پېخامێ ئاقڵانە
کابرایێوە، ژەنەکېش فرە وەش‌گەرەکەبێ، بەڵام ئاد٘ە جە ڕېکۋستەو هەرمانەو یانەی کەمتەرخەمە و لابالییە بې. ڕوێ پیاکە بەرەو دیمو مێمانەکەیشا کەرۊوە کە ماوێوە فرە بییەن ئا دیمە مێمانش نەکەوتەن، وینۆ تەپ‌ وتۆزێوە فرە ئینا سەرو کەل‌ و پەلیوە و، دەمێوەن نەسەڕیان و پۆختە نەکریان!
ئی وەعزە شپرزێ کابرای عادز کەرۊ وەڵێم، حەز مەکەرۊ هامسەرەکېش بە تووڕەیی و قسێ گولێ نیگەران کەرۊ، پەوکەی گەرەکش بییەن بە پێخامێوە پەنەش‌ وچیۆ.
ساعبێ زوو پیاکە وەڵێ ئانەینە بزیۆرە، بەنەهێنی ملۊ ئۆ دیم و سەرو مێزوو تەلەفزیۆنەکەیوە کە یەک‌تۆ تۊزەش سەرۆ بیېنە، بە هەنگووسە منویسۆ؛
(وەشەمگەرەکەنی) و سویچوو ماشینەکەیش سەرو تەلەفزیۆنەکەیوە منیۊرە و مزیۊرە.
عانێ ملۊ جبەر، وەرو بەرەینە، چڕۊشوەنە؛ (سویچوو ئۆتۆمبیلەکەیم سەرو تەلەفزیۆنوو مێمانخانەکەینە جیا‌ئاستەن، زەحمەت کېشە بارەش پەیم)
  کاتێ ژەنەکې ملۊ لاو تەلەفزیۆنەکەی، وینۆ سەرو ئا چینە تۊزەو مێزوو تەلەفزیۆنیوە بەپەنجە نویستەنش؛ (وەشەم‌گەرەکەنی).
ژەنەکې کوت‌ و پڕ بەپێخامەکەی چڵەکیۆرە و، سویچەکەی هۊرگېرۊ و عانێ یاوۆ لاو شوەکەیش، بەزەردەخوێوە سویچەکەش پەنەمدۆ و، ماچۊش پەنە:
(منیچ وەشمگەرەکنی).
کابرا، یاوانە کە پێخامەکەش گېرتەن و، مزیورە.
ژەنەکې گېڵۆوە و، دەس‌کەرۊ بە پۆختەکەرڎەو گرڎو یانەی.
پەی دماو نیمەڕۆی عانێ پیاکە مێوە پەی یانەی، وەشحاڵ بۊ و، هەردوویشا تڼ باوشی کەرا یۊیرە.
ئی چیرۆکێ، پەنەما ماچۊ:
(کریۆ ئېمە پێخام و داواکاری و هەرجۊرێوە ڕەخنەی، تێکەڵوو هێمنی و وەشەویسی کەرمې بەشېۋارێوە وەرانوەرەکەما پەسەنش کەرۊ و، بەکارش بەرۆ).
موحەمەد ساڵح عەزیزی (ڕەزاو).[1]