بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ شەسس و چوارەمە
5.ژیوای تەندرووسی و پاک و پۊختەیی:
چن هۊکارێ بنەڕەتیۍ یاردی هۆرامییەکاشا جە دېرزەمانۆ دان کە پاک و پۊختۍ بانەو هاگاشان جە ژیوای تەندرووسی وېشان بۊن، چانېشا:
ئاو و هەوای پاک و سازگارو هۆرامانی یاردیدەرەن پەی ویرتیژی و خېیاڵ فراوانی هۆرامییەکا، کە ئینەیچ هۊکارەن پەی ژیوایێ تەندرووسی و پاکی.
دیسان دیمەنە زەریفەکەو هۆرامانی، ژیوگا پاک و پۊختەکەش، تاکی هۊرامیش فېرو پاک و پۊختەیی کەرڎەن و زەوقێ جوانش پەنە بەخشان.
هۆرامی کاتێ هەرچوار وەرزەکەنە تەماشەو چواردەوریش کەرۊن، وینۊن پاک و پۊختەن، ئانەیچ ڕاسەوڕاس کاریگەریش هەن سەرو ویر و ئەندېشەو هۆرامییەکا.
هۊکارێ تەر، فرەیی و هەمەڕەنگی میوەکان، کە هەریۊشان چڼەها ڤیتامینۍ و مادەی خوراکیېش چەنەنۍ کە تەندرووسی ئینسانی پارېزنان.
چانەیە گرنگتەر، پېسە زانانمان هۆرامییەکۍ دایېم پابەڼۍ بیېنۍ بە ئایینو ئیسلامیۆ کە دینو ئیسلامیچ بەشێ جە بەرنامەو شەریعەتەکەیش پاک و پۊختەیین، وەڵۍ ئیسلامیچەنە هۆرامییەکۍ پاڕەوی دینو زەردەشتیشان کەرڎەن کە ئا دینە بە گەرمی لاش جە مەسەلەکا پاک و پۊختەیی کەرڎەنۆ، مامۊسا ئەحمەد نەزیری جە کتېبچەو (هۆرامان دیار یادها یادبودها)دا پی تەرزە منویسۊن:
پاک و پۊختەیی بە شېوەو فەرهەنگێ دلۍ مەردمو ئا ناوچێنە وەرچەم گیریان، مەگېڵناوە پیری وەڵین (پیرشالیار) دەستوورانێ دۍ بە خەڵکەکەی کە جە ئایینو زەردەشتیۆ وەرشگېرتېبېنۍ، ئا دەسورېچە جە دەسورەکا ئیسلامی شېنۍ، پیرشالیار ماچۊ: هەرکەسێ ڕوو وەش و بە خەڼڎە بۊن، ئانە ئاهورایی و بەهەشتیەن، کەسی مۊن و میاچەما تاڵ دوزەخیەن، یاگۍ ژیوای و یانە و وەرهەیوان مەشۊم پاک و پۊختېبان، ئڼا فریشتۍ نوور و ڕەحمەتی ڕوەش نمەکەرانە، مەشۊم ناخوونۍ کەندۍ ئڼا ئەهریمەنەکۍ چېرشانە گلېرۍ مەباوە، کاتو گزیداینە، گزیەکاتا ڕوەکەردۍ ئایېری، با کەمێ سۊچان، پەی ئانەی تاریک پەرەسەکۍ دلېشەنە بزیارە، ئا کاتە گزی دەیدۍ، کاتێ یۊژۍ مازدېرە (باۋشکی مڎەیدۍ) بە پەشتەو دەسیتا وەرو دەمیتا گېردۍ، شانەی مەڕیا بەکارنماردۍ، جامڵەی مەڕیا و سەرقەپاتەنە هیچ چېوێ نەوەردۍ، واردەو شەومەڼەی نەوەردۍ، مەگەر بە خەڵووز پۊژیابۊرە، پۊشاک و پاپۊشی سیاو بەکارنماردۍ، ڕەنگەی چەرمۍ و سۆزە و ئاوییە خاستەرین ڕەنگەن، خوراکی جېڕ و گولژاویا نەوەردۍ، جە هیچ کاتێنە ئاوی پیسە نەکەردۍ، پۊشاکی چېرینەو سەرینەتا با جە پەژم بۊن نەک جە پۊسو حەیوانەکەی، پەی پەنەۋازی و بەدەسئاوەردەی گوشتی نەبۊن بە هیچ کلۆجێ حەیوان نەکوشدۍ، گرڎ گیاندارێ مەخلووقو خوڎایەن، پەی مەسڵەحەتێ خەلق کریان، هەرگیز ئازارشان نەڎەیدۍ، درەختەکۍ قەشەنگۍ و زەریفېنۍ، مەگەر پەی ئاتاجی ئڼا نەکەردۍ بڕدېشاوە، ویرکەردێ، گەر دەس و گۊش و گڵوەو ئېمە بڕاوە چېشماسەرمێ. یاگۍ زیندەگیت با ڕۊشنەبۊن، ماوەو شەو و ڕوێنە یام حەفتێوەنە جارێ گۊش پەی گورانیا یام سروودە ئایینیەکا بگېردۍ تاکو دەروونتا بەتاڵبۊوە، کاتو ژەن ئاردەینە، گېڵایۆ سەفەرینە، جە ئەڎابییەو زاروڵەینە، بەرهەمی خاسینە، وەشبییەیۆ نەوەشینە، جەژنە سازکەردۍ، شاڎمانی بەرۋزدۍ و هۊرپڕای کەردۍ.
شۊنەوارەو ئا ئەسپارایا، هەر پېسە دەسورەکا پاک و پۊختەیی و تەندرووسی ئایینو پیروزو ئیسلامی، دلۍ ناخ و دەروونو هۆرامییەکانە ڕەنگش دانۆ، وینمۍ بە دەسودیمۆ نان کەران، گرڎکارێ بە نامۍ خوڎایۆ دەسپەنەکەران، یاگۍ ژیوایشان بە پاکی نیگاداران، ژەنی بە دەسودیمۆ شۊت بە زاروڵەکاشا مڎان.
سیرەکۊڵۍ:
تەوەنێ سفت و سوڵەی پانکیلېنە، پەی ناوای وەرهەیوانی و دلۍ هۊڎا بەکارئامێنە، کە ئانەیچ دیارەن ڕەنگدایۆ مۊچیارییە ئایینیەکان دلۍ مەژگ و دەروونو هۆرامییەکانە، کە زەوق مڎا بە پاک و پۊختەیی. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]