شېرکۊ بېکەس و نیشتیمانەکەش کە جە هیچ نیشتیمانێ نمەشۊن
هۊرئەوەگېڵنای و ئاماڎەکەرڎەی:
ئەسعەد ڕەشیدئەسعەد ڕەشید
بەشې پەنجەمە
شاعېرەکانو ساراو وەرمی پېخامو لەیلایشان هۊرگېرتەن، ئاڎۍ چەنی ئانەیچە مەتاوان پېخامەکەو لەیلایمان پەی بواناوە و هیچ دېڕێچش نەپڕنان، بەڵام ئا پەنهانییەی کە دلۍ پېخامەکەینە نادیارەن، بە وانایۆ پېخامەکەی ئاشکەرا نمەبۊ. چەنی ئانەیچە ئاشکەرانەبییەی ئانەیە نمەیاونۊ کە ئا پېخامە هیچش پەی ئېمە چەنە نییەن، ئا پېخامە بە زوانێ نویسیان کە گرڎیمان مەزانمۍ واچەکانیش بوانمېوە و جە ماناکانیچشان حاڵیمان بۊن، بەڵام ئڼە وەس نییەن پەی ئانەی جە نیازو پېخامەکەی بیاومېنە. بەبۍ ئانەی وېمان جە ڕاو وېماوە ڕامان کۆتەبۊ ساراو وەرمی نیازو پېخامەکەیمان پەی ئاشکەرا نمەبۊن. هەر پۆکەی ئا پېخامە کە شاعېرەکانو ساراو وەرمی جە لەیلایۆ ماراش، چەنی ئانەی ئانۍ کە شېعرە مەواناوە، پېخامەکا لەیلای مەواناوە و لەزەتشان چەنە گېران، بەڵام نیاز و مەبەسەکانو لەیلایش دلېنە نمەوینان. پۆکەی ئا شېعرۍ تەنیا ئاڼەنۍ کە جوانۍ و هەسژڵېونېنۍ و هیچی تەر. واتا شېعرەکان تەنیا پەی تامبەردەی جە تێکستە ئەدەبییەکانی مەوانیاوە و بابەتۍ زۆقی ئەدەبینۍ. هەر پۆکەی ئانەی کە لەیلای پېسە ڕازێ پەنهانیۍ وېش جە ڕاو شاعېرەکەو ساراو وەرمیۆ کیاستەنش هەر بە پەنهانی دلۍ شېعرەکېنە مەنۊوە و نمەیاوۊ پانېشا کە شېعرەکۍ مەواناوە. شېعرە چېگەنە هیچ نییەن بېجگە جە کۊمەڵە وېنێ شېعریۍ جوان و ڕیتمێ جوانو میانو واچەکان و ئا جۊرە گەمە کە بە واچەکا کریان. واتا شېعرە ڕووهۊرماڵو هیچ ڕاز و پەنهانیێ لەیلای نییەنە پەی ئېمە، بەڵام کاتێ وانەرێ دلۍ شېعرەو شاعېرێ جە شاعېرەکانو ساراو وەرمی ڕازەکۍ لەیلایش پەی ئاشکەرا مەبۊن، مەیاوۊ پانەی کارو شاعېری پېسە هۆڵدەرلین ماچۊ: تەنیا کارێ جوان و بەریئانە و پاک نییەن، بەڵکوم ئانەی ئاڎۍ مەکەراش کارێ مەتەرسیدارەن، چوونکەتی ئاردەی ڕازێ شاریێ دلۍ جەهانو ڕوحی پەی دلۍ جەهانو واقیعین. قۊمیێ و تراژیدیا سەختەکانو دلۍ ژیوایچ هیچۍ نییەنۍ بېجگە جە ئاردەی ڕازێ شاریاۋۍ دلۍ جەهانەکەو لەیلای پەی دلۍ جەهانە هەستیەکەی. ئانەی خەتەرناکەن چەنی ئانەی کە هەرەقەتینەن عەینو چېویەن. خەتەرناکی مروڤی جە ڕاسینە چانەینە نییەن کە چەکی کوشڼە وەشکەرۊن، بەڵکوم ئینا چانەینە پېسە قاچاخچیێ میانو ئا دوە جەهانەینە هەرمانەکەرۊن، ئانەی ئینا دلۍ جەهانە کەتوارییەکەینە قاچاخەن و سەر بە جەهانو ڕوحیەن، بە قاچاخ بارۊش پەی جەهانە کەتوارییەکەی. ئی کارە خەتەرناکتەرین قاچاخچیکەرڎەین، چوونکەتی قاچاخچیکەرڎەی میانو دۋۍ وڵاتا نییەن، تەنانەت قاچاخچیەتی نییەن میانو دۋۍ هەسارانە، بەڵکوم قاچاخیکەرڎەی میانو دۋۍ گەردوونانەن، گەردونو ئاۋەزی و گەردوونو مادەی. مروڤ تاکە زیڼەوەرێن کە بە حەز و هۊرچنیەو وېش مەتاوۊ ئانەی هۊرچنۊ کە ئانە هەرمانێ خەتەرناکەنە کەرۊش یام نەکەرۊش. شاعېرەکانو ساراو وەرمی ئا هەرمانە خەتەرناکۍ مەکەران. بەشێ جە باسو دکتور عیرفان مستەفای چەربارەو شېرکۊ بېکەسی و نیشتیمانەکەیش.
[1] کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 130 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!