وانای و خانش سەرو شێعرەو تازێ ژەناو هۆرامانی
بەشەی یەکەمە
نویستەی: #سابیر عەزیزی#
بە عام شێعرەو ژەناو دەنیێ، شاعیرە ژەنی بەپاو پیەیا ڕیژەشا کەمتەرا، بە ڵام ئینە مەتاو نکولیکەرو ڕۊڵ و یاگە پەنجەو ژەنې جە ئی ژانەرە بەرزینە بۊ. مۆختاری جە شاعێرە بەرزەکاو سەردەمو فارسی ماچۊ: دماو نیمای شاعێرە ژەنە فارسەکا ھێماو پیاسالاریشا بە نێسبەتو ژەنې نزم وکەم شۆڵێ کەرڎې بە جۊرە ڕۆتە جە شێعرێ ژەنانێ چوزەش کەرد و چەترەو وېش یاواوە. شیعرەو تازێ هۆرامیانې جمێوە فمینیستی شاعێرانە خشش مێ،خروشیەنە.
ناخۆدئاگاو ئی شاعێرا چەنی ڕوبەرو بییەی دلې فەزاو ژیوای ئارۊینە مجیۊرە، شێویو تەکلیف و ڕیسالەت وەشبییەن کە ژەنې هۆرامیێ شاعێرە بۊقە منیۊ ڕوو بە خەلقو بەرهەمێ کە گۆزارەش جە ئەلمانەهای پېشڕەو، وەڵکەوتەی بدۆ و پېویۊ.
کۊمەڵگاو هۆرامانی بەپاو ئانەی جە وەیەردەنە ژەنی کەمتەر تاوانش جە بوارە جۊراوجۊرەکانە پېسە ڕامیاریی و ئەدەبېیات و فەرهەنگ و هۆنەری ڕۊڵی کارامەو یەک سان پېسە پیایش بۊ، هەمیشە شۊنۊ ڕۆت شېوازو پیای کەوتێنە، چی فەزێنە بەڵگە بە قوەت ومتمانە کریا هەن وەرو دەسینە، ئەر جار جار جە مەحال، یام لایەوە جمێ و تەکانێ پیویا بۊ و پېسە سەراوە جە لاپەڕەکاو تاریخینە دریۆ قەڵەم .نکریان یام نەتاوانش ئی شۆڵە کزە بۊ بە چراوە پەڕ نوورە ڕا وەشکەرە بۊ پەی باقی ژەناو هۆرامانی. ئینە خاڵە ، خاڵەتەر ئینینە کە ئی چراوە وەچکلەچە نەتاوانش جە سیبەروهەیکەلو سیماو پیای هۆرامی هەنگامە ئۆ لاتەر پېسە ژەنې وېش برمانۆ وڕیسالەتو ژەنانەو وېش گۆزارەش کەرۊ.
وەشبەختانە چی سەردەمەنە ژەنەو هۆرامانی بە حەزووری بەردەوام و سەرکۆتانە جە ڕووبارو شێعرەی تازێ هۆرامیانې، کەلیین و کەلەبەرە قووڵەکاو مێژویشا چی ڕاسەنە پەڕ کەرڎەنێوە و تاوانشا بەردەوام وبێ کۊڵ دای ڕۊڵ و دەسکردو وېشا پېسە ژەنې هۆرامییەو سەردەمی نیشانە بڎا وجە فرەو دەقە شێعریەکانە تاوی واچی جە دەقی تازەی شاعێرە پیایەکا وەڵکەوتەیشا بە وێوە دییەن.
خانم (کۆلسوم عۆسمانپور) یۊ چا ژەنە شاعێرانە تاوانش چی کارزارەنە ڕاوەشکەر و ڕەچە ماڕە بۊ و پەی ئەوەڵین کەڕەتی دەسش دان چاپ و پەخشو بەرهەمێ شێعری (سورانی- هۆرامی) بەنامې (گرێ) ساڵەو(1383ک -ڕ). چی دەفتەرە شێعریەنە بە جسارەت وهېمایە ژەنەو هۆرامی تاوانش دەقی شێعری جیاواز و ئارۊیانەو پېشڕەو، سەردەمیانە، خەلق وپېشکەش بە کۊمەڵگای کەرۊ.
شێعرێ عالێ
وەیلانو شۊنۊ شیعرانا/شێعرێ عالێ/شێعرێ بې دەنگێ هەوارا/نانێ پەی شەوەو هەژارا/بڕواتا بۊ/شێعرە نېیەنە دلې دیوانو کەسینە/شێعرە ئینە دلې دەسو تاتەو مڼە/دلې سوورە هەراڵەینە/وەر کەمەرو کاکەیمەنە/وېرەگا کۊساڵانو مێوە//ئینێ لاو جوانی ئەدیمۆ/کە کاتو بانەناو یانەو خانینە/بێ چیرو ڵیتەو خانیوەو ناواشاوە/شیعرێ عالی/کۊڵە چۊکڵێ من و کناچڵە ڕەفیقەکام/چەنی براڵوە تاڵا پەی برراڵەکاما/بڕواتا بۊ/هیچ شێعرێ/ئڼەو بې دەنگی شمشاڵەکې تاتەیم/منش نەسۆچنێنا/شێعرە چا وەڵاتو ئیمە/یانې مەجنوونە گۆم بییێ/لەیلې ویڵ ویڵ/گېڵا شۊنیشارە/بەڵام/نا...نا... یانې/کۊساڵانو بنەو هەژگا/تەقەو کڵاشاو نەگېڵایوە/ س 40 گڕی.[1]