بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: #ئەسعەد ڕەشید#
بەشۍ سەڎ و ویسەمە
ئا سەردەمە ناوچەو بۊتان (جەزیرە) جە سەرنیشتو کوردەسانی پەی زەمەنێ فرەی دەسو ڕومە گاورەکاوە بۍ، بە هۆڵۍ ئاڎیشا فرېشا بیېبېنۍ بە گاورۍ، چڼین کەنیسېشا پەی کوردەکا وەشۍ کەردېبېنۍ، ئا کاتە بۊشایێ فراوانەی ئایینیە دلۍ کوردەسانینە درووسە بیېبۍ، فارسە ساسانیەکۍ وېشا کەرڎەبۍ ساحیبو ئایینو زەردەشتی، چېرو ئا پەردەینە زوڵمێ گۆرە ئەو خەڵکی کەرېنۍ، باج و سەرانەی نەوروزانە کە حۆت باجۍ ئایینیۍ بېنۍ، پەی جەمکەرڎەی زەڕی جە خەڵکە ڕەش و ڕووتەکەی، ئڼا ئا باجۍ زانێ ئایینیۍ و پاشێ و میر و پیاماقووڵۍ نەگېرېوە، چا کاتەنە هەر ۋیرلێوەت فڕەدێ دلۍ ناوچەکەی سۆزە بۍ، پەوکەی چا زەمەنەنە ۋیروباوەڕۍ (مانی و مەزدەکی) و چنهای تەرۍ پېسە مەجوسی و ئاییر پەرەسی و ڕۊجیار و مانگ و هەسارە و تاریک پەرەسۍ دلۍ کوردەسانینە وەڵێ بییێ، کورد دەسو زۊرداری فارس و ڕومەکاوە سەرگەردان بیەبۍ، هەر یۊشان پەی مەبەسێ سەکوتشان کەرېنۍ، ساڵانە چن جارێ پەی ڕەشبگیری و کۊکەرڎەیۆ باج و پیتاکی و سەرانەی و سوغرەی وزېنېشا تالووکە، بېجگە ئانەی کە گرڎ جارێ بە هۊکارو ئا جەنگاوە کە مېیانو فارس و ڕومەکانە هۊرگیرسیېنۍ سەرو خاکو کوردەکاوە، کۊچ کەرېنۍ و یانە و مانەشا جېیائازېنۍ و ڕوە کەرېنۍ یاگێ ئارامە دوور جە جەنگی، کاتێ گېڵېنێ ناوچەکەشا گنۍ چېرو دەسو داگیرکەرێشاوە، سەربازەکۍ هەرچی کۆتێ وەرو دەساشا تاڵانش کەرېنۍ و باخ و لەوەڕگاو کیارەکاشا وېران کەرېنۍ، چېرو ئا گرڎ نەگبەتیانە کورد مەگېڵۍ پەی هېزی یەرەمی تاکو دەسی زاڵمانەو فارس و ڕومەکاشان سەرۆ لابەرۊن، پی تەعرە بە درېژایی هەزار ساڵا خاکو کوردانی چېرو سما ئەسپو فارس و ڕومەکانە، چېرو زوڵمو سەربازە تاڵانچیەکانە ناڵنۍ.
زەردەشت و ئاڤێستا
هەژموونشان سەرو شارەسانی و ڕۊشنویری ناوچەکەی
چا دەمۆ هەکە نوح (س.خ) بە کەشتیەکەیشۆ سەرو کەشو جودی (گوتی) دلۍ کوردەسانینە لەنگەرش گېرت، کوردەسان بی بە ‎ (یانەو دوەمو مروڤایەتی)، بەپاو تۊمارو نویسەر و چەنەکۊڵەر و تۊکارە وەرکۆت و وەرنیشت ئەشناسەکا پېسە (محەمەد قاسم محەمەد، فەیروز ئابادی، د. عەبدولوەهاب ئەلنەجار، ئەمین زەکی بەگ، تەها باقر، ئەنوەر مائی، مینۆرسکی، هاروەی ڕوبنسن، هەنری براستد، گ، آ. ڕایت، فوئاد حەمە خورشید، ...هتر) ئا پەیلواو سەریە سەلەمنان، پاسە بەرمەگنۊ کە شارەسانی جە کوردەسانۆ پەی گرڎ لایێ جەهانی وەڵا بیەنۆ، کورد پېسە بابا گۆرەو مروڤایەتی مەشناسیۊ، دماتەر سەرو خاکو کورداوە چڼین دۆڵەتۍ و شارەسانیۍ هەمە جۊرېشا مەرزنێرە، دمایین دۊڵەت و شارەسانیشان کە جە ئېمۆ نزیک بۊن دۆڵەتو (میدیا)ین، سەرو ۋیرلەو ئایدیولوژی (ئایینو زەردەشتی) و کتېبو (ئاوێستای) مەرزیارە، ئی دوە بییۍ بە فاکتەرۍ بە هېزۍ پەی بنیاڎنیای دۆڵەتو میدیای، تاکو دۆڵەتو میدیای پایەدار بۍ، ئی شارەسانیە برەوەنە بۍ، بەڵام دماتەر فارسەکۍ بە کودەتێوە سەربازییە بە یاردیدای سەرکەرڎە ناکۊکە کوردەکاوە دۆڵەتو مادیشا ۋڕنا، فارسەکۍ هەر چەنی دۆڵەتی کورڎیشا بەرد پەی وېشان، هەرپاسەیچ شارەسانی و ڕۊشنویری و کەلتوور و ئایینو کوردەکاشا دەسکاری کەردو بەردشان پەی وېشان، بە نامۍ وېشاوە ئەشناساشاو هیچشان پەی کورڎی ناستۆ. پېویسەن هەر یۊمان بە ئەڼازەو تەواناو وېمان هۆڵۍ بڎەیمۍ پەی ڕاسکەرڎەیۆو تەکنای تەپ و تۊزو سەرو شارەسانی و تاریخو وەڵینەیمان. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]