‍ جەژنەو کەشکەکی
جە دەگاو ڕەزاونە جەژنەو کەشکەکی ملۊ ڕاوە. پا جۊرە جە قەڎیمېیاوە‌ گېڵیانەوە ئی مەراسمە وەڵتەر بە مەلووڎی پەی ئەسحاب عەبدوللەی (زیارەتەکاو ڕەزاوێ، شەخسێ ئینا چاگە کە ماچا جە جەنگو عەرەبەکا و جەنگاوەرەکاو ئێرانینە چەنی ئەسحابېوەتەری بە نامې ئەسحاب یۆنسی شەهیدی بېیېنې و ئەسپەردە کریێنی)لوان ڕاوە. بە بۊنەو ئانەیە کە دەگاو ڕەزاوێ جە هامن و پاییزنە کەم ئاو بېیەن ئی مەراسێمەشا بەرڎەن پەی چەمەهانێوە بە نامې (هانە شێخەڵی) کە بە قۆربانی کەرڎەی گېیاندارە ماڵیەکا (گاوە، مەی، بزە و... )چا یاگېنە گۊشتەکەشا تێکەڵ کەرڎەن و دلې خەڵکینە بەنێسبەتێ وەرانوەر بەش کریان.
بەڵام دماتەر ئی بۊنە ئەپی شێوە کەمڕەنگ بی، ڕۆتوو  مەولوڎیش گېرت بە وېشەوە،  جە مانگەو مەولوڎینە بریێ ڕاوە.
جەژنەو کەشکەکیچ کە جە زمساڼە ملۊ ڕاوە، خەڵک جە دەگانە جەمێ بېیېنې.
ئەچی ساڵاو دماییەنە جەژنەو کەشکەکی بە گەرمی و پېشوازی خەڵکو دەگای و شارو و دەگایەکاو دەوروو بەری ملۊ ڕاوە. مەولوڎی مانگێ کە زووتەر بە بەخشایوەو گۊشتی لوێ ڕاوە ئێسە جە مزگینە بە بەخشایوەو شیرینی مەراسمی ئائینی گیریۆ. بەڵام مەولوڎی ئەسحابی ڤاریاوە و گېڵاوە، بە جەژنەو کەشکەکی.
جەژنەو کەشکەکی بە تەقەلاو خەڵکو ڕەزاوێ جە دەگاو شارەکاو دەورووبەری ملۊ ڕاوە. خەڵک بە یاردیدای ماڵی بڕە پووڵ جەم کەراوە، پەی سانای گېیاندارە سەرەبریاکێ و گەنمێ و ئا کەرەسا کە بە هەرمانە بریا. چەن ڕوێ وەڵتەر بە شۆرتەیوەو گەنما و وشک بېیەیوە پەی کوای گەنمەکا ئامادە کاری کریۆ. ۋەرو ئانەیە گەنمێ کوا کە پۆسەکەشا جیا بۊوە تاکو جە دلې کەشکەکەینە ڕینگە بڎۊوە وخاستەر هەزمە بۊ. قۆربانیەکە کریا و گۊشتەکە ئامەدە بی چەنی گەنمەکا ملۊ دلې چەنەها قازانێ گەورێ کە زووتەر ئامادێشا کەرڎېنێ. وېرەگا کات ئاویرش پەی کریۊوە، منیاشا سەرو ئاویری کە بە هېزمێ کریانۆ. هەر کەس گەرەکش بۊ ملۊ پەی مەنایوەو ئاویرەکەی و شێونای کەشکەکەی دەوروو قازانەکانێ جەمێ باوەو یاردی مڎا. شێونای قازانەکا تاکو ساعەتەو یەرێ ساعبێ درېژەش هەن و چاودمای قازانەکا پۆژنارە و وزاشا خەفە تاکو یەرێ چوار ساعەتی تاکو ئامادە بۊ.
کە ئاماڎەبی خەڵک جە فرەو یاگەکاو و دەگایاو دەورووبەری مەیا پەی بەردەی و واردەی کەشکەکی.
کاکە مەسعوود نەسیری.[1]