پەنەوازی پەی بییەی سەندیکا و ڕېکۋزیایا
نویستەی: #ئاکۆ مارانی#
تاکو مامۊسێ و چین و تۊژاڵەکۍ تەرۍ کۊمەڵۍ سەندیکا و ڕېکۋزیێ سەربەوۍ وېشا نەبانۍ، سەرەنجامو گرڎو کۊششەکاشا ملانە باخەڵۊ حزبە دەسەڵاتدار و ئۆپۆزسیۆنەکا.
ئەر مامۊسێ هەرېمی چە ماۋەو سی و پەنج ساڵی ۋیەرڎەنە وانیارەکۍ وېشا فېرو سەربەوۍ بیەی و ئازاڎ ۋیرۆکەرڎەی کەرڎېبیێنۍ، ئارۊ کۊمەڵۊ ئېمە هەم نەۋېۋی تازە مامۊسێ ئازاڎۋیریش بېنۍ و هەم مامۊسێ وېچشا خاۋەنو هۊشیاری چینایەتی و کۊمەڵایەتی وېشا بېنۍ و هەم ئاراسە و ڕۆتېۋی ئازاڎیوازانە مییانو ژڵېۋەو وانیارانە بۍ و هەم وانیارۍ پېسەو هېزېۋی یۊگېرتەی پەشتیۋانی داوازییەکاو مامۊسایا بېنۍ.
بە پەیلۋاو من مانگېرتەی چە وارڎەی هەڵەن، چوونکە ئەر سەرجەم گرڎو مامۊسێ هەرېمو کورڎەسانی و جەهانیش بە مانگېرتەی چە وارڎەینە مرا، مەشېۋە نمەبۊ مېمانو ئاڎېشا (سالارا هەرېمی).
گرفتو مانگېرتەی چە وارڎەی ئانەنە، کە یەکەم، نمەتاۋۊ گرڎینەیی بۊۋە و دوەم، وازئارڎەیش بۊ بە ناهومېڎیېۋی گۆرە و بەرڎەۋام پەی ژڵېۋەو مامۊسایا و هەم پەی ژڵېۋەو گرڎو چین و تۊژاڵە بېدەسەڵاتەکا/نەڎارەکا.
هومېڎ موازوو نموونەی هۊشیاری تۊ چە هەرېمەنە و مییانو وانیارانە فرە بۊ.[1]