هۆرامان وەڵاتوو وێ ئەرمانای و تەبێعەتی و زەریفیەکاو خوڎای گۆرەیەن.
خوڎای گۆرە زەریفارێ و زەریفش وەش گەرەکا.
جە هەر یاگې ئی وەڵاتە پەڕ خەڵاتەی زەریفیێ خوڎای گۆرەی بە نۆعێوە مڎا چەمەوە، هەر کەس بە چەماو سەرەی ئی زەریفیا وینۆ بارکەاللەو خوڎاای گۆرەی ماچۊ.
جە دلې زەریفیەکاو هۆرامانینە هۆراو گەناوێ نەقشێ تەرنە جە وێنەکاو ئی تەبێعەتی.
هۆراو گەناوێ خەم ڕەوێنوو دڵانوو یانەو ئارامشوو ڕۊحو و ڕەوانی.
ئەر هۆرامان بەهەشتێ بۊ سەرچەمەکېش گەناوەنێ و فردەوسارێ.
جە شەرارەو گەرماو هامنی ئەوەڵ یاگې کە چەم وزۆ گەلاوێژی گەناوەنە.
بېئەو نییا کە جە شێعرو فلکلورو سیاوچەمانەواچانە واچیان؛
ماچا گەلاوێژ زیان گەناوە.
هاژەو وەرواواو گوڵەچنوورێ و سورەهەراڵە و شەوبو و وەرکەمەرا ڕەنگوو ڕۊخساریش تەمامنێنەشاو تەماشەو عاشقی دڵ سۆتەیو ساحیب زەوقیش مڎا.
ئی تاریفە ناتەمامێ عانێ بېنې کە هەڵایی دەسو بېوەفاو بەشەری نەیاوابێ لاو گەناوێ.
ئینە بەینێن کە جیاو لارو لەنجەو گوراڵاو بوەو وەشەو دامانو ئی تەبێعەتوو هۆرامانی و گانەوێ بېیەن یاگېو بوەو سەوروو وەڵاخاو وەڵاخدارا دەسو تەقدیری خەتمگاو مەولانا خالێدی گەناوەش دێنە دەسو تڕکەڵەکو کۊڵبەراوە کە هەرچی جە تاڵیو ژیانیشاو زۆخاوێو ئی لاو ئۆ لایشانێ چا هۊرشا ڕېتێنێ
گونیە زەردێ.
یاگېو خاڵ خاڵو وەروېشا گېرتەنو پېسە تۊمۆرێوە سەرەتانی زیان تەوێڵو هۆرامانیوەو دووریچۊ مڎا چەمۆ ئجۆ نەوەشینێن سوجێش گېرتێنە...سەوزی گوڵوو گیواوی یاگېش دێنەش بە وېرانی ئجیو شیمیا ۋاران؛ واران کریان پاسە کەشو کۊ کەمەرشا کەرڎەن تۊزە بېیەن کۆزە ماچی چڼە هەزار ساڵېن چېگە جەنگا.
یاگېو زیکرو تەیلەو سەحەر خېزاو سەرو حەوزو ئی هەواری بېیەن یاگېو دژماناو تەڵاق وستەیو ئی کۊڵبەرا تۊزو پەیاو ئی وەڵاخا ئی کۊڵبەرا گڵوو هەرچی تەڕینەو لووی و کەمایشا خنیکنان.
ئېگە ئێتر حکومەتو شایی نییا حکومەتو بۊوە وەشاو پاری نیا.
حکومەتو زۆڵم و جەورین بە جوانا بە جگەرێ بە پوشاکێ بە تاوانی.
خوڎایا ئی بەڵایی چېشە بې ئاما ملمارە ئی بەهەشتو هۆرامانی بی جەحەڼەم
ئی بەقایاو زۆڵم و جەوری بنویسدێنە لاپەڕێوە جە کتېبو زۆڵمو جەورو تارێخوو هۆرامانی تاکو مەنۆوە جە چوارچېوەو هەرمانې درۆزنیو شۆغڵێ کازبوو بڕێ جە غەریباو نەژناسیایا.
کەوەڵاتێوە عېرفانی بېیەن بە سەتڵ ئەشغاڵێوە بۊگەن.
کە چارەش جە دەسەڵاتو هیچ دەسەڵات داریەنە نەمەنەن.
غەریبی واتەنی.
مەینەت خەڵاتێ وېران وەڵاتێ
چېش واچۊ دەسێ بې دەسەڵاتێ
بە ئۆمێڎو ئانەی جارێ تەر بوەو وەشەو ئی کەش و کۊساریە فێنکی، واو سۆبحوو شەماڵی، ڕۊح وزۆنە هەناسەو ژیوایما.
مەڵڵا بورهان.
[1]