عوزر جه گونای بەتەر
پەی کاڵفامە هیچنەزانەکەو بەشو کەش و هەواو تەلەفزیۆنوو (ئاڤا)ی
پەی ڕاو سەرجەم خەڵکی ویرپاک و ڕاسوینی
1. مەسەلێوه هۆرامییە هەنه پی مانا؛ ئەر دەنگ کەری، دەنگاوەنه و ئەر بېدەنگ بی، پەنگاوەنه. به ڕاستی چی کاتانه که دەماروو ژیوای چنی سیاوەتی دووکەڵی به تەنگی هەناسەی، پرخەش مەی و پەڕچینو شەرارەتی به سامېو کەسکۊنتەر جه گرڎ شەڤېوې کۊششوو تەنگەلانی مڎۊ و باوەری نەتەوەیی و ویری نیشتمانی جه گرڎ کاتېووی زەروورتەر مرمانۆ، باسو کابرایوی نەزانی دەمبەلاشی هەکه به نەزانکاری حورمەتێ_ماڕۆ و شیرازێ_ڤڵکنۆوه، تێخێوی سوویا بەڵام جەرگبڕا. سوویا پەی کەسېوی ساحیب ئەقڵی فەلسەفی و شعووری ئاوەزدار و جەرگبڕ پەی هەستێوی نیشتمانی.
2. بەداخەوه کۊمەڵگاو کوردستانی به عام، بڕېو دیاردێ قیزەونېش به تاییبەتت جه کاناڵێ ئەنەیاونای و سۆشییاڵ میدیانه چنه کەوتێنێوه هەکه پنەوازا به ورڎی سەرەنجشا دریۆ و چارەسەرشا پەی بیۆزیۆوه. ڕاحەڵێو پەی ۋەرگیری_ترازیایی_نەتەوەیی و ئامیانوو پێوەرەژیوای. تاکو کەسېو پېسەو پېشکەشکاروو بەشېو جه بەرنامۊی میدیایی هەکه کوردستانی_بییەیش_نەفامان و ڕۆتوو تارێخوو وېش نەوانانەوه، به نەزان قسێ نەکەرۊ و ڤەڵکەوتەی کوت و شەرواڵ نەزانۆ. تاکو بزانۆ که خەڵکو شاری، هەر ئانێ بېنې، تەنگانەنه پەنا بەرێنێ کەره و دۊ وشکەو هەوارەکاو هۆرامانی. تاکو بزانۆ شانازی زوانی و ئەدەبېیاتیش، ئیسەیچ ئینا هۆرامانەنه. تاکو بزانۆ ئەنەیاوای جه کورد و فەرهەنگی کورڎی، ئەوەوانای، سەرەنجدای و جه گرڎی گرینگتەر ڕېخەداری و هەزینەش گەرەکا. بەداخەوه نموونەو ئی کەسا، پېسەو هەزارانېوتەریا که ماوەو سەدان ساڵیەنه، ناهاگا و نەزان، مڎاش ونه و جەستەش زامدار و وردش کەرا.
3. ماوەو ویس ساڵی وېیەرده و به تاییبەتت چی یەک دەهه دماینەنه و بەداخەوه دیسان به تاییبەتت میدیاو_هەرېموو_پانیشتیەنه، بڕېو جارێ به نەزان و بڕېو جارێ گاڵتەجاڕی سووک، به کۊنتەرین بەشو شانازی فەرهەنگی کورڎی یانېو هۆرامان_و_زوانی_هۆرامی، شۊخی!! کریان و دیسان بەداخەوه تاکو ئیسه کەسېوی ڤەرپرس چا دەم و دەزگانه (که تەنانەت بڕېو کاتېو، سەرکەرڎېوی ڕامیارچ!! بېیەن)، لچش نەترەکنان و ژیرانه و ئازایانه و به قازانێوی نەتەوەیی دەمش نەکەرڎەنۆه. بەڵام ئەر کەسېو سەرو هەق و مافی تاییبەتت و بې ئی لا و ئۆ لاو وېشەوه، قسېوەش کەرڎێ بۊ، سەدان لاوه دریان ڤەروو تیر و تەشەری و بۊختانیش پەی کریاینه. داخەم مەشۆ.
4. لایوتەروو بابەتەکەی، بڕېو گەشاوەزێ قاقەزیێنێ. گۊشه و کتېبخانەکا و چەپ و ڕاسوو کافەکانه وېشا شارانشاوه. جگەرێ پینې دووکەڵ کەرا و ویرێ سوویای دلېو کتېبا بەرمارا و ڕواڵەتێوی تازه بەڵام قیزەونی جەباو کەوتەشا کەرانه و به نامۊ مودێرنیتەی و دێمۆکڕاسی مداشا گژێ خەڵکیەوره. قسێ هێگلی و پووپری کاوېش کەرا و ویروو ئێستالین و هیتلێری مژگشانه گەرڎەخل کەرۊ. کۆڕ و کۊمەڵەنه، پا وزاوه سەرو پای و به ژێستێ ڕۊشنویریێ، هونەر پەی هونەر و تێزوو دووری جه ڕامیاریی پەره مڎانێ. بڕېوتەریچشا گرڎو گیر و گرفت و ئاواتوو ژیوایشا ئانەنه هەکه سەرو بنجەو یۊتەریەوه سەوزێ با. ئەڼا چەنی کریۆ، ڤەروو ئی گرفتیوه بېدەنگ بی و ڕا و پەیلوایو وېت به پاو زوان و فەرهەنگیت، نەدرکنی.
5. ڤەروو ئانەین که ماچۊ: کابرای کەش و هەوانەژناسی دەمبەرەڵڵای بېدار و ڕېخه، دڵنیات کەروو که ئەر هەر کوردېو، ڕەگېو_جه_کوردستانی بییەی ونیشەنه بۊ، مشیۊم سەرو واته بېنرخەکاو شمەره بلۊ و پېسەو تاوانێوی دەرهەق به گرڎینەو نیشتمانیش بزانۆ و ڤەرپرسانه لایەن گېرۆ و مواخېزەت کەرۊ. چوونکەتی هەرپاسه سەرەوه واتما، ئانه ئێتر گاڵتەن به کۊنتەرین بەشو شانازی کورڎی و ئەرەڕنیەی نەتەوەی جه ویەرڎەی و شانازیەکاش. ئێتر بېدەنگیشا، تاوانێوی نەبەخشییا و وێ لادایا جه ڤەرپرسی کۊمەڵایەتی فەرهەنگی و تەنانەت ڕامیارچ. نویستەی پەی کۊمەڵگای بۊ و هەر دژکردەوێو و هەر تاوانێو به پاو کۊمەڵگای، مشیۊم لایەنگیری نویسەریش چنه گنۊوه و ئینه ڤەرپرسی تارێخی نویسەری مرمانۆ.
6. پەی دماواتەیم ماچوو؛ واتەی و درکنای ئی جۊره قسا، زێڵەشێوەن و هیچ پەڵپێوه جه هیچ لایەن و هیچ کەسېوی شییاو نییا و ئەرکوو تاک به تاکوو هۆرامییەکا به تاییبەتت و سەرجەم کوردستانیان تاکو ڤەراڤەروو ئی بېڕېزیەوه به شێوەی مەدەنی و ئەدەبېیاتێوی سەردەم و لۆژیکێوی ئارۊیانەوه مدرا و هەناسەو ئی جۊره وردەشۆڤێنیسمه دژەهۆرامیه گېرا که به نۆعێو به یارمەتی و پاڵپەشتی یام بېهەڵوەسەی کەسانېو پېسەو هۆرازی ویرنزمی پېشکەشکاری و تۊڕوو ئاڤای کریان و کریا. پەوکەتی مشیۊم ئی واتمانه دژه نەتەوه و دژه هۆرامیه که دەمو ئی شێخه! ڕسواو زەمانەیوه ئامان بەر، ڕاگیر و به تڼی سەرکوت کریۆنه و ئێتر ڕا نەدریۆنه، هەر لاسار و دژەنەتەوێو، جه هەر یاگېوەنه، بېهەوسار قسێ کەرۊنه. چوونکەتی بېحورمەتی و نائێژایی به فەرهەنگوو وېت (هۆرامان پېسەو زێڵەو کوردستانی) و ئەوەکەرڎەی بەرەو دووبەرەکی، قازانجوو داگیرکەران و هەڕبەسەری نیشتمانی زامداری.
کورش ئەینی.[1]