بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و هەژدەهەمە
کاتێ ئەسکەڼەر پەلامارەو خاکو میدیایش دا، کۊمەڵێ زانێ شارەزێ جە ئایینی و ۋیر و کەلتورو گەلەکاش چەنی بېنۍ، چەنی خەڵکو ناوچەکا پەرس و ڕا فاڕېنێ، واتە و گۊشگېرتەی کەرېنۍ، کاتێ دیشا کورڎی میدیا فرە بە سادەیی و پاکی ۋیر و ڕێوە ئاسانەشا سەرو خوڎای و دماڕۊ مروڤی هەنە، بڕێ چا ۋیر و ڕایاشا نویستێ و دلۍ باسێنە کیاستېشاوە پەی نیشتگاکەو ئەرەستۆی، پەیش نویستېبېنۍ کە ئا گېڵای و ۋشکنایا کە شمە بە چڼەها قوناغۍ و مانیایی و ۋیر و ڕێ ئاڵۊزۍ دەسگیرېتا نمەبا و هیچتان چەنە حاڵی نمەبۊن، ئانا دلۍ خاکو میدیا (کورد)، خەڵکو ئی ناوچەیە بە ساڎەیی و پاکی و ئاسان خالقو مەخلوقاتیت پەنە مشناسان، یاوێنۍ بە قەناعەتێ و ژیوای ڕوانەیشانە جابەجاش مەکەران، ئینجا باسێ درېژ چەربارەو خوڎای و پېخامی ئاسمانی و مەردەی و زیڼەبییەیۆو قیامەتیش پەی ئەرەستۆی کېیاست.
کاتێ (عیسا ع.س) ئاما دنیاوە، هەسارە ئەشناسە کوردە میدییەکۍ جە پەیدیای هەسارەکانە بە زانستو وېشان پەیشان بەرکۆتەبۍ کە ئا پېخامئاوەرە عەرەبە کە دلۍ ئاڤېستاینە مژدەو ئامایش دریابۍ، ئانا خەریکەن دلۍ خاکو کەنعانی (فەلەستین)ینە جە ئەڎێ مەبۊن. ناوچەو دیاربەکرو ئارۊیۆ یەرۍ زانێشا بە نمایەندە کېیاستۍ پەی قودسی هەتا چا هەواڵەیە پەیجووری بکەران، دمای ئانەی پاشا کەنعانشا دی، هەواڵو ئامای دنیای عیسایشا ئەژنی، کە بەبۍ تاتەو بە پەڕجۊیێ خوڎایی ئامان دنیاوە، وېشان یاونا لاشو سیفەتو پېخامئاوەریشا چەنە وینا، دیاری و سەوقاتیشا پەنە بەخشا، بەڵام پەیشان بەرکۆت کە ئینە ئا پېخامئاوەرە گۆرە نېیەن کە ئاوېستا باسش کەرۊن، بەڵکوم ئینە هەر پېخامئاوەرێن ئامان پەی سەردەمێ و هەرمانێ مەرزدارەش ئینا گەردنەنە.
کاتێ ساسانیەکۍ دمای ئەشکانیەکا ساڵەو (226ز.) ئامێ سەرو دەسەڵاتی، جە ناوچەکانو عێراق و میدیا و فارس و ئاسیای گولانەنە مەرزیێرەو سنوورو وېشان تڼ و توڵ کەرد، دۆڵەتو (ڕوم)یچ جە وەرنیشتۆ برەوەنە بۍ و خەریکو فراوان کەرڎەی سنوورەکاشەنە بۍ، ئا دوە ئیمپراتورۍ جەنگو فراوان وازی کەرېنۍ سەرو حیسابو یۊترینی و گەلا ناوچەکەی، دەیەها جەنگۍ قورس و گرانېشا کەردۍ، ۋنێ فرۍ مېیانشانە مجیا، کار یاوا ئانەیە دۆڵەتو ڕومی پەنا بەرۊن پەی (پاپا و کەنیسە و بەتریارکەکا)و دۆڵەتێ مەسیحی پەی وېش ئاشکەرا کەرۊن، پانەیچ جەنگو ڕومیش کەرد بە جەنگێ ئایینی، چېرو قەرارەکا کەنیسەینە غەزا کەرېنۍ، پاسەشان ئەشناسا کە ئانە جەنگێن پەی یاونای پېخامو کەنیسەی و وەڵاکەرڎەیۆ ئایینو گاوری، خەڵکێ فرۍ لوێنە دلۍ سوپاکۍ. هەمیشە جەنگوئایینی و باوەڕی توڼ و تیژتەرو ۋناوی تەرو توولانی تەرەن، پۆکەی ڕومەکۍ تاواشان سنوورو ئیمپراتورەکەیشان فراوانتەر بکەرانو دەس بگېران سەرو ئۆرووپای و سەرنیشتو ئەفریقای و وەرنیشتو ئاسیای بە شام و نیمە دوورگەو عێراقیچۆ، ساسانیەکېچ لاوازۍ و کەم تەوانێ بیېبېنۍ، چوونکوم چڼین جارۍ هېرش کریابۍ سەرو مەدائینی پایتەختی و چڼین جارۍ تەرېچ تۆقە دریابۍ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]