نامۍ: عەلی
نازنام: گوڵپی
نامۊ تاتەی: محەمەڎ
نامۊ ئەڎێ: لەیلۍ
ساڵۊ پېڎابییەی: 1941ز.
یاگۊ پېڎابییەی: #گوڵپ_هۆرامان#
ژیۋاینامە
کاک عەلی گوڵپی، کوڕو محەمەڎو کاکەخانیا و ساڵەو (1941ز.) جە دەگا وەش و وەرچەم فەرێحەکې گوڵپینە ئامان دنیا و هەر بە زاڕۊڵەی هۆگرو گۊرانیێ و دەنگی ڕەسەنی بېیەن و شانزە ساڵینە بە پتەوی دەسش کەرد٘ەن گۊرانی واتەی، حەڤڎە ساڵینە وېش تاق و تەنیا تاوانش زەماوڼە گېڵنۆ. ئیجا کاک عەلی ورڎە ورڎە نامېش گنۊ سەرو زوانا و فرەو یاگاوە پێسه گۊرانی واچی خوڵکەش مەکەرا پەی شاڎی و زەماوڼ گېڵنای.
دەنگ وەشی دلې یانەو عەلینە جەڎەی بېیەن و هەر جە مامۊ مسەفایش گېرەش پەنە تاکو یاوۆ دێدە لەیلې و دێدە ئایشێ واڵێش، گرڎ دەنگ وەشێ بییێنێ و ڕەنگا سەرتەڵەکەشا کاک عەلی بۊ.
کاک عەلی ساڵەو (1960ز.)، ملۊ سەروازی و ساڵێ شۊنۊ ئانەیرە، شۆڕشو ئەیلوولی سەر هۆرمڎۆ و ئێتر دەسو سەروازی مازۆ و بە ڕانموونی شێخ حەمەڎەمینی پێوەز بۊ بە هېزو پېشمەرگەی و شۆڕشیوە و چەنی کاک عەلی شێعەی و شێخ جەلالی ملا دلی پەلو شەهیڎی هەمیشە سەربەرزو هۆرامانی یانی کاک حەمە گوڵپی و هامسات کە دەسێش ئینا بنەو گۊشیشەنە پەی چریکەی ڕەسنی و ئەوش ئینا تاوەو چەپڵانە پەی شاڎی گېڵنای، چەکو پېشمەرگایەتیچ کەرۊ شانەش و دلې شۆڕشینە هەم ئەرکی حێزبی وېش بە یاگې مارۆ، هەم ئەرکی هونەریش. پەی نموونەی ساڵەو (1970ز.)، کە بەیانو یاڼزەو ئاداری بەرکریۆ و دۆڵەت و هېزو پېشمەرگەی ڕېکێ مەگنا، ئەپی بۊنۆ خورماڵەنە بە بەشداری خەڵکو هۆرامانی و هەڵەبجەی و شارەزووری ئاهەنگێوە فرە گۆرەی چڼ هەزار کەسی ساز بۊ و کاک عەلی و مامۊسا ئۆسمان چڼ شەو و ڕوێ شاڎی گېڵنېش با.
شۊنۊ ئانەیرە مامۊسا ئۆسمان بار کەرۊ و ملۊرە گەچینە، چوون گوڵپ و گەچینە نزیکێ یۊترینی با، کاک عەلی چەنی مامۊسا ئۆسمانی تێکەڵیش فرە بۊ و دایېم شان بە شانش گۊرانیێ ماچۊ و پێوەرە دەها و سەد٘ها شریتێ گېرا.
گوڵپ، وەڵێ خاپوور و وېران بییەی دەگایەکاو هۆرامانی بە دەسو ڕژیمو بەعسی، گۆرەتەرین دەگاو هۆرامانو ئۆ دیمی بییێنە و شاڎی و زەماوڼێ فرێش چەنە کریەنێ و دایېم و دەرهەم مامۊسا ئۆسمان خوڵکە کریان پەی ئاگەی و چەنی کاک عەلی پێوەرە شاڎی گېڵنێ بییێنێ و شەوق و زەوق و فەرێحەشا وستێنە دلې دڵا و ناستەنشا کۊنە هەوارێ عەشقی بې نازێ گنا.
تا ئا یاگې بزانوو کاک عەلی وېش بەزمێش نییا کە وېش ئاوردەبۊنە و هیچ یاگێوە نەژنېیەنم واچا ئی بەزمە هینوو ئاڎیا، بەڵام بە فەرمایشو وېش دایېم جە دوې بەزما فرە فرە وەشش ئامان و وێچش فرە فرە وەشش واتێنێ؛ یۊشا مەلە سەرشین بېیەن و ئەویچشا ئانا بارش کەرد لواوە داڵانی بېیەن.
کاک عەلی پېسە ماباقی خەڵکو هۆرامانی جە شەڕو دۆڵەتو بەعسی ئەمانەنە نەبییەن و ساڵەو (1978ز.) شۊنۊ خاپوور کەرڎەی کۆگاو ئاواتەکاشەرە (گوڵپ) چەنی خەڵکو دەگاکېش و بە خا و خېزان ئاوارەو ئوردووگا زۊرەملیەکەو ڕژیموو بەعەسی جە خورماڵەنە بۊ!
چادمای و شۊنۊ وېران بییەی هەڵەبجەیرە، ئاوارەو ئێرانی بۊ و ئوردووگاو دەربەنوو دزلیێ بۊ ماواو ساڵەکاو ئاوارەییش، بەڵام پاحەزە چەودیمەنە نەختێ هێمنی گنۊرە و جەنگ و جڵەبە تەمامیۆ کۆچ کەرۊوە و ملۊوە پەودیمەرە.
وەرە وەرە دۆران مەویەرۆ و ساڵەکاو نەوەڎینە جەنگو براکوشی دەس پەنە کەرۊ و کاک عەلی چەنی کاک سەباحی بە ڕەحمەتی با هام خەباتۍ و چڼ ساڵې ملارە شارو هۆلێری و پێوەرە گۊرانیێ فرێ ماچا و شریتێ فرێ پەڕێ کەراوە. کاتێ جەنگی یانە وېرانکەرو براکوشی تەمامیۆ دیسان گېڵۆوە پەی خورماڵی و ئیسەیچ پېسە پېشمەرگێوە یانەنشینی ئەچی شارەنە مەژیوۆن.
بە فەرمایشو وېش ساڵەو (1970ز.)، خوڵکە کریان پەی تەلەفزیۆنو بەغڎای و چاگە چەنی کاک ئۆسمانی گۊرانیێش واتێنێ. دماو ئازاڎبییەی کوردەسانی جە چېرچەپۆکی ڕژیمو بەعسی تەلەفزیۆنو کوردەسانی و زاگرۆسینە چەنی کاک سەباحی گۊرانیێش واتێنێ. هەرپاسە وەڵتەر هەر جە هولێر و کەرکووک و سلېمانی و هەڵەبجە و گەرمیان گېرەش پەنە تاکو یاوۆ سنە و مەریوان خوڵکە کریان پەی شاڎی و زەماوڼی و گۊرانیێش واتێنێ، بەڵام ئینە چڼ ساڵېن گڵۋیش خرابییەنە و نەتاوانش گۊرانیێ واچۊ. ئی زانیارییە عالۍ سەرو ژیوای گۊرانیواچ عەلی گوڵپی، کاک سوبحان ئەمینی هانەگەرمڵەی پېسە دڼە دڼەو گۆهەرا وستېنۍ سەرو حەریرو پەڕەی.
ئەسعەد ڕەشید.[1]