شۊڵە ۋستەی سەرو ویرلۍ ( تان و پۊ ۋېڕاوەبەری کۊمەڵایەتی)
نویستەی: #ئەسعەد ڕەشید#
(وېڕاوەبەری کۊمەڵایەتی) بەرهەمو وېرو کاک (ئاکو مارانی)ن، ۋەزنانشەرە دلۍ فایلێ پی دی ئێفی سەڎ و سی لاپەڕەیی. جۊهەرو ویرلەکۍ باس جە پروژێوە کەرۊ پەی وۍ بەردەیڕاوە جە ناوچۆ هۆرامانی، بە ۋاتاو گېڵنایۆ دەسەڵاتی پەی خۊدو خەڵکی و بەشداری تەمامو خەڵکی جە گرڎو کایەکانە.
ئەوەڵجار ئارەزوما ئا کەمو کۊڕیا ۋزو ڕۊوە کە ئینێ بەرو ویرلەکېوەو ئاراسېنۍ پەی خۊدو نویسەری:
1. نویسەر جە ڕیزبەڼی سیستەمە کۊمەڵایەتییەکانە جە کۊمونۆ سەرەتاییۆ یاوان سیستەمو سەرمایەداری و دمای سەرمایەداری نیشانەو پەرسایش نیێنەرە، کە ئی گۊمانەیچە چەنی ۋیرچەپی نویسەری و حەتمیەتو تارېخی مارکسیەتی نمەگۊنجیۊ .
2. جە ڕیز بەڼییەکەنە سیستەمو کۆیلایەتی(بەردایەتی)ش. پڕنان .
3. لاپەڕە (14)نە، ناوچۆ هۆرامانیش سەرو ۋەرکۆتی و ۋەرنیشتیرە بەشکەرڎەن، کە ئەسڵ ۋەرکۆت و پانیشتا.
4. نویسەر باس جە سنۊقو خەڵکو تەۋېڵۍ کەرۊ کە وۍ بەخشانە خەڵکو تەۋېڵۍ نېیانەرە پەی کۊمەکو خەڵکە نەڎار و ئاتاجەکا، کە بېیەن بە هۊکارو سۋاڵ نەکەرڎەی و هەژارنەبییەی و سێکس ورەشی! کە واژۍ سێکس ۋرەشی نەک هەر بېگانېنە بە تەۋېڵۍ و هۆرامانی، بەڵکوم جە هیچ بارو زەرفێنە خەڵکو هۆرامانی پەناش پەی ئا هەرمانۍ نەبەردەن.
5. لاپەڕە (66) دەسەواچۍ (یەکسانی بەبۍ ئازادی بەهرەکېشین و ئازادی بەبۍ یەکسانی کۊیلەیین) هەڵېنە، ڕاسەکېش (یەکسانی بە بۍ ئازادی کۊیلەیین و ئازادی بە بۍ یەکسانی بەهرە کېشین).
لواینە دلۍ پرۊژەکەی:
نویسەر ئەوەڵجار باس جە ڕیشەو سەرهۊردای ئی ۋیرلۍ کەرۊ، مەگېڵنۊشۆ پەی ئا سەردەمیە کە چەکدارو پارتێ کوردی بییەن. نەک هەر نویسەر ۋېش ، بەڵکوم چڼەها کەسۍ بە نام شۊڕشگېڕۍ عەینو ویریشا بېیەن و کۊشششا کەرڎەن پەی نەمەنەی دەسەڵاتی و فەرمانداری، بەڵام ئېمە گرڎیما مزانمۍ کە ژڵېوە. یام حەرەکە کۊردیەکۍ بە چەپ و ناسیونالیزمۆ، ۋېشا پېسە بەدیلو دەسەڵاتو فەرمانداری مەرکەزی تەعریف کەرڎەن جە ناوچە کۊردیەکانەو ئاواتشان یاوای دەسەڵاتی بییەن. نەک کارشان پەی فەرمانداری خۊدو خەڵکی بییەبۊ، پەی وېڕاوەبەری خەڵکی، کە ئارۊ ۋېما بەرهەمو کۊششەکێشا مەوینمۍ. کۆمۆنەی سەرتایی سەرچەمەو ئېلهام ۋەرگېرتەو نویسەریا پەی ۋیرلەکېش، کە پاسە مەوزۊش ڕۊوە کۊمۊنەی سەرەتایی بەرهەمو ئەقڵ و ۋیرو کۊشش کەرڎەو خەڵکی بېیەن، من ماچوو هەقیقەت ئانەن کە کۊمۊنەی ئەوەڵین کەتوارێ (واقیعێ) زاڵ بېیەن و هیچ دەسکارێ مرۊڤیش نەبییەن چەنە، یانی قۊناغێ بېیەن کە هەڵای مرۊڤ دەسش نەیاوان بە زەمینی و کشتیاری و بەرهەمو مەزرای، هەڵای مرۊڤەکۍ قۊناغۆ ڕاوەشکاری و ژیوایێ سادەینە بیېنۍ.
هەنگامەی ۋەڵۍ پراکتیزە کەرڎەی ئی ۋیرلەیە، دەس بەردەیا پەی ژڵېوێوە ڕۊشنویری و ئاگایی و وۍ هۊشییاری، تاکو هەم کۊمەڵگۆ هۆرامانی، کە ئینە بە ۋینگاو من هەنگامێ دروسەنە، بەڵام کەتوارو کۊمەڵگۆ هۆرامانی و ۋانایۆ ئېمە پەیش ۋزۊما ۋەردەمو ئاستەنگێ فرە قورسی، بە درېژایی ۋیەردەی تاک هەم کۊمەڵگۆ هۆرامانی چېرو کەتوارێ نەوازینە ژیوایشا کەرڎەن کە کەتوارو جەنگی و یانەوېرانی و بارکەرڎەی و دماتەر زاڵ بییەی هەژموون و پارتایەتی و حزبایەتی و وەراوەریۍ پارتایەتی کە هەم دەروون و تاکی، هەم بنەماو پېوەرە ژیوایش ۋیرانە کەردېنە، فرە گرانەن هەرمانکەرڎەی دلۍ ئی کەتوارێنە. نویسەر (ئازادی و یەکسانی و داڎوەری) بە بنەماو وېڕاوەبەری کۊمەڵایەتی مزانۊ، بەڵام بە یاوانەو من چەمکو یەکسانی جەوهەرو ۋېشەنە دژایەتی داڎوەری مەکەرۊن، یەکسانی ڕەها جە ۋېشەنە ناداڎوەرییەن، تەنیا یەکسانی جە ماف و ئەرکەنە دروسا کە چاگەیچەنە دیسان قاڵبو داڎوەری ۋەرگېرۊ.
وېڕاوەبەری کۊمەڵایەتینە گرڎو تاکەکا کۊمەڵگای بەشداری جە گلېرۆبییەی کەرا پەی ئاگاییشا جە کاروبارەکاو ۋەرۋستەی گرفتو داواکاشا، ئینېچە هەرمانێ درووسەو بنەمێوە دیمۊکراسیەش هەنە، بەڵام بەشداری کەرڎەی گرڎو خەڵکی جە وۍ ڕېکۋستە ناوچەیی و یاگەییەگانە و پېکئاما کۊمەڵایەتییەکانە هەرمانێ هەم نادرووسە، هەم نا کەتواریەنە، چوونکم وۍ ڕېکۋستەیی هەرمانکەرڎەی دلۍ هەر سیستەمێنە کاری گرڎکەسی نییەن، هەر پېسە بوارەکا هونەری و زانستی و ئاینی کە تاییبەتتېنۍ بە چن کەسێ شارەزای چا بوارانە، یانی کارو خەڵکی ئەکادیمین.
بە هەمان شېوە بەشداری کەرڎەی گرڎو تاکەکا کۊمەڵگەی جە سیستەمو وېڕاوەبەری کۊمەڵایەتینە بە مەبەسو دیاریکەرڎەی بەرژەوەندیەکا گرڎو تاکەکا هەمدیسان نادروسا، چوونکم ۋیرکەرڎەیۆ و پلەو ئاگایی و وۍ هۊشییاری تاکەکا کۊمەڵی هەرگیز پېسە یۊی نییەن، یانی بەرهەمو ویریشا پېسە یۊی نییە، ئانە تاکە هۊشییارەکېنۍ تاوا قازانجو ۋېشاو هینو خەڵکیچ دیاری کەرا، خەڵکی ویر هەژارو کۊڵ ویر نمەتاۊو قازانجو ۋېچش دیاری کەرۊ، گرڎو کارەساتو نەهامەتیەکا ئینسانی جە ۋیەردەو ئیسەیچەنە هۊکارش ئینە بېیەن کە خەڵکۍ نا هۊشییارۍ دایېمە بە قازانجو دەسەڵاتداراو زەرەرو ۋېشا قەرارشا دان.
بنەماو ئابوری سیستەمو وېڕاوەبەری کۊمەڵایەتی هامکارییە مادیەکۍ میانو خەڵکینۍ کە ئی کارەیچە پەنەوازش هەن بە وۍ هۊشییاری تاک بە تاکو کۊمەڵگای، هۊشییاری تاکی پېویسا، بەڵام تەنیا هاندەر نییەن، ئەشۊم پاڵو هۊشییارینە بەها بەرزەکۍ مرۊڤی دلۍ مەژگو تاکینە زیڼۍ کریاوەو گۆرۍ کریا، نموونەو وەشەویسی، بەخشڼەیی، چەنەۋېیەردەی، ڕەحم و بەزەیی ... کە ئی بەها زەریفۍتەنیا فەزاو دین و دیندارینە بەرمەگنا.
ئەچی پرۊژەنە ئەرەمەرزنای سیستەمېوی ۋزیان ڕۊوە کە جیاواز جە گرڎ سیتەمەکا تەرو دنیای، جیاواز چا سیستەما کە جە ۋیەردە و ئیسەنە فەرمانداری سەرو خەڵکیرە مەکەران، سیستەمێوا ڕېکۋزیێوە ئاسۊییش هەن، جیاواز جە سیستەمە ڕېکۋزیا قوچەکی و تانییەکا، هیچ خېڵێ، پارتێ، پارلەمانێ، دۆڵەتێ، دەسەچنێ سیاسی، فەرمانداریش چەنە نمەکەرۊن، بەڵکوم گرڎو خەڵکی بە هامکاری و هەرەوەزی بەراش ڕاوە، ئانەی کە چی سیستەمەنە دیاری نەکریان و یاگېش نېیەنە، ڕېساو دەستورێن پەی ڕېکۋستەی کاروبارو خەڵکی، زانمۍ پەی ڕاوەبەردەی هەر کۊمەڵگێوە یاساو دەستور پەنەوازەن، مادام سیستەمەکە ئینا دلۍ کەتوارینە پېویسش بە یاساو دەسوریەن، ئیتر ئا دەستورە ئاسمانی بۊ یام زەمینی. ئەر نویسەر گەرەکشەن بەهەشتێ ۋەش کەرۊ ئانە هەر چوارچېوۆ خېیاڵیشەنە مەنۊوە، گەر گەرەکشەن بە کەتوارش کەرۊ ئانە پەنەوازش بە یاساو دەستوری هەن. https://akumarani.files.wordpress.com/2018/09/tan-u-pc3bc-wic597ae1b9bdeberiy-kc3bcmec4baayeti-online-edition.pdf.[1]