وانای و خانش سەرو شێعرەو تازێ ژەناو هۆرامانی
بەشەی دوەمە
نویستەی: #سابیر عەزیزی#
ئەر ئېمەی هۆرامی چەمۍ خشکێنمی تاریخ ئەدەبېیاتیمارە پەیمان بەرمەگنۊن کە بە درێژایی ئامای سەردەمو ئیسلامی ئېمە چەنی شێعرێ ئاشنێ بېیەنمێ و بەردەوام بە حەزوورو دیوانە شێعریەکا، شیعرەما چەم پەنە کەوتێنە. بەڵام ئی شێعرە عالێ کە ئادە پېسە ژەنې هەم ئەزموون وەیەردەش هەن وەرو دەسینە، داواشا کەرۊ وێچش ماچۊشا کامێنی؟
دیارا ئیتر شێعرە لاو ئاڎېوە چەمو ڕوبارو، ئا فەزێ خېیاڵی وتەوهەمو شاعێراو وەیەردەی نییا کە شاعێر پەی وېش تەسەوەرش کەرڎەن و مدۆش بە خواردو کۊمەڵگای. شێعرە لاو ئاڎېوە ئا دەردو ڕەنجو کۊمەڵایەتینێ کە ڕۊوانە ژەنەو هۆرامانی وینۊشا، چەنیشا گۆرۍ بۊ، لەمسشا کەرۊ، ئا فاسێڵە تەبەقاتیێ کە جە فەزاو دەگێنە خۆلقیا، پېسە نۆکەر و بەردەی تەماشەو ژەنې کەرڎەی، تەنیا پەی ئەنجامو هەرمانە ئاسایەکاو یانەی ( ئینێ لاو جوانی ئەدایېمو/کە کاتو بانە ناو یانەو خانینە) دیارا چیگەنە دوې زۆڵمی تاییبەتتە ئەو ژەنی وەر چەمېنۍ: یۊ ئینە بەردەوام خەریکۆ هەرمانێ سەختێنە و جە حیج تەسمیم گېرتەینە بەشدارە نېیەنە، خاس یام خراب ئیتاعەت کەرەو پیاینە. یۊتەر ئینە خەریکەو بانە ناو یانەو خانی یام شێخ یام مەڵڵاینە!!!، پېسە بەردەی .... ئایا چی مشۊم ژەنەکې خانی ویش یانەکەو وېش نەناوو؟ کام شاعێری هۆرامی وەڵتەر ئی گرفت سەرەکیەشە زاقێ کەرڎەنێوە؟ دیارا و فرە ئاسایین پی دەقەیە واچیۆ : شێعرێ عالێ..... چوون زامە پەترۆک بەستەکاو کۊمەڵگای و ئازارە بەردەوامەکاو ژەناو ئی کۊمەڵگایە وزۆ بەرو ئاشکرێشا کەرۊ.ئانە کە پېسە ئەرک و ڕیسالەتە و دەفتەرو ڕۊشنویری وەڵێنە جە دیوانەکانە باس نەکریان. شیعرەو وەڵێ باسو دڵداری، سەیرو سەفاو کویسانەکا، سیاحەت جە هەوارەکانە بې وەرچەم گېرتەی لایەنە نەرینەکا و شېوازە نکولیەکاو ژیوای دلې ئی هەوارانە. / شێعرە نېیەنە دلې دیوانو کەسیەنە/ شێعرێ ئینە دلې دەسو تاتەو مڼە/ گرەکشا واچۊ ئەر وەڵتەر جە دلې دیوانە شێعریەکانە باسێ خېیاڵی بېیەن دوور جە ئەمری واقێعی ... کریەنێ، مەلا دلې قاڵەبو شێعرێ عالێ، چوون ئارۊ تەعریف پەی شێعرێ ئانەن تاو سیماو لاوازو و مۆزایەکە خەتخەتی وکەلین وحاڵەتە نەرینەکاو کۊمەڵگای ڕېزبەند کەرۊ، هاوار بەرزکەرۊوە پەی ملمەلانێ چەنی ئی فەزێ. قڵیشەکاو دلې دەساو تاتەیم، جەستەو شەکەتو ئەدێ کە بییە چېرو لیتەو زۆلمو زۊروو کۊمەڵگای پیاسالاریۆ وشاریاوە، /شێعرە یانې / کۊڵە چۊکڵێ من وکناچە ڕەفێقەکام/ شێعرە مشۊم تاو فرە ساکار بەنیسبەتو هەرمانەکېری ژەنې جە ئاسانەو پیاینە بې لایەنە نەبۊ وتاوۊ سەرکەش ناڵە و هاوار کەرۊ./ هیچ شێعرێ / ئەڼەو شمشاڵەکې تاتەیم / منش نەسۆچنێنا/ شمشاڵە هېمایە پەی هۆنەر و ئاوازی و جەنیهایەت بەزم و شاڎی وەشی بە تاییبەت سەردەمو کناچەیی، بەڵام بەداخەوە چی مەشۊم بە شمشاڵە کناچی هۆرامییە سۆچۊ و بۊ بە قەقنەس، ئی شمشاڵە تاوۊ بە جۊرە فەزاو دوورکەوتەی ئازیز، یام وەشەویسە بارۆوە یاد. / بشنو از نی چوون حکایت می کند/ بەڵام فرە وەش چیگەنە شاعێر وېمانە چیوەکا فەزایی و دووردەس مەوینۊ و هەر ئا دەوروبەرو پېسە تابلۊیە ڕەنگین جە فەزاو شێعرێنە ڕازنۊشاوە و منی وەردەنگ لەزەتش چەنە بەرو./ شیعرە جە وەڵاتو ئیمە/ مشۊم شێعرە لاو ئیمە چەنیە بۊ؟ پاسە کە جە دیوانەکانە هەنە ئێحساس کەری پەی ئیمە قۆرەخ کەریەنە و ڕامکەرڎەیش مەحاڵا!!!!
/ یانې مەجنونی گۆم بییە/ لەیلې وێڵ وێڵ/ تاکو ئیسە منی وەردەنگی هۆرامی ئەجیانم هەر مشۊم ژەنی لەیلې بۊ و پیایچ مەجنون. / نا...نا.. یانې/ کۊساڵانو بنەو هەژگا/ تەقەو کڵاشا و نەگېڵایوە/ هاوار کەرۊ منیچ تاوۊ لەیلې وەڵاتو وېم بوو، بنە هەژگانە کاتێ خەریکەو چۊکڵە چنییەینا بە مەجنونو وېم یاوو. تاسەو حەزێم مجورە بنەو هەژگەکا. چی ئەجۊم من کناچڵە هۆرامییە مەتاو عاشقە بوو، وەشەویسم نەبۊ؟ بە پېچەوانەو هەر ئی ساتە کۊرتێ دلې ئی هەژگا چەنی وەشەۋېس وېت ، قۆولە بەرزەو لەیلې و مەجنونینە.[1]