بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ حۆتەمە
مەراسیمو جەژنەو پیرشالیاری جە هۆرامان، بەڵگێوە ڕۊشنتەر و هېقمتەرەن پەی ئا (بەڼ و باوا) کە جە هۆرامان ئەرزششا بېیەنو تاکو ئیسەیچ هەر هەنشان.
بە هەرحاڵ ئا گرڎ دیاردۍ کە جە هۆرامان باو و برەوشا هەن، نیشانێ دیارەنە پەی باوەڕیمان پانەیە هەکە خەڵکو هۆرامانی تاوانشان پارېزگاری جە فەرهەنگ و کەلتووری وەڵینەو وېشان بکەران، خاستەر جە هەر ناوچێوەتەرو کوردەواری، مەڵامەتو ئانەیچە سەختی ناوچەکەین کە پېسە وەربەسێ مەحکەمی مدران وەرانوەرو هەر کەلتورێ بېگانەی کە گەرەکش بېیەن، یام گەرەکش بۊن وېش خزنۊنە دلۍ ژیوای خەڵکەکەی.
ئانەیچە هۊکارێ بېیەن پەی ئانەی خەڵکو هۆرامانی دېرتەر جە ناوچاکانو تەری ئایینو ئیسلامی یاۊو لاشان و وەرشگېران، کە ئامېتە بېیەن بە باو و بەڼە باوەکاو ناوچەکەی.
وایەو ئېمە جە نیشاندای ئی خاڵاو ڕۊشنکەرڎەیۆشان، ئەشناسای هۆرامانېیەن پېسە (گوڵێ جە دلېڕاسەو حۆزو قاڵیەو سەرزەمینو کوردەوارینە) کە جە هەر یاگێوە، هەر دژمەنێ نیازو پەلامارۍ و هېرشیش بییەبۊ پەی سەرو سەرزەمینو کوردەواری، هەرگیز نەتاوانش هۆرامانەرە گۊزەر کەرۊن، یام داگیرش بکەرۊن. گەر بە هەر حیلێوە ئامابۊ دلۍ هۆرامانی، وەڵۍ ئانەی قنگەش گەرمەبۊ، زنیەنشاوە، پېسە ئا شېعرە باوۍ کە دەماودەم واچیۊوەو بیېنە سۊمبولێ پەی وەرگیری و کۊششی.
نە خانی خانان، نە تەیمووری لەنگ
هیچکەس هۆرامان نەگېرتەن بە جەنگ
مەر خان ئەحمەڎ خان، بەگلەری خانان
ئاڎیچ بە حیلە گېرتەن هۊرامان.
پەوکەی جە گرڎ ڕوێوە، ڕواڵەتە ئایینۍو دنیایەکۍ (جەمینەکۍ، دارایی، فەرهەنگی) کەم تاکو فرە مەتاوان بنەچەو ڕەسەنایەتی خەڵکو هۆرامانی نیشانە بڎان.
بەرئەنجامو ئینەیە، پەرسێ وېش مرمانۊ و قنجە مەبۊوە: چ ناوچێ جە سەرزەمینو کوردەوارینە داراو ئانەیشە بېیەن کە (سەیېڎ و سەی زاڎۍ، مەڵڵاو مەڵڵازاڎۍ، بەگ و بەگزاڎۍ، شېخ و شېخزاڎۍ، پیر و پیرزاڎۍ، کۊسەو کۊسەزاڎۍ) بگېرۊنە وۍ، یام پارېزیشان چەنەکەرۊن؟
هۆرامان ماواو گرڎ ئا کەسا بېیەن، کە بە هەر هۊکارێ (ڕامیاری، دارایی، ڕەگەزپەرسی، ئایینی و مەزهەبی، ..هتر) ماواو وېشان جیائاستەن و ڕوەشان کەرڎەنەنە.
گەر گوزەرێ بە تاریخوو ئیسلامیرە بکەرمۍ، وینمۍ جە سەردەمە جیاوازەکانەو دیارتەر چېرو سایەو دەسەڵاتو عەباسیەکا و ئەمەویەکانە، پەی چن جارێ سەیڎ قڕان کریان.
بەشێ فرە چا زاناو سەیېڎا، ڕوەشا نیێنە هۆرامانی و پېسە حەشارگێوە و هەم پېسە ماوێوە چەنەش ژیوێنۍ.
ئا خەڵکېچە کە ئامێنۍ پەی هۆرامانی، دمای ئانەی چەمېشا کریێنێ و یاگۍ وېشا گەرمەکەردېنە ( ڕاو سەرێم کەرۆ، وېم ڕاو قاچام کەرۋە)، چېرو پەردەو فڕوفېڵینە، نازنامێشان لکنان وېشارە (میر و ئاغا و شېخ و سەیېڎ) و دەسەڵاتی دینیشان فاڕانۆ بە دنیایی. بەڵگەی پتەویچما ئانەن وەختێ باس جە ناسنامەیشان مەکەران، پاسە نیشانەما مڎان کە جە ڕەگەزو بنەچەو نەتەوێ تەرینۍ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]