بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و نۊزدەهەمە
پاشێکۍ ساسانیچ ناچاربییۍ پەنا پەی ئایینی بەران، چا کاتەنە خاستەرین و بەهېزتەرین ئاییین، ئایینو زەردەشتی بۍ، کە فرەو دەق و یاسا بنەڕەتیە ئایینیەکېش مەنېبېنۍ، خەڵکێ فرە پاڕەویش چەنە کەرېنۍ، گۊشدارۍ موغ و پیرەکاش بېنۍ، وەرو ئانەیەە ئەردەشېری بابەکان پاشاو دۆڵەتو ساسانی کە ئەڎاش کوردەنە، داواش کەرڎە هەرچی پیر و زانێ زەردەشتیۍ بېنۍ کۊشا کەردێ، دەسێ گۆرە و فراوانېشا وەشۍ کەردۍ بە سەرداری (موبەزان موبز)ی، سەردارو زانایا زەردەشتی دلۍ دۆڵەتو ساسانینە، قەرارشدا هەرچی دەسنویسۍ و ئایەتۍ و قسۍ زەردەشتی هەنۍ جەمۍ بکریان، سەرجەمۊ ئاڤێستای بنویسیۊوەو بکریۊن بە ئایینو دۆڵەتی، پا شېوە چن دەسێ وەشۍ کریێ، شار و دەگێ گېڵېنۍ، هەرکەس تۊمارێ یام واتە و دېڕێ ئاڤېستایش لاوە بېیێ چڕېنېشو چەنەش وەرگېرېنۍ، پۊختش کەرېنۍ و پارېزنېنېش، ئیتر ئایینەکەشا چەنی بنەماکاو قازانجەکا پاشایا ساسانی گونجناو متشارەو جاگیرشان کەرد، داواشان کەرڎە خەڵکی ئایینو دۆڵەتی پارېزنان، زانێ و پیرەکۍ زەردەشتی هانی خەڵکی دېنۍ بلانە مێڎانو جەنگی چەنی ڕومەکا، ئاڼەی تەر بنەمێکۍ ئاڤێستای شېویێ، واتەکۍ زەردەشتی و ماریفەتەکۍ و ئایەتەکۍ ئاڤێستای تېکەڵۍ کریێ و ئاڤێستێوە تازەشا وەشکەرد، ئەپا تەرزە ئایینو زەردەشتی تېک دریاو بنەمێکېش شېویێ، ئیتر چا ڕوۆ متمانە بە ئاڤێستای نەمەن، تەنانەت زاناکۍ دەربارو ساسانیچ زانېنۍ چېششا پەی قازانجو دەسەڵاتو پاشاکا کەرڎەن، چا ڕوۆن جەنگو فارس و ڕومی کە هەزار ساڵېش خایەنا، بی بە جەنگو مېیانو گاوری و زەردەشتی، بە ملیۊن کەسۍ پەی قازانجو پاشایا ۋنیشا مجیا، فرەو جەنگەکا سەرو خاکو میدیای کورڎیۆ قۊمیېنۍ، چوونکوم کۆتەبۍ مېیانو دوە ئیمپراتورەکەیۆ، جەنگ بی بە مایەو ئاوارەیی و یانە وېرانی و تېک شیەی کشت و کیاری، زەمینو کورڎی بی بە مێڎانو جەنگو هەزار ساڵەو مېیانو فارس و ڕومی، پیرەکۍ زەردەشتی و میللەتە پاکەکەو کورڎی دلۍ کەشەکا هۆرامانینە سەرەمڕە خەریکو نزاکەرڎەی بېنۍ کە خوڎای گۆرە ئا دوە زاڵمەشا کۊڵۍ بکەرۊوە، پیرشالیارەکۍ و زانێکۍ زەردەشتی شۊنەو مژدەکا ئاڤێستایرە گېڵېنۍ، مژدەش دابۍ کە پېخامئاوەرێ گۆرە مێ، دەسۍ ستەمکارا کۊتا کەرۊن، گەلەکۍ ئازادۍ مەبانو میللەتەکۍ حەسیاوە، پەی ئانەیچە پیرەکۍ زەردەشتی جە کوردەسانۆ بە دزی ساسانیەکاوە چڼەها نمایەندېشا کېیاستۍ پەی (شامی و حیرەی)، پەی هەواڵ پەرسای پېخامئاوەری چەمەڕاکریای، چن جارێ نمایەندۍ زەردەشتی کورڎی لوێ پەی شامی و دلۍ کەنیسەکانە پەرس و ڕاشا چەنی زانا گۆرەکا چەربارەو پېخامئاوەری تازەی کەرد، دیسان زانا گۆرەکۍ گاور و جولەکەیچ سەرەمڕە گېڵایەنە بېنۍ پەی ناوچە عەرەب نیشتەکا جە پانیشتو شامی و نیمە دورگەو عەرەبی، چوونکوم دلۍ تەورات و ئینجیلیچەنە هەر پېسە ئاڤێستای مژدەو ئامای پېخامئاوەرێ تازەی دریابۍ، کە دلۍ ناوچە عەرەبەکانە پېڎا بۊ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]