پاڎشا و تووتۍ هارۍ
کۊرناوە؛ زەمانوو زووی پاد٘شاد٘ێوە ئەمرە کەرۊ بە یۊ جە خزمەتکارەکاش؛ 10 (دە) دانێ تووتێ هارێ بارۆ پەی ئانەی هەرعان وەزیرێوە یام ڕاواچکارێوە بېئەمری پاد٘شای کەڕۆ یام هەڵێوەش کەرد، وزۆش وەرو دەمو ئا تووتا...!
ڕوێ جە ڕوا، یۊ جە ڕاواچکارەکاو پاد٘شای کە فرە زیرەک بې، جە هەرمانێوەنە کە پەنەش سپاریێبێ، نەتاواش ڕېکش وزۆ، ئینە بی بە بەهانێوەو پەی سزادایش جە لایەنو پاد٘شایوە.
پاد٘شا دەسورشدا؛ پەی ماوەو یەک مان٘گی تووتەکا ئاورا بازاوە و، دماتەر کابرای ڕاواچکاری وزا وەرو دەمیشا.
ڕاواچکار داواش جە پاد٘شای کەرد؛ 10 (دە) ڕوێ مۊڵەتیش پەنە بد٘ۆ، ئیجار وزاش وەرو دەمو تووتەکا.
پاد٘شای وات: (قەد٘ش نیا، ۋەرو ئانەیە کە زوەن خزمەتش پەنە کەرڎەنا، 10 ڕوێ مۊڵەتیش پەنە دەیدێ).
کابرای ڕاواچکار، عازا ملۊ پەی لاو ئا نۆکەری کە تووتەکا وەی کەرې و، داواش وەنە کەرد؛ ئا دە ڕوە سەیۊوە و، وەیکەرڎەو تووتەکا پاد٘ی بسپارۆ.
خزمەتکارو تووتەکا ڕازی بی و، ڕاواچکارەکې دەسکەرۊ بە وەیکەرڎەو تووتا؛
عالعالێ شۆرێشا
واردەمەنی خاسشا پەنەدێ
یاگەکېشا پۆختە کەرې و.
شۊنۊ دەڕوەکەیرە، کابرای ڕاواچکارشا ئارد پەی جابەجاکەرڎەو حوکمەکەو پاد٘شای.
بە ئەمرەو پاد٘شای، کابرای مارا و بە دەسبەسیا فڕەش مد٘ا وەرو دەمو تووتا جە حاڵێوەنە پاد٘شا و دارودەسەش ئاماد٘ێنێ و چەمداراو ئانەی کەرا کە چەنی تووتەکا بە دڕڼەتەرین شێوە، ڕاواچکاری تیکەتیکە کەرا و، وەراش وەلێم،
وینا تووتەکا هەر نزیکش مەگناوە...!!!
پاد٘شا سەرەش سڕمەنۆ؛ داخم وەرو چېشی تووتەکا مەوەراش...!!؟؟
کابرا سەرە بەرز کەرۊوە و، ماچۊ:
(جەنابوو پاد٘شای! دە ڕوێ مۊڵەتیم چەنە واستی، چا ماوەنە دەسم کەرد بە وەیکەرڎەو ئی تووتا، تەنیا (10) ڕوێ خزمەتم کەرڎې، تووتەکا ئی پیاوەتیشا ئینا وەرو چەماوە و، کارشا نییا پۆمۆ وەلێم، من دە ساڵې تەمام خزمەتو تۊم کەرد و هیچت وەرو چەماوە نەبې، تەنیا هەڵێوەم کەرد، پیجۊرە خشمیت جمێنە و، ئینەیچە پاداشتوو ئا گرڎە خزمەتی...!!!؟)
(پاد٘شا خەجاڵەتیێنە سەرەش وسترە و، بڕیاروو عەفوېش دا و، چەنەش وەشبی)
مووچیاری_وېیەردا
گرڎما دۆس و هامڕایێما هەنې کە ساڵانێوە چەنیما بییێنێ، وەشی و ناوەشیما پێوە چەشتەن، خاس نییا پەی وچکلەتەرین هەڵەی، یۊترینی وزمې چېرو تیرەو قینێ و غەرەزی.
موحەممەد ساڵح عەزیزی (ڕەزاو).[1]