نامۍ: میرزا ئاغا
نازنام: پاوەی
ساڵۊ پېڎابییەی: 1563ز.
ساڵۊ مەرڎەی: 1655ز.
یاگۊ پېڎابییەی: #پاوە#
یاگۊ مەرڎەی: #پاوە#

$ژیۋاینامە$
میرزا ئاغای پاوەی، ساڵەو (1563ز.) جە شارو پاوەی دڵگیر و مەڵبەڼو شاعېرا ئامان سەرو دنیێ. (میرزا) یۊن جە شاعېرە خامە ڕەنگینەکانو سەردەمو وېش و نامېش دلۍ چڼین یاگانە ئامێنە و ئەچا شاعېرە دەگمەنانەن کە هیچش جە شاعېرانو وەڵۍ وېش کەمتەر نییەن، گەر زېیاتەر نەبۊن. شېعرەکانو میرزای پەڕېنۍ جە مانێ جوان و ڕۊشن و ڕەوانۍ، واچەکېش پېسەنۍ چراوێ پەڕتەوۍ پەی تارنیای شەوەزەنگەو تاریکی و زیای وەرەتاوو دەمەو ساعبی پرشنگداری، میرزا، یۊ بېیەن چا شاعېرا کە شارەزایی تەمامش بېیەن جە ئەدەبېیاتی ئێرانی بە گرڎینی و ئەدەبیاتی گۊران و هۆرامی و هۆرامانی بە دیاریکریایی، بەداخۆ، ئی شاعېرەیچمان پېسە پەنەۋازی زانیاری تەماممان سەرو چەنیبییەی ژیوایش و کۊ بەرهەمەکانیش وەردەس نییەن، بەرهەمەکېش پژگیێ و وەڵێنۍ. بڕێشان فۊتیێنۍ و ئانېچشان کە مەنېنۍ پېسە کۊبەرهەمیش وەردەسۍ نییەنۍ و جەمۍ نەکریێنێ. میرزا، دماجار ساڵەو (1655ز.) کۊچی دمایینش کەرڎەن و دلۍ زاڎگاو وېشەنە شارو ( پاوە) دڵگیرۍ بە خاکیشان ئەسپاران.
چن نموونێ جە شېعرەکانو میرزا ئاغای پاوەی:
شیرین بەزم شەڕ:
شیرین بەزم شەڕ، شیرین بەزم شەڕ
خېزا و خرۊشا، شیرین بەزم شەڕ
دانە شەست سەخت خەدەنگ شەست پەڕ
کېشا تا مووسا، پەیکان پەنجە زەڕ
عەزم شۆڕش کەرد بایرام ژدام ڕەد
بۍ پەروا پەردەی، دڵ کاوا بې حەد
پەیوەست پەیکانان هوون ڕېز ژاری
خېزا نە جەرگم، جەو پەی بې کاری
دارا نە قوماش ڕەنگ ستا ..........
ئوستاد دفتر دەرد ....................

دلۍ دما بەیتەکا کۊتاو ئی شېعرېنە ناتەمامی هەن، کە بە خاڵبەندی نیشانە کریان.
چراغ زەبوونم:
چراغ زەبوونم، چراغ زەبوونم
نە هېجران تۊ زار و زەبوونم
بەرگ تەن قەتران جامەی مەجنوونم
ڕژیای ئەسر هوون، ئالوودەی هوونم
جە ئاهم ئایېر گەرم بە تاو خېزا
ڕېزەی ئوسخوانم، ڕېزە بی و ڕېزا
دال بی قامەتم نە داخ دووریت
نە داخ خاڵان، ساف مەهجووریت
بەشق شای شاهان بە تۊ بەخشا نوور
تاجی قەترانی، سیای سۊرمەی توور.
ئەسعەد ڕەشید.[1]