بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای: ئەسعەد ڕەشیدئەسعەد ڕەشید
بەشۍ سەڎ و سی و دوەمە
هونەرمەڼۍ چوونکوم هونەری ڕاسەقینە سەرمایەشانەن ئیتر نمەبۊن چەنی هونەرەکەیشان ترازی بازی بکەران، مەشۊم بە تەرزێ سرووشتیە هەرمانە هونەرییەکاشان بکەران، هونەرمەڼ مەشۊم هونەرەکەیش نەکەرۊن قوربانەو مەرامەکا وېش، بەڵکوم مەبۊن پەرە بە هونەرو هۆرەی و سیاوچەمانەی بڎۊن، یام لاوک و حەیران، چوونکوم ئا چوار ئاوازە چوار بنەماکەو مووزیکی نەتەوەیی کورڎینۍ، موزیکژەن مەشۊم دلۍ یاگە ئەکادیمیەکانە هەرمانەی ئەکادیمیە بکەرۊن، تاکو ئا چوار مەدرەسە دلۍ مۊچیارگا و زانستگاکاو کوردەسانیەنە، هۊش و گۊشو فېروازا بە زاخاوەو هونەری ڕەسەنی گۊش کریۊن، نەک ئیسە دلۍ فرەو ئا یاگانە کە نامېم ئاردۍ تەنیا مووزیکی کلاسیکی وەرنیشتی بوانان، هونەرەکەو وېچمان جار جار پەی تامو چاشتۍ بوانیۊ، دلۍ عەینو سەرچەمەینە لاپەڕە (56) ئامان: من گرڎ کاتێ ئینەمە واتەن و ماچووش هونەر ڕۊخانەن، هونەرمەڼ مەلەوانەن، وېش مڎۊ وەنە، ئیتر ئەوەڵۆ مەخنیکیۊ، یام دلېراسەنە مەخنیکیۊ، یام مەپڕۊوە، کاتێچ پڕاوە ئیتر وېش مەشناسۊن.
هونەر هەر بە نەمری مەنۊوە، ئا هونەرمەڼۍ هەکە هونەری بەرز مەگېران، ئانۍ دلۍ گومۍ مەڼگېنە مەلۍ کەران، تەرسەو خنیکیایشان نیەن، چوونکوم بە شارەزایی مەلۍ کەران، هەڵپە نمەکەران، ویر جە ئاوازی و جۊرو شېعرەکۍ و چەنیبییەی واتەیش مەکەراوە، ئینجا هەرمانەی هونەرییە ئەنجامە مڎان، هەر دلۍ ئا سەرچەمەینە لاپەڕە (56) ئامان: گەر نەیاوانە ئانە مەخنیکیۊن، هەر ئەوەڵۆ مەخنیکیۊن، یام دلېراسەنە مەخنیکیۊو نمەتاوۊ پڕۊوە.
پېسە پەنجېم پەی کېشت، هونەر سەرمایەن، هونەر گومێ مەڼەنە، یام ڕۊخانێ ڕۊشنەن، بە هەزار تەۋەنیش فڕەدەینە، لېڵ نمەبۊن، چوونکوم سەرچەمەکەش چن یاگێ دوورۆ مەی، تاکو مەیاوۊ دلۍ ڕۊخانەکەی پۊختۍ مەبۊوە، هونەریچ، بە دیاریکریایی هونەری سوڼەتی هەرگیز لەکەدار نمەبۊن، ئا هونەرمەڼېچە ئەچا بوارەنە هەرمانە مەکەران سەرکۆتۍ مەبان. دلۍ ئا سەرچەمە وەڵېنێنە کە باسمان کەرد، دیسان لاپەڕە (57) ئامان: من پاسنە نمەزانو نویستەی بتاوۊن ئەچا بوارەنە کاریگەری وەرچەمش بۊن، چوونکوم ڕەخنەو گورانیۍ کۊمەڵ وېش مەگېرۊش، ئېمە میللەتێوەنمۍ کە هاندایېمان فرە کەمەن، وڕنایمان فرەن، پېسە کتېبی کەمەن، بەڵام ڕەخنە گېرتەی هەر بیەن، پەی کەسێ ویس ساڵەی جە لاو کەسێ ویس ساڵەیۆ، بەڵام منی شەس ساڵە چەنی بۊن بنیشوورە ڕەخنە جە گەنجێ ویس ساڵەی بگېروون.
گەنج مەشۊم جاروبار مۊچیاری بکریۊن، زیاتەریچ ئا هونەرمەڼە گەنجۍ، کە دەرەتانو هونەرو گورانیانە هەرمانە مەکەران، یانی هەر جارێ بە دېڕە شېعرێ، یام بە قسێ وەشە، تاکو ۋردە ۋردە بیاوۊن تەمەنو هۊش و ئەقڵی، ئینجا ڕەخنۍ بنیاڎنەرانېش وەنە مەگېریان، دوور جە تانە و تەشەری، چوونکوم ڕەخنەیچ مەدرەسەی وېشانەش هەن، پەی گرڎو بوارەکا هونەری بە ئاواز و گورانیېچۆ.
دلۍ عەینو سەرچەمەی وەڵینینە لاپەڕە (58) ئامان: گەر گەرەکت بۊن موسیقاو ناوچەو هۆرامانی بشناسین، مەشۊم عوسمان کێمنەیی بشناسین، هەڵبەت گرڎو ناوچەکانو وەڵاتی هونەرمەڼو وېشان هەن، ئانەیچ پەی هونەری نەتەوەییمان دوڵەمەڼی ئا هونەرەیە مرمانۊن. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]