بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و هەشتەمە
هەر پېسە لاپەڕەکا تاریخینە تۊمار کریان، کوردەکۍ دمای کونتروڵکەرڎەی پارېزگاو نەینەوای، وەشیېنە ئاهەنگشان سازناو بە ڕیتمێ وەش و بە ئاوازێ سەیر دەسو یۊترینیشان گېرت و سەماشا کەرد، پینەیچە پەی یوەمین جاری هۊرپڕای و جۊرە گورانیێ کە کریۊ بە بناغەو گورانیۍ کورڎیۍ بنریۊرە پېڎا بییە، جە دەرەتانو گورانیۍ هۆرامیېوە یام ئا گورانیۍ کە بە گڵۋی ماچیان، یانی (vocal musicai).
گورانییە فرە کۊنتەرەنە جە ئالەتە موسیقیەکا، جە دەسپەنەکەرڎەی ژیوای مروڤیۆ پېڎابیېنە، مروڤ هەر جە تەمەنو زارۊڵەییشەنە، کاتێ زوانش ڕەوان بۊن و مەگنۊ گاگوڵکۍ، ئیتر وردە وردە ئاوازۍ پچڕ پچڕۍ پەی وېش ماچۊ، یام لاسایۍ ئا دەنگا مەکەرۊوە هەکە گۊشش چەنەنۍ، پەوکەی دېیاری کەرڎەی ساڵێ یام سەردەمێ پەی تاریخو گورانیۍ هۆرامیۍ فرە سەخت و زەحمەتەن، گەر ویر و ڕاو قەڵەم بە دەسەکا وزمۍ وەردەم، ڕەنگە باسەکە دەرەتانێ فرەتەرش گەرەک بۊن، پەی نموونەی کاک دکتۆر محەمەد موکری ماچۊ: واچۍ (گورانی)ۍ دریێنە پاڵو (گوران)ی کە خېڵێ گۆرەو میانو سنەی و کرماشانینۍ، ئا خېڵە پاڕەوی ئایینو ئەهلو حەقی مەکەران، دیسان تۆفېق وەهبیچ ماچۊ: گورانییە جە خېڵو (گوران)یۆ ئامێنە، مێجەرسۆنیچ ماچۊ: گۊران خاوەنو شېعرۍ و گورانییانۍ و کوردەکۍ گورانیۍ جە گۊرانەکاوە فېرۍ بیېنۍ.
خۊ گەر ئا پەیلوێ ڕاسۍ بان، هۆرامییەکۍ و گۊرانەکۍ یەک ناوچەنە مەژیوان و تېکەڵېنۍ، پېسە دەگاو (شېخانی) جە هۆرامانو وەرکۆتی و دەگاو (هاوار)ی جە هۆرامانو پانیشتی، زیارەتگاو گۊرانەکانو سوڵتان ئیسحاقیچ جە دەگاو شېخانی ئەسپەردە کریان، سەرەڕاو ئانەیچە گۊران گورانییەکېشان دلۍ سروودەکا یارسانی یام سەرنجامی وەرگېرتېنۍ، ئانە ئیسەیچ سېیاوچەمانە چ پېسە زوانی و شېعرەکاشۆ، چ شېوەو واتەیش، بناغەو سەرچەمەو موسیقاو گۊرانین و فرە جە یۊترینیۆ نزیکېنۍ.
گورانیۍ هۆرامیۍ و سېیاوچەمانە بەرئامێ ناخو سرووشتی و ژیوای و گوزەرانو ناوچەکەی و فەرهەنگو خەڵکەکەینۍ، وېشانێ تەمام دلۍ هونەر و کەلتوورو هۆرامانیۆ دېیارەن، باسێ پەڕاو پەڕ جە زوان و کەلەپوور و ژیوای خەڵکەکەیش کەرۊن، پەوکەی مەشۊ بواچمۍ هیچ کاریگەریێ نەتەوەی و ناوچەکانو تەریش سەرۆ نېیەن.
سیاوچەمانە = سیاچەمانە
جۊرێنە جە گورانییەی ڕەسەنەی ناوچەو هۆرامانی، قووڵایێ گۆرەش دلۍ تارېخو هونەرو میللەتەکەیمانە هەن، بەشێ هەمیشە زیڼەن جە ئەشناسنامەو هۆرامییەکا و مەتاومۍ بواچمۍ سروودەی میللییە و مەزهەبییەو خەڵکو هۆرامانینە، دیمە میللیەکەش ئینا چانەینە (سرووشتو هۆرامانی و جۊرو ژیوای خەڵکەکەیش) بە جوانتەرین شېوە وېنا مەکەرۊنەو دیمە مەزهەبېیەکەیچش ڕەگېشەنۍ دلۍ (ئایین، ڕاوڕەچە ئایینیەکانە).
چەربارەو نامۍ سېیاوچەمانەی چن پەیلوێ هەنۍ، ئانېشا زیاتەر یاگۍ واتە و گۊشگېرتەینۍ ئی دوە پەیلوێنۍ:
یوەم: ژمارێ جە خەڵکو ناوچەکەی ماچان یوەم واچەرو سېیاوچەمانەی (یوسف ئاسکە)ی گورانی واچو خان ئەحمەڎ خانو ئەردەڵانین، چی بارۆ ڕازێ مەگېڵناوە:
بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]