ئاڵاو کوردەسانی
تەمامو گەلانو سەرو ئی زەمینیە، ئانېشان هەکە دۆۆڵەتشان هەن، یام ئانېشا بە شېوەو فیدڕاڵی مەژیوان، خاوەنو ئاڵاو وېشانۍ، ئاڵاو کوردەسانی ئاڵای کوردستانی فیدراڵ دلۍ تەمامو ئا ناوچانە کە ئینێ چېرو دەسەڵاتو حکوومەتو ھەرېمو کوردەسانینە، دلۍ دام و دەزگا حکومییەکانە و ڕێکۋزیا ڕەسمییەکانە شۊکیۊوە.
ئاڵاو کوردەسانی پېکیێنۆ جە یەرۍ ڕەنگا، درووشمێ، یام نیشانێ ئینا میانشەنە. کە شېوە لاکېشەیێ پۊیین (ئاسۊیی)، لاکېشەی سەرین ڕەنگەش سوورەنە، ئانەی میانی ڕەنگەش چەرمېنە و لاکېشەی وارین ڕەنگەش سۆزەنە. پانتایی ئاڵاکۍ دۋۍ سەرو یەرۍ درازیەکەیشەن (درېژیەکەیش). درووشمی نەتەوەیی ئاڵاو کوردەسانی ڕۊجیارێ زەڕینەن، کە (21) ویس و یەک تیشکۍ یەکسانۍ و هامشېوېش هەنۍ. ڕۊجیارەکە مەشۊم ڕېک بگنۊ چەق (دلېڕاسە) ئاڵاکۍ.
سەرەتاو وەشکەرڎەو ئاڵاو کوردەسانی مەگېڵۊوە پەی سەرەتاکانو سەدەی ویسەمی. کاتێ کۊمەڵ و ڕېکۋزیا کورڎییەکۍ جە ئەستەنبوڵ خەریکۍ ئەرەمەرزنای کۊمەڵ و بەرشنییەی گۊڤار و ڕۊژنامە کورڎییەکا بېنۍ، عەینو وەختیچەنە ویرشان لاو دروسکەرڎەی ئاڵێوە نەتەوەیییە بۍ پەی کوردەسانی. ساڵەو (1919ز.) (کۆمەڵەیا ڕێکخستنا جڤاکی کوردستان) جە ئەستەنبوڵ بە ئاماڎەیی چڼیین ڕۊشنۋیر و ڕامیاریمەدار و کەسۍ ئەشناسیێ ئا سەردەمەو کورڎی مەرزیارە، چەنی ئەرەمەرزنای وېش ئاڵاو نەتەوەیی کوردەسانیچشا درووسەکەرڎەو داواو سەربەۋېیی کوردەسانی کەرۍ. ئا کەسۍ بەشداریشان جە ئەرەمەرزنای ڕېکۋزیاکەی و ئاڵاو نەتەوەیی کوردەسان کەرد ئینۍ بېنۍ: ئەمین عالی بەدرخان (جزیرە بۊتان)، دکتۆر عەبدوڵڵا جەودەت (عەرەبگیر)، ئەکرەم جەمیل پاشا (ئامەد)، مەولانا زادە ڕەفعەت بەگ (سلېمانی)، نەجمەدین حوسێن (کەرکووک)، کەمال فەوزی (بێدلیس)، شوکری بابان (سلېمانی)، مەمدوح سەلیم (وان)، حیکمەت بابان (سلېمانی)، فوئاد بابان (سلېمانی)، دکتۆر شوکری محەمەد و فەرید بەگ.
ئەسعەد ڕەشید.[1]