ئەشقی ئەوەشاریا
بەشەی دوەمە
شانازە ئا ڕوە کاتێ باخچەو ساوایانە یاواوە یانە، دلې بەرەکەنە سەرەش بەرز کەرده و ڕوەو بانجېڵەکەو یانەو سەرکاوی، بې ئانەیە دەسو وېش بۊ، چەمېش وڕێ بییێ بانجېڵەکەیرە.
چەنی تەماشا کەرڎەی بانجېڵەکەی، بەرەو یانەیش کەرده و و لوا سەر. پەردەو هاڵەکېش لادا و دەلاقەکەش کەرڎەو. وەرەتاوو سەرسەحبی شۆڵەش دابێنە دلې هاڵەکې. سەرکاوش دی دلې هوڎەکێشاوە وەراوەرو جامەکەیشانە خەریک بې وېش وزێ ڕا. هەسێوی وەشش پەی ئاما. چا کاتەنە حەز نەکەرې نە چەمېش جە دیەی سەرکاوی لابڎۊ و نە دەلاقەکەیچ بڎۊوە پۆ.
دماو چن ساتێو مدرای پاڵو دەلاقەکەیەنە، هۆرگېڵاوە و لوا ڕوەو کومێدوو جلەکاش. گجیێوی کەوەی کاڵش بەر ئارد کە ساڵ و نیمێو بې نەکەرڎەبېشەنە. گجیەکەش گېرت وېشەرە و دلې جاموو کومێدەکەیەنە تەماشێو وېش کەرد. شېۋار و دیمەنش خەموو ڕۊزگاری زایېف و بې ڕۊح کەرڎەبێ، وەلێم هەڵای پەڕە بې جە ژیوای. باڵای بەرز و زەریفش دلې گجیەکەیەنە و چەنی چەم و برۆ سیاوەکەیش، سەرنجکېش بې. ئا ڕوە دڵش فرە وەش بې و شۆقوو جوانی گرڎو لاشەیش گېرتەبېشەرە.
بەینشا چەنی سەرکاوی تەنیا پېسە دوې هامسایا بې و هیچ قسێوە کە باس جە وەشەویسی یا پێوەنێوی نزیکتەری کەرۊ، جە لاو هیچکامیه و نەدرکیابێ. هەڵایی نەزانې دڵوو سەرکاویەنە چېش ویەرۆ، هەر کاتېوویچ سەرکاوش دیەی، پاسە وېش نیشانە دێ، سەرکاو نەیارێ چا باره و هیچ قسێوە درکنۆ.
وەلیم ئا ڕوە حاڵ و هەواش چېوېوتەر بې و دڵ و دەروونش پەڕ بې جە ئێحساسێوی ئەوەشاریای کە هانیش دێ ڕوەو سەرکاوی.
دلې هاڵەکېشانە ئەی و لوێ و وەقرەش بڕیابێ. پڕێوەنە زەنگوو بەرەی زڕیاوە. چەنی ئەژنیەی زەنگەکەی، دیا پەی دەلاقەو هوڎەکې سەرکاوی، دیش چاگە نەمەنە بې. بە پەلە چېوېوش دا ملو شانە و ملیشەرە و ئامارە وار. بۊنەو ئانەیه و گجیەکەو وەریش یەخە واز بې، نەلا بەر و پاڵو بەرەکەیەنە واتش: کېنی؟
-شاناز خانمە؟
-بەڵې وېمەنا
-عەفوە کەرە ئېمە، جە دووکانوو تەخت ورەشیەکەیه و ئامێنمێ. تەختەکەما ئاردەن پەیتا، چکۊش بنیەیمېرە؟
-دەستا وەش بۊ هەر چی وەرو بەرەیەنە بنیەیدێشەرە. بە دەنگەکەی کوچێ پەشۆکیا، وەلێم کەوته و ویرش ئا ڕوە قەرارا تەختەکەو هەنارێ کناچېش پەی بارا. بۊنەو ئانەیچه و گجیەکەو وەریش تەسک بې و بەشېو لاشەیش دیار بې، پاڵو بەرەکەیەنە وېش نیشانە نەڎا.
بە پەلە ئاماوە سەر و مانتوێوی درێژش کەرد سەرو گجیەکەیشەنە. دەلاقەکەنە دیارە وار، دوې کوڕېش وەرو بەرەیەنە دیێ، سوارێ ماشینەکەیشا بییێ و لوەی. دیسان ئاماراوە وار، کاتێ چەمش کۆت تەختەکەی، زاناش فرە زلا و بە تەنیا نمەتاۋۊ بەرۊش سەر.
چاکاتەنە، سەرکاو پەشتەو دەلاقەکەیەنە بە حەسرەتێوه و دیای دیێ پەیش. سەرکاو ئا ڕوە زوو هۆرسەبێ و قەرار ئانە بې بلۊ پەی جەژنەو شاڎی یۊ جە ڕەفێقەکاش. چن ڕوێ وەڵتەر جە دەمو واڵە گۆرەکېشه و ئەژنیەبېش ئارۊ ڕۊ ئەڎا بییەی شانازێن. هەر پا بۊنه و گوڵېوی زەریفش ئەسابێ و نەزانې چەنی بېیاونۊش بە شانازێ. دەمێ بې شۊنۊ فرسەتێویەرە گېڵێ. نزیکوو ساڵېوی بې دڵش گیرۆدەو ئەشقوو شانازێ بییەبێ. هەرچی کەرې نە تاوێ وازش چەنە بارۆ، و نە پەنەیچش واچۊ.
چەولایچەو، شانازە سەرکاوش وەش سیێ، وەلێم تاکو ئیسە ویرش چانەیە نەکەرڎەبێوە وەشەسیاکەیش پەنە بنمانۆ. حەزیچ نەکەرې بە جۊرېو عاجزش کەرۊ. زانێ سەرکاو ئینا هەڕەتو جوانیەنە و کەوتەن شۊنۊ دڵیش.
ڕەزا بەهمەنی.[1]