ژەن ئاردەی
کەوتە بې سەرەم، پەنەم وەش یانەو ئاژەنې کە مارووش جە وېما دەوڵەمەڼڎ تەرێ نەبا هەتا ژیوای وەشتەرش پەی ڕېک وزوو.
ئەڎام چێمنە کناچێوەش نیەی بېنېوە پەی، نمەزانوو ئی قسێ چەنی یاوەی بې لاو ڕەییسەکەیم چوون داوەتەش کەردا پەی نەهاری هەتا مۊچیاریم کەرۊ.
ڕەییسکەم نامېش عاسم بې وەلێم کارمەندەکې واچېنېش پەنە عاسم گوورەوایی!
سەرو واڎەی لوانێ پەی ڕەستوورانی، ڕەیییس هەتا چەمش کەوتا پەنە واتش: جوانێوە نەجیب و ماقووڵ گۊش بەراوازنی خیاڵما مۊچیاریێت کەروو.
نەڎەو سەرەت یانەو میزان و وەزعەی وەشتەرە وەش کەری پەی ژەنەکېت! ئەرگۊشم نەڎاری وەنە وېم ئاسا هەڕە ملۊ سەرەترە.
پاسە بەڎبەخت بیانې گرکەس ماچۊم پەنە عاسم گورەوایی! پەرسام:
جەنابوو ڕەییسی چی ماچات پەنە؟ کەردشەو جواب:
چوون بەڎبەختی من جە هیتەی گورەوەیوە دەسش پەنەکەرد، چەودما داستانەو زیڼڎەگیش گېڵنانېوە پەی : عانێ خیاڵم بې ژەنی باروو وەرو وېمرە واتم: مشیۊ کناچې یانە کەم دەسێوە وازوو کە چەنی بییە و نەبییەیم ساچۊ و وڕوو ویانەی فرەم وەنە نەگېرۆ.
هەر پی مرامەو کناچێوە وېسو یەک ساڵېم واسە بەنامې سەباحەتێ.
باوانیش نەبی (جە هېزیە)، تاتەش کاربەدەسێوە ساڎە بې، فرەیچ زەریفە نەبې، منیچ وەشحاڵ بېنې ژەنەو وېم دەسە کەوتێنە.
سەباحەتە، ژەنەو یانەی بې، واچېنێ ئېشەو بلمێ جبەرەو نان بوەرمێ، واچې چی زەڕی زیاڎە خەرج کەرمې؟ واچېنێ سەباحەت گیان جلێت پەی سانوو واچې: مەر ماقووڵی ئینا جلاوە؟
هەتا ڕوێ بە زۊر هیتەی گورەوێ زەریفێم سانا پەی، دوې مانگێ ۋیەردو گۆرەوېش نەکەرڎېنە،
ڕوێ واتم: ئازیزەکېم گۆرەوە تازەکات چی نمەکەرینە؟ بە ڕوەو واتش: ئی گۆرەوە تازێ چەنی ئی پاڵا کۊنا ناجۊرێنێ!
به زۊر بەردەم پەی بازاری و هیتەی پاڵای تازێم سانا پەی، سەبایشەو کە خیاڵما بې بلمێ مێمانی دیسان گۆرەو پاڵا تازەکاش نەکەرڎېنە، واتەم پەنە: چی گۆرەو پاڵایەکات سڼڎۆقنە نماری بەر؟
کەردشەو جواب:
ئاخر جەلەکېم چەنی گۆرەو پاڵەیەکام بە یۊترینی نموەرا!
هەرئاڎ ڕوە دەسێوە جلێ تازێم پەی سانا، وەلێم ژەنەکېم نەکەرڎېشەنە، دەلیلەش ئینێ بې ئی جلێ چەنی جاکەتە کۊنەکەیش بە یۊترینی نموەرا! لوانێ دوې بلووزێ عالێم سانەی، ئی جارە ڕووسەریش گەرەک بې، ڕوسەریچم سانا و ئیتر ناتەمامیش نەبې! وەلێم تازە ئینە ئەوەڵو کاری بې! چوون گۆرەوەکېش کۊنێ بییێ بېنې و کجیەکەیچش باوەش نەمەنەبې ئەزنەو پۊشتێم کرڎەۋە!
هەتا ڕوێ دیم تشنانش، پەرسام چېشتا؟ واتش ئی قژامە بە جلەکام نموەرا، قەرار بی حەفتەی کەڕەتێ بلۊ ئارایشگا، شۊنەو بەینێوەرە، دیم سەباحەتە پەشیۊنە، واتش: کەل و پەلو یانەی باوش نەمەنەن و بە وېما نمەوەرا.
فاڕای دلې یانەی ڕەحەت نەبې وەلێم وەرو دڵوو ژەنەکېم فاڕەیم.
سەباحەتە یانەو تاتەیشەنە ڕادیۊش نەڎیەبێ وەلێ یانەو ئېمەنە شەوانە تەماشە تەلەفزیۆنی کەرې!
بەینێش پەنەشی ڕوێ واتش: یانەکەما قەڎمیا و مەحەلەکېچش پیس و پۆخڵەنە، منیچ ئاپارتمانێوە عالم مەحەلێ دەوڵەمەڼڎنشینەنە گېرتە کرها، واوەی ئی جارە کەل و پەلو یانەکەی چەنی یانەکەی جۊرێ نەبېنې، ئەیزەن دلې یانەم واڕا.
شۊنۊ دوې یەرێ مانگارە سەباحەتە دووبارە تشناشەو،
پەرسام خێرا؟ پېسەو هەمیشەی ڕوەش نەبې واچۊ وەلێم بەجۊرێ یاوناش ماشینش گەرەکبۍ!
بە قەرزو قۆڵەو واروو چوەر کەرڎەی ماشینێم سانا پەی خانمێم.
ئیسە ئیتر ڕەحەت نەتاوێنێ پېسەو عانێ تازە واسێ بېم قسېش چەنی کەروو! جەگر زەریفێ زەریفتەرە بې! کارش بییە بې مەلەکەرڎەی و سەینەما و ئارایشگاو مێمانی لوای!
کناچێوە کە یانەو تاتەیشنە ئاویش دەس نەگنێ یانەو مڼە ویسکی وەرێ، وېسو چوارسەعاتەو خوڎای وەرو وېشرە واچې: بنیاڎەم مشیۊ گرچېش بە یۊی وەرۆ!
ئەوەڵەو نەزانېنې چی ئی قسا کەرۊ نا تەمامیش نەمەنە بې وەلێم دماتەر حاڵیم بی چېوێ کە ژیوای سەباحەت خانمێنە کۊنە بېیەنوو بە ماباقی چېوا مەوەرۆ وېمنا!
مەجبوور بیا تەڵاقش بڎەو یانە، ماشین و دلې یانە و هەرچێم بی بەردش.
تەنیا چېوێ کە پەی من مەنەو ئی لەقەبوو عاسم گۆرەوایە بې!
ئی هیتە گۆرەوە بییێ بایسوو ئانەیە گرچېوێ بە یۊترینی بوەرۆ.
عەزیز نەسین.[1]