شېرکۊ بېکەس و نیشتیمانەکەش کە جە هیچ نیشتیمانێ نمەشۊن
هۊرئەوەگېڵنای و ئاماڎەکەرڎەی: #ئەسعەد ڕەشید#
بەشې چوارەمە
جیاوازی مییانو ئاڎیشا و کەسێ تەری کە وتەن و وەرم مەوینۊن، بېجگە جە جیاوازی جورو مییانو ئا دوە وەرمەیە کە مەوینیان، ئانەن کە کەسە وەرمینەکە تاکو وەرمەنە چڵاکیۊرە نمەتاوۊ ئانەی دیەنش پەیمان بگېڵنۊوە، کاتێچ کە پەیمان مەگېڵنۊوە پېسە شاعېرەکەی ڕاسەوڕاس ئانەمان پەی نمەگېڵنۊوە کە مەوینۊش، بەڵکوم دمای بېڎاربییەیۆش و گېڵایۆش پەی جەهانە واقیعییەکەی، ئانەمان پەی مەگېڵنۊوە کە دلۍ یاڎەوەریشەنە پېسە چن وېنێ بۍ گیانا مەنېنێ. شاعېرەکان ئانېنۍ کە هەر دلۍ وەرمینە مەتاوان ڕاسەوڕاس ئانەی هەکە مەویناش تۊمارش بکەران، یام بواچاش. کاتێچ کە ماچاش وەرو ئانەی کە ماچاش ئانەن کە چېگە نمەوینیۊ و تەنیا دلۍ ساراو وەرمینه مەوینیۊ. ئانەی کە ماچاش ئانەن هەکە چېگەنە نمەپېویۊ و تەنیا دلۍ ساراو وەرمینە مەپېویۊ، بە زوانێ ماچاش کە جە زوانو ئېمە نمەشۊن. ئانەی دلۍ ساراو وەرمینە ئاڎۍ مەویناش تەنیا ئەپا زوانەیە مەتاوان بواچاش، چوونکوم دنیاو ساراو وەرمی دنیێوە تەرەنە و جیاوازەن ئەچی دنیێ، بەڵام چەنی ئانەیچە کە ئا دوە دنیا جیێنۍ، دۋۍ دنیێنۍ کە بەبۍ یۊترینی هیچشان بییەیشان نییەن و ئینێ دلۍ پېوەڼیێ ئۆنتۆلۆجینە. یانی گەر یۊشان نەبۊن، ئانەی تەرشان بییەیش نمەمەنۊ، بەڵام ئانەی دلۍ دنیێوەشانە دلۍ چېوێنە مەپېویۊن، دلۍ دنیاکۍ تەریشانە چا چېوەنە نمەپېویۊن، بەڵام ئانەی چا چېوەنە دلۍ دنیا واقیعیەکېنە مەپېویۊن چن ڕاسەقینېنە، ئانېچ کە دلۍ دنیاو ساراو وەرمینە مەپېویۊ بە ئڼەو ئاڎی و بە عەینو ئەڼازەی هەرەقەتینەنە. لەیەکدایۆ شېعرۍ، لەیەکدایۆ وەرمین، لەیەکدایۆچ یانی شەرحکەرڎەی ئانەی کە دلۍ بابەتو وەرمەکەینە جە واقیعەنە مەپېویۊن، پانەی کە دلۍ ساراو وەرمینە مەپېویۊ و ئینێ پېوەڼیێوە ئۆنتۆلۆجینە. یانی هەردۋېشان بەرکۆتەو بییەی عەینو چېوینۍ، بەڵام دلۍ دۋۍ دنیا جیاوازانە.
ئینەیچە پەنەمان ماچۊن کە شاعېرە هەرەقەتینەکېمان، یانۍ ئانۍ شێعرېمان دلۍ ساراو وەرمینە پېسە ۋلۍ پەی منیان و بە دیاری پەیمان ماراوە، دلۍ شېعرەکاشانە ڕازێ جە ڕازەکانو بییەیێ نەتەوەیی ئېمەشان هۊرگېرتەن و هەر جە ڕاوە وەشەسیایی ئېمە پەی ئا ڕۊحەیە کە دلۍ گرڎیمانە هەن مەژڵېونۊ و ئېمەش پەنە سەرسام مەکەرۊن، ژڵېوەو وەشەسیایی ئېمە پەی ئا ڕۊحەیە، یام پەی لەیلاکۍ مەحوی چەنی سەرسامبییەیمان پەنەش تەنیا ئانەن کە دلۍ وەرمو جەهانە واقیعییەکەینە مەچڵاکنۊرە، بەڵام نمەوزۊمان دلۍ ساراو وەرمیۆ، پۆکەی چەنی ئانەیچ کە شېرکۊ هەسی ئێستاتیکیمان بە شېعرەکېش مەژڵېونۊ و هەس پانەیە مەکەرمۍ کە جەهانێ تەر هەن، بەڵام پینەیە نمەگنمۍ دلۍ وەرمی و نمەیاومۍ بە ساراو وەرمی. ئېمە پینەیە تەنیا مەچڵاکیەیمېرەو ئاگاڎارۍ مەبیمێ هەکە جەهانێ تەر بېجگە ئی جەهانە کەتوارییە و کەتوارەیە هەن و پېوەڼیێ ئۆنتۆلۆگیشی چەنی ئی جەهانەیە هەن.
پەی لوای و یاوای دلۍ ئا جەهانەیە، تەنیا ڕاکۍ مەحوی هەنە و ئاڎیچە ئانېنە؛ مەشۊم ئا کەسە ئېڎ و ئەو کەرڎەیش وەسۍ بییەبۊ و وېش چانەیە ماڵابۊرە کە هەستەکین تاکو شایانو ئانەیش چەنەبۊن کە ڕاش بگنۊن ساراو وەرمی. قۊمیێکۍ کە ڕوەمڎان و سەرسامېمان مەکەران، شېعرەکۍ کە مەژنەویان و سەرسامېمان مەکەران، تەنیا دلۍ وەرموو دلۍ جەهانە کەتوارییەکەی و ئا وەرمەیە کە ئینایمۍ دلېشەنە بېڎارېمان مەکەراوە، ئی چڵاکنارە و بېڎارکەرڎەیێچ تەنیا پەی ئانەی ئېژان کە دلۍ وەرموو جەهانە هەسسیەکەینە بزیەیمېرە و ئاماڎۍ بیمۍ پەی ئانەی بگنمېنە دلۍ وەرموو ساراو وەرمییۆ. ئېمە دلۍ ساراو وەرمینە وەرممان مەگنۊ پۊرە، ساراو وەرمی تەنیا بیابانێن و هیچ چېوێش چەنە نییەن، پۆکەی جە ساراو وەرمینە وەر چانەی ملمېنە دلۍ وەرمی قووڵی و وەرم وینایۆ، ئینایمۍ وەرمێ بېوەرمینە و جارێ نەکۆتېنمۍ دلۍ جەهانو ڕۊحیۆ، بەڵام جە جەهانە کەتوارییەکەی پچڕیێنمۍ. کاتێ مەتاومۍ لەیلا و جەهانەکەیش بۋینمۍ کە کاتو وەرمەکەیمانە وەرم بۋینمۍ، کاتێچ کە وەرم مەوینمۍ، ساراو وەرمی مەبۊن پا زەمینەیە کە جەهانەکەو لەیلای مەگېرۊ وۍ و زەریفیەکانو لەیلای دلۍ جەهانەکەینە جیلوە مەکەران. بەشێ جە وتارەو دکتور عیرفان مستەفای چەربارەو شېرکۊ بېکەسی و نیشتیمانەکەیش.[1]