یاڎو کاکە محەمەدی مسەفازادەی چوون هەمیشە گرامیا
ساڵڕۊ مەرگو کاکە محەمەدی مسەفازادەیا، ڕۊ (26-10-1391) جە ڕۊزگارېۋی هەر فرە سەختو زۋانی هۆرامییەنە، بە داخۆ کاکە محەمەدی وەشەۋیس پەی دماجاری سەرەش نیاۋە. لۋای کاکە محەمەدی زەدېۋی گۆرە بې پەی زۋانی هۆرامی و یاگې هاڵیەش جە گرڎ سەنگەرېۋو پارېزنای ئی زۋانیەنە وېش ئەرمانې، بەڵام هەماڵەکېش خاس زانېنې مشیۊ چېش کەرا، عەزمشا جەزم بې کە نازا ئاۋاتەکې کاکە محەمەدی زەمین گیرې با. پەی ئانەیە شەۋ و ڕۋېشا دێۋە دەمو یۊی و بە تەلاشی بەردەۋام کارېۋشا کەرد کە مەگەر هەر وېشا کەرڎە بۊ. بە ۋیر و بە قەڵەمی ۋیرمەندانۆ، کەندېشا پەڕې کەرڎێ و لېژېشا ئاردێ ڕاسە و ۋەربەسېشا دێۋە لا و ناسشا کارۋانەکە لەنگیش بێنە ڕا. ئەڵبەت زۋانی هۆرامی هەڵای فرەش ئینا ڕانە، بەڵام ئیسە ئیتر ئا زۋانە نییا کە ناحەزېش تەمێۋە بینانە میرات کەرڎەیش. گەردەو چند دەیەیش سەرو ڕۊخساریۆ لا شیېنە و خەریکا شۆق مرمانۊ، وزەش کۆتەنۆ هەرمانە و سەمەرېش ئینێ ڕاۋە.
حەیف کاکە محمەد نییا دلېمانە تاکو ئی وەزعې ۋینۊ و پەی ساتېۋیچ بیەن دڵ جە ورکەو فۆتیای زۋانەکەیش ۋەر دۊ.
یادت پەی هەمیشەی بەرز و گرامی بۊ هەماڵی وەشەۋیس، کاکە محەمەدی مسەفا زادە.
زیندە بۊ ئازادی
زیندە بۊ بەرابەری
ئافەرین پەی پارېزەرا زۋانی هۆرامی.
سیامەند هۆرامی.[1]