بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و شاڼزەهەمە
زەردەشت ئاوەزێ دەواکەرانەش بۍ، ویر کەرېوە کە ئی گرڎو جەنگا چکۊوە مەیانە سەرو ئی دنیێ، ئاواتش بۍ سەرچەمەو ئی جەنگا بزانۊ، ئا ویرکەرڎەیۆ پاڵش نیاپۆ بلۊ پەی کەشو (سابلان)ی، ئا دەمە ویس ساڵۍ بۍ، ویرکەرېوە جە سرووشت و ژیوای و گوزەران و باوەڕو خەڵکی، جاری چامنە بېیەن بە حەفتە و مانگ مەنەنۆ، شۊنەو پەنهانی ژیوای و بییەی و مەردەیرە گېڵان، پەیش بەرکۆت کە خێرە، هەر خاسەو خێرەنە، شەڕیچ جە شەڕیۆ مێ، بەڵام سەرچەمەی بنەڕەتیشان نەزانۍ، ئیتر چاگۆ وەحیەش پەی ئاماو بی بە پېخامئاوەر، ئا دەمە سی ساڵە بۍ، بانگو یەکتاپەرەسیش هۊربڕی، جۊرێ خوڎا پەرەسی و ڕۊچۍ و نماشان پەی وېشان بۍ، هەر پۆکەی موسوڵمانەکۍ کاتو فتوحاتەکاشانە کاتێ یاوێ ناوچە کورڎییەکا، ئا ئایینە و ئا جۊرە عیبادەتېشا جە خەڵکەکەی دیۍ، نامەشان پەی خەلیفە عومەری نویستەو داواشان وەنە کەرد مەشۊم مامەڵەما چەنیشان چەنی بۊن، ئاڎیچ فەرماواش‎ (عاملوهم معاملە اهل الکتاب)، عومەر داواش وەنە کەردۍ کە مامەڵەو ئەهلو کیتابی، پېسە جوولەکە و فەلەکاشا چەنی بکەران، چوونکوم خاوەنو کتېبی و شەریعەتی و عەقیدەی و پەرەستەکا بېنۍ، پېسە بت پەرەسی مامەڵەشان چەنی نەکەردېنۍ، بەڵام دماتەر (ئاۋێستا)یچ پېسە (ئینجیل و تەورات)ی دەسشان ۋستەنەو فاڕاشان، لاو زەردەشتیۆ هېزو شەڕی ئەهریمەن بۍ، سەرەمڕە جەنگ میانو خێرۍ و شەڕینە بۍ، ئیسلامیچەنە هەر پاسنەن، خێرە بە ڕۊشنایی زانېنۍ و شەڕیچ بە تاریکی، واچېنۍ خوڎا خاوەنو خێرېن و شەیتانیچ خاوەنو شەڕین، بڕێ ماچان دوۍ خوڎێ هەنۍ لاو زەردەشتیۆ، خێر و شەڕ، جارێ ئېڎ سەرمەگنۊ و جارێ ئاڎ، ئانە هەڵەن، دوۍ هېزۍ خێر و شەڕی هەنۍ، بەڵام خوڎا هەن کە ئاهورانو دلۍ ڕۊشنایینە وېش مەوینۊن، هېزو شەڕی ئەهریمەن کە تاریکینە وېش مەوینۊن، جە کۊتانە هېزو خێرۍ سەرمەگنۊ، ڕۊجیار و ئایېر لاو زەردەشتیۆ دوۍ ڕەمزېنۍ پەی ڕۊشنایی و ژیوای، ڕۊجیار پەی ڕۊشنایی و ئاییریچ پەی جەنگی و تاریکی.
زەردەشت کەسێ خوڎاپەرەس و بە تەوانا و ڕوح پاک و زانا بیەن، دمای ئانەی ئەچا تاریکایی دنیێ و تەمتومانو باوەڕینە وەحیەش پەی ئاما، مەجوسیۍ و ئایېر پەرەسەکۍ لوێ گژېشەرە، داواشان ئۆ دەسەڵاتو ئا سەردەمەیە کەرڎە سزاش بڎان، زەردەشتیچ جە تەرسەو ۋیر و باوەڕەکەیش و گیانو وېشەنە لوا پەی (سجستان)ی، وېش و ئایینەکەش کۊچشان کەرد، چاگە ئایینەکەش بەرش گېرت، خاکو کوردەواریچەنە هەواڎارۍ فرېش پۆوە لکێ و حەزکەرېنۍ بگېڵۊوە، ئینە ڕاش ماڵا پەی وەڵابییەیۆ ئایینو زەردەشتی و فرەو خەڵکو کوردەسانی ئایینەکاشا پەسیناو وەرشان گېرت، دماتەر کە دۆڵەتو مادەکا مەرزیارە ئایینەکە زیاتەر قیمەتش پېڎا کەرد، ئی پېخامئاوەرە خاوەنو پېخامی ئاسمانی بۍ بە نامۍ (ئاڤێستا)ی، چا کتېبەنە چن ئایەتێش چەنە بېنۍ کە مژدەو دمایین پېخامئاوەری دېنۍ دلۍ جەرگەو خاکو عەرەبینە، خاکو دارخورماوا، خاوەن حۊشترە سوورا، تەنانەت شېوە و ڕوخسار و باڵا و نامونیشان و سنوورو دەسەڵاتی و هېزو شۊنکۆتەکاش چەنەبۍ، وەرو ئانەیە زانا زەردەشتییەکۍ و پیرۍ موغانی و پیرشالیارۍ ئا ئایینەیە، سەرەمڕە خەریکۍ پەرس و ڕای بېنۍ، سەردای وەڵاتو شامی و پانیشتو ئێراقی کەرېنۍ، پەی هەواڵو بەرکۆتەی و نزیک بییەیۆ ئا پېخامئاوەرەیە، کە یاگۍ بەرکۆتەیش زانېنۍ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]