمەتاۋۊ. ئا قینێ هەر جە یۊوەم ڕۊنە و یۊوەم شەوەو زەماوڼێشانە چەنی شوەکەیش ملۆنە دڵش، تاکو ئاخروو داستانی کېشۆش چەنی وېش. هەر جارێو شوەکەش نزیکەش گنۊوە بە دەسدرێژی و پەلامارەش منیۊرە. ئی دەس درێژیە چەنی هەر جارێوی کە ئەوەخوا کریۊوە ئازارەش جە جاری وەڵینییەنە زېیاتەرەنە.
ڕەزا بەهمەنی.[1]