بەسێ و کوڕو شوانەی
بەشەی ششەمە
بەسێ سەرەش بەرز کەرڎەو واتش: کاکە تەماشەو ئا لاشەیە کەرە بزانە مژناسیش؟ حەمەدێ لوا سەرو لاشەکەی، واق بی، کڵکەش نییا دەمش و گەستەش و بە سەر سامیێوی فەرەتەر تەماشەش کەرې. دماوە واتش بەسێ، ئینە خۊ براکەمانە. کوڕو شوانەکەی کە داییمە پێوەرە بېنمێ. ئای مازی مەڕیام، ئینە چی کۊشییان؟ بەسێ من و تۊ براما فەوتیان. ئینەشە وات و چەمېش پەڕێ بییێ هەڵسی، دەسش کەرڎ برا ڕۊ کەرڎەی.
بەسێ واتش: کاکە گیان مەگەرەوە، گۊش گېرە؛ سیر تاکو پیازش پەی گېڵناوە، دماوە لاشەو کورپەکەیش ئاورد و گېرتەش باوەشی و پڕمینو گروەیش دا.
حەمەدێ کاتێ حەرام زاڎەیی کابرایش پەی بەرکۆت. هەر ئاڼەش پەی مەنەو بە قینی و تووڕەیی بڎیۆ پەیش، نەما خەنجەرەکې کېشۆش پۊرە پەشیمان بییەو. کابرا مەردە بې.
بەسێ، حاڵیم بی، بەڵام ئەی ئا دەس و قاچەتە چی فڕە دا پەیم؟
کاکە گیان، دنیا شەوە زەنگە بې. منیچ چەمەڕاو ڕەحموو خوڎای بېنی. کتوپڕ دوورەو تاپوېم دێ ڕوو بە مەڕەکې ئێ، نەزانېنی چېشا. واتم ڕەنگا دەعبایێ بۊ، بۊ ونېش ئەژنەویێ بۊ. ڕوو بە بوەکې مێ. منیچ واتم با دەسە بڕیاکەش پەی فڕە بڎەو، تاکو ئاڎی وەرۆ، بەشکووم خوڎا بەرێۋم پەی کەرۊورە. دماو ماوێوی تاپوکە کەوت ڕا، قاچەکەیچم پەی فڕە دا. بە ڕاسی ئێتر دڎانێ ژیوایم کەڼێ، وېم ئاماڎەو مەرڎەی کەرد. ئێتر ئانەبې دەنگەکەت ئەژناسام و بییەی بە فریشتەو ڕەحمەتی پەیم.
حەمەدێ گۊشش گېرتەن پەی قسەکاو واڵەکېش، جە ئازایی و قارەمانی ئاڎینە گڵویزو دەمیش وشک بییەبې.
دماو ئانەیە میاچەماو واڵەکېش ماچە کەرڎەو واتش: هورزە با بلمێ. لاشەو زاڕۆڵەکەیشا جەم کەرڎەو نیاشا تۊشەبەرێوە و حەمەدێ داش کۊڵێشەرە. دەسەسەرەکەو مەمەند ئاغایش مەڕەکېنە نیارە و گېڵێوە پەی دەگاو گرگاشێ.
حەمەدێ، بەسێش بەردەو پەی یانەو وېشا، وېش لوا پەی دیواخانوو مەمەند ئاغای، خەڵکەکە هیشتای چاگە بېنې و سەرگەرموو قسا بېنې. یۊ واچې حەمەدێ ئیسە فەوتیان، یۊ واچې مەڕەو سەراشانی دېوېش هەنې و ئێتر چەمما بەحەمەدێ نمەگنۊوە، کەی تاکو ئیسە لوان، ئانا ڕۊ بییەو ناماوە. مەمەند ئاغایچ پەژارەی گېرتەنەرە چی بی بە هۆ فەوتیای حەمەدێ.
چی کاتەنە حەمەدێ کەردش بەرەرە، واتش نۆکەروو ئاغایەنا و دەسش ماچ کەرد.
خەڵکەکە کاتێ حەمەدێشا دی، گەشێ بیېوە، بەڵام حەمەدێ ڕەنگەش زەرڎە بیێبې. ئاغای پەرساش حەمەدێ ئانە چېشتا؟ قسێ کەرە. حەمەدێ گرڎ چېوش گېڵناوە. ئاغا و ئەرەنیشتێ کۊنیشتەکەی بە ئەژنەویەی قسەکا سەرسامێ بییێ. سەوای ئاغا و چن کەسې تەرێ لوێ پەی مەڕەکې و لاشەو کابرای و دەسەسەڕەکەشا مەڕەکېنە دی. وەڵێ گرڎ چېویەنە ئاغا کناچەکېش مارە کەرڎە پەی حەمەدێ، ئیجا بەسێش ئاوردە و پېسەو کناچوو وېش سەرەش ماچە کەرڎە. زاڕۊڵەکەشا سراونا، دڵداری بەسێش داوە و واتش: کناچەکېم، زاڕۆڵەت بۊوە، بەڵام ئی قارەمانیەو تۊ سەرەو گرڎو ژەناش بەرز کەرڎەو. تۊ لیاقەتوو قارەمانیت هەن، گرڎیما شانازیت پەنە کەرمې.
هۊرگېڵنای پەی سەرو زوانی هۆرامی: ئاریا یۆسفی.[1]