ژەنی هۆرامانی و پۊشاکشان
بەشۍ یەکەمە
ئاماڎەکەردەی و هۊرئەوەگېڵنای: #ئەسعەد ڕەشید#

ژەنی ناوچەو هۆرامانی شارەزێنە، یام مەشیۊم واچیۊ هونەرمەڼەنە جە هۊرچنیەی پارچە قوماشی ڕەنگاوڕەنگی پەی جلوبەرگی و پۊشاکیش، بەهەرحاڵ ئا پارچە قوماشۍ کە بەکارشان مارۊن ئینېنۍ:
-گجی درېژ: یام گجی دەرەدامان، جە پارچە قوماشێ ڕەنگینی وەش کریۊن کە سەرو شاناشۆ تاکو قۊلاپۍ پەیاش درېژ مەبۊوە، فرەو کاتی هەر وېش بڕۊش و وېچش ۋرازۊش. بەعزەجارێ پوولەکۍ ڕەنگاوڕەنگۍ بە شېوەو گوڵی (ۋلۍ) پۊرەش ۋرازان، کە فرەوجاری پەی (تازە وەیۋۍ)، یام کناچۍ تازە نوهاڵۍ مەبۊن.
-لەچک: پارچە قوماشێ یەرەگۊشەن، گۊشەکېش درېژېنۍ، گۊشەی دلېڕاسینشا پەشتەو ملیۆ چەنی قوفڵو کڵاوزەڕەکېش لکەدریۊن، دوە گۊشەکەی تەر بە ڕاس و چەپ مڎریاوە سەرو یۊترینیرە پەی دمای.
- سەرپۊش: پارچە قوماشێ چوارگۊشەی چەرمەن، یام سرکەیی (هەوری) و مڎاش سەرو کلاوزەڕەکېشارەو سەرو شاناشارە شۊڕ مەبۊوە.
-کوڵەوانە: یام پارچەی کوڵ، ئینەیچ بە فرەیی (مشکی)یەنە، کە جە ئاوریشمی وەشەکریێنە، دوەقەڎەش مەکەرانو کەراش کۊڵېشاو وەرو ملیشانە لکەش مڎان، یام بە (چەنێ) گۊلانۍ گیرەش مەکەران.
کڵاوەو ژەنەو هۆرامانی:
کڵاوەو ژەنەو هۆرامانی، نامې تاییبەتتییەش هەنە، کە کڵاوزەڕەنە، کە پی جۊرە وەشەکریۊن:
جە شېوە یام قەبارەو کڵاوێ ئاسایېنە، پارچێ قۊرسی ڕەق و سیاو، یام کەوەی تۊخ (مۊر)، خەیاتە (جل ۋرازە) بە تەقەڵۍ وردۍ بە دوەتۊ، ورازۊش یۊترینیرە، ئڼە تەقەڵېش مڎۊ وەنە، تاکو کڵاوەکۍ پېسە پارچە مقەبێوە ڕەقېش پەنەمێ، دیمو دلېش نەرمەن و دیمو بەریش ڕەقەن، دمایی چن پارچە زەڕێ چەرمە (دوە قرانی)، یام بە پەنج لیرەیۍ یام بە دوە لیرەو نیمیۍ مەپۊژیۊرە، بە جۊرێ سەرو کڵاوەکېوە منیاشارەو ۋرازاشا پۊرەش، تاکو گرڎو کڵاوەکۍ مەپۊژیۊرە، ئا کاتە پەنەش ماچان (کڵاوزەڕە).
کڵاوزەڕەی هەرەقەتینەو تەمامە مەشۊم (گېلگېلە و پڕچکە)ش بۊن، گېلگېلە بە چن ڕیزێ کریۊن کە پەنەشان ماچان (لاکەسوورە) یام (فسەیی) و ئی جۊرە گجیۍ فەقیانېشان هەنۍ، کە تاکو وەرو پەیاشا شۊڕۍ مەبارە، کاتێ گجی کەرانە فەقیانەکا وەرۆ لکەمڎا. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]