بەشێ جە کتېبو ئاوەڎانییەکۍ هۆرامانی
ئاماڎەکەردەی و هۊرئەوەگېڵنای: #ئەسعەد ڕەشید#
بەشۍ یەکەمە
شۊنیرە گېڵای پارچە پەنهانیەکا هەر چېوێرە (بابەتە تاریخیەکۍ)و ئېستەیۆو سوراخ کەردەیشان، دیسان پېوەڼکەردەیشان پېوەرە، وەرچەم ۋستەیشان بە وایەو هاگاڎاربیەی جە نەوە وەڵینەکاو ئەشناسایشان بە نەوەکا ئیسەی و دماڕۊی و هاگاڎاربیەی چەنەشان هەرپاسە کارێ ئاسان نیەن، بەڵکوم کارێ قورس و گرانەن و هیلاکی و مانیای و شەوبېڎاریش گەرەکەن.
ئانېشان(ئا کەسۍ) هەکە دەسمڎانە کارێ پیرۊزی ئەچامنەی، بە ڕاسی هەرمانێ ناوازۍ ئەنجامە مڎان کە چېوە گومبیەکا جارێتەر ماراوە ڕووەو کاری، ئانەیچ ئاسان نیەن. بە دیاری کریایی هۊردایۆ لاپەڕەکا تاریخی(گېڵنایۆشان و جەمکەردەیشان)، یام دوەبارە نمایېش کەردەیشان پەی نیشاندای بنج و بنەوان و ڕیشەو گرد گەل و نەتەوێوە، پەوکەی مېژوو پەی وېش مانای جۊراو جۊرە مەبەخشۊن.
مېژوو یانی بیەی، یانی شوناس، مېژوو ئاوېنەو هەر میللەتێن، هەکە ویەردەو وېش مەوینۊوە.ماناو گېڵنایۆ یاڎەوەریەکان، ئەشناسای هېزو دەسەڵاتە وەڵینەکان بە نەوە تازەکا، قۊمیاو دەردیسەریەکان کە سەرشارە ئامێنۍ، قات و قڕی و ئاوارەیی و کۊچەکان کە بەشێ جە ژیوای هەر میللەتێ بیەن. پەوکەی مېژوو گرنگی و بایەخ و وېش هەنش. بیەی هەر گەل و نەتەوێوە، یانی بیەی بناغەو ڕەچەڵەکیش.
*مېژوو هەر میللەتێ کاریگەری تەمامش هەن سەرو ئازایی و هېزو تەوانایی و وەڵکەوتەی و ئاستو ڕۊشنویریشۆ.
* مېژوو ئاشناکەردەیۆ ویەردەین بە نەوەکا، وەفێوەن پەی بە زیڼەیی مەنەیۆ شۊناسو مامایا و بابایامانو پارېزنایشەن جە گومبیەی و فۊتیای.
* مېژوو یانی ئەرشیف، یانی گەنجینە، یانی کەلوپەلی بە قیمەت و وەردەس، یانی شایەتی نامەو میللەتا.
* مېژوو یانی لاکەردەیۆ، یاوانەی چانەی جە چکۊوە ئامانی و ئەژداڎت کېن.
* مېژوو یانی تۊمارکەردەی قۊمیا ویەردەکا، چەنی ئانەیچە ویرەوەریەکۍ بەشێنۍ جە مېژووی.
ئېمە پېسە میللەتێ چېردەسەی، تا ئیسە بەشێ فرۍ جە لاپەڕەکا مېژوویمان نادیارېنۍ، چېروو تەپ و تۊزو زەمانەینە شاریێنێ، بوارمان نەبیەن کە بە وردی گېڵمۍ شۊنیشارەو دماتەر مېژوو وېما بنویسمێ و ئانەیچ تا ئیسە نویسیانۆ سووچێ گۊلانەن چەموو ئا مېژووە دۊڵەمەڼێمانە جە ڕووەو(ڕامیاری، واچەسازی، فۊلکلۆر، هونەری، کۊمەڵایەتی، شۊنەواری، دارایی، ئایینی). پەوکەی زەرورەن گردیمان(نویسەرەکۍ)، نووکو خامەکاما دەیمېرەو لاپەڕەکا بە مېژووەکەیمان ڕەنگینۍ کەرمۍ. ئانەیچ ئەرکێ نیشتیمانی و نەتەوەیی گۆرەن هەکە ئینا گەردەنو گردیمانە.
من هەکە دەسمدان ئی کارو پرۊژە گرنگ و پیرۊزەیە، مېژوونویس نیەنا، هەرگیس نمەیاوو باڵاو ئاڎییشاچ، تەنیا ڕووەو وەرپەرسیمۆ پی کارەیە هۊرستەنا.چەنی ئانەیچە سەروو گرد تاکێ ئی مەسکەن و ماوایە(هۆرامان)ە ئازیزەیە واجبەن کە چنگەکڕۍ کەرۊن پەی وەڵکۆتەی هۆرامانی جە تەمانوو بوارەکانە(ڕۊشنویری، کەلتووری، فەرهەنگی، مېژوویی،..هتر). پەوکەی پېسە دڵسۆزێ و خەموەرێ پی هەرمانۍ هۊرستەناو پېسە واتم ئەرک و گرد تاکێ دڵسۊز و خەموەرو ئی نیشتیمانە خێر جە وۍ نەڎیەینە.
هەڵبەتە پېسە وەڵتەر پەنجېم پەی کېشت، من تاریخ نویس نیەنا، بەڵام پېسە داسکېشێ (درەوکار)، تاوانم هەم درەوە کەروو، هەم سواڵەکا دەسیم یاگێنە گلېرۍ کەروەو کەروشا مەڵۊ، دماتەر مەڵۊکا کېشکەرو، کەروشان بە شارا، پەی دماجاری ئاڎیشاچ بە وېم و داسە کۊلەکېمۆ و فەرەنجیە سېخدارەکەیمۆ، کېشکەرو پەی سەرو خەرمانێ گۆرە و فراوانی. دمای گېرەکەردەیشان شەن و کەوشان کەرو پەی ئانەی بەرهەمێ پاک و جوان بەدەس باروون.[1]