هەوڵێو پەی کەشفوو نیشانەکاو شێعرێ
نویستەی: #عادل محەمەدپوور#
شێعرە جە وینگاو منەو تەنیا (بەیانوو هەستیی نیا، خودوو هەستین. هەرپاسە کە دەسو ئینسانی، تەمسیلێوە پەی خودوو ئېنسانی نیا؛ دەس ئێستێعارێوە جە هەستیی ئینسانی نیا، بەڵکەم خودوو ئېنسانین) و (شێعرە حوزوورێوی هەمیشەیین، حوزوورێ کە جە ناکۆتایێ دەس پەنەکەرۊ و تاکو بې دماییتەریچ و هەر درېژەش هەن...)
پی بەڵگە گۆرەتەرین سیرەتوو شێعرێ هەستیدارێ، ئینەنە کە چنی تارېخی وەرانوەری کەرۊ و بگنانە قۆچانی.. و هیچ کە زرەپنۊش، چنی زەمانی با بە دەسەبرای و سوارێ سەرو شانه و تارېخی با و جووڵیارە و جه (زەمانه)و وېشاوە تێپەڕێ با و بې ئەرەمدرای پېچاوپېچەکاو زەمانی بڕا و یاوا گرڎ سەردەمی. هەرپاسە کە تاریخ جۊرێ هەستین و جووڵەش جێددی و هەستیی بەخشا و جە درێژایی و پانایی ویەروو زەمانېیەنە، بې وچانا. پاسەیچ شێعرە، نێزامش هەستی بەخشەن و پەڕ جووڵێ و نەسرەوتێنە.
ئینە نەخشە ڕایېوەتەرا، پەی پیمانه و شێعرێ و ناشێعرێ. فرێوە دەقێ بە نامې شێعرێ منویسیانە کە بې گومان نەتاوانشا و نمەتاوا، پی کەوچێ پیمانە کریا، پەوکەی هېزو ئانەیشا نییا جە داڵانە تاریکی ئی فیلتەرە بېڕەحمینە، بویەرانێ و سەربەرز جە ویەرگای زەمانېیەنە تێپەڕێ بانە. ئی دەقێ پېسەو قەڼیلێوەنێ کە پەی ماوێوی ڕۊشنێنێ و دمایی گنۊ پرتە پرت و چارەنویسش تەنیا کوشییایوەن.
هەر پی بۊنۆ نمەتاوا جە بازنه و زەمانه و وېشەنە، تێپەڕە با، چی؟ چوون پێسه و پڕۆسێوی هەناویی و ئێلهامی و هەقێقەتێوی هۆرقوڵیای غەنایی، جە ئەڎای نەبییێنە، بەڵکەم سەرو کاریگەری بەرو وېش و سفارشی کەرڎەی وینگایێوی ڕامیار و ئایدیۆلۆژیکی تەشکەش گېرتێنە و پەناش بەرڎېنە ئەو ڕەگەزەکاو شێعرێ و یا بە زوانێوی لووسکەڵە و زەین خەڵەتنێ بە نامې شێعرێ نویسیاینێوە و سووژە سفارشیەکەشا لاونانەوە. ئینە هیچ کە شێعرە نېیەنە، بەڵکەم بابەتێوی مونشییانە و بە هۊشی چاوەڵیانەوە.
شێعرەی ڕاستینە و پاراو کەلیمێ هیچ کە چەمبەس نمەکەرۊ و زەینەکایچ نمەهەبسنۆ، بەڵکەم لەزەتش چنە بەرانێ، تەنیا بە واقێعیەتێوەیچ وەسې نمەکەرۊ بەڵکەم بەپاو ئا سیرەتە جەوهەریە کە هەنش، یاوۆ یاگانێوە کە دەسەڵاتیە زوانی خېیاڵی مانازاییەکەش، گرڎوو تارێخی گېرۆرە و مارۆنەش چیروو ڕکێفوو وېش.[1]