ڕۆ پېڎابییەیم
نویستەی: #فەرزین هەورامی#
جە ویرەوەری وېمەنە جەژنێو ڕۊ پېڎابییەیم، پا جۊرە کە ئیسە باوشانە نەگېرتێنئ.
بەشېوش گېڵۆوە پەی ئا تارێخە تاڵەیە کە گرڎو هام سن و ساڵاو من جە وەڵاتەکاو ئېمەنە دیەنشا. جەنگ، ئاوارەیی، و نەڎاری!
بەشێ تەریچش ئەساسەن ئی جۊرە جەژنێ چا زەمانانە چەنی کەلتورو ئېمە بېگانئ بېنې و باوشا نەبې.
وەلێم، ئیسە دۆرانەکە فاڕیان! جە سەرو هەرمانێوە، جە مەکتەبو زاوڵەکەیتەنە، جە باخچەو ساوایانە، جە هەریاگېوۆ کە گۆرەو، گولانەو، پیرو جوان هەنگامە منیۊ، بەتاییبەتت چی وەڵاتاو ئۆروپایەنە بەدایېم جەژنەو ڕۊ پېڎابییەی بەردەوام پەی مەردمی تیکرارە بۊوەو ئی بۊنە بیەن کەلتورێوی هەمیشەیی و هەمانحاڵیچە پەیام ئاوەرو وەشی پەی تاکەکاو کۊمەڵگای.
ئارینەی کناچېم، ڕوئ پېڎابییەیو گرڎو خېزانەکەیش وەرکەرڎېنێ و مانگێو تاکو دوې مانگی چاوەڵتەر پېخامو وېش مڎۊ، زو زو ویرما وزۊوە کە بەڵې فڵانە ڕۊ، ڕۊپېڎابییەیمانە!
منیچ کە باسو جەژنېشا لانە کەروو هەردوې زاوڵەکە یاگې وېشانە جۊتەپا هۆرمەیاوە.
ئارۊ وېرەگا کاکە ڤیاری کوڕم ئاماو کەرڎاش هۆڎەو وتەکەیو، واتش: تاتە نەزیەیرە تاکو وېما چڕمێت بەر، خاسا؟
واتم خاس ڕۊڵە گیان. دماتەڕ چەمېشا بەستاو، بەرڎاشا پەی ئاشپەزخانەکەی. کە چەمېم کەرڎېوە، زانام زاڕوڵەکام و ئەڎاو زاڕوڵەکام خاتو شۆخانێ جەژنەو ڕۊ پېڎابییەیشا پەی گېرتەنا!
کۊڵێو دڵم وەش بی. کە دڵوەشی ئاڎیشا وینێنا، منیچ ئاڼەتەر دڵم وەشتەر بې. سپاس ئازیزەکاو من.
هامزەمان کە سەرەنج مڎەو جە هېزیوە کوڵێ دوستێو و هامهەرمانې و قۆمێ ئازیزێ جە دنیاو دیجیتاڵیەنە پېخامۍ گەرمێ و پەڕجەمۆحێبەتێشا کیاستێنێ. سپاس پەی شمەی وەشەویسی. دنیایێو دڵوەش بییا.
هەرپاسە ئی بۊنە بی بە بەهانېوە تاکو مێقدارېویچ سەرو ئا ڕۆتە تیکراریەو ژیوایۆ کە گرڎیما عاڎەت پەنە کەرڎەن زیانیوە بەر!
کورتە فیلمېوی سینەمایی چا 48 ساڵەیرە کە جە عەمریم ویەرڎەن جە مەژگمەنە ئاماو لوا! جە هەسارەگولانەو یانەکاو وېما جە شۊشمې چەکمەکېم وەتێ. ڕوەم نییا ئۆ تەوێڵئ! چاگەیچ دەوامم نارد لوانی هەڵەبجە، عەنەبەی کۊنە تراکتۆرەکەو خاڵۆ حسەینی سواربیا چن جارێو! چامای زیلی عەسکەری بەردارە زەڕایێن! دماتەر باوشەی گەرمەو تاتەیم ئارداوە تەختەوجامی جە شۊشمې. سەرېوم دا ئۆ پەروونی! دماتەر ڕوەم نیاوە پاوە! خیاڵېوم جە دەگاوەشەکاو شمشېری و دەرەبەیانې و سەریاسی کەرد. تۊشەبەرەو ژیوایم داکۊڵێمەرە، تاکو تاران و کەرجیچ لوانی! چامایتەر هەر نەسەیانیۆ ، تاکو شەوێوەی دێرکاتە جە کەمپو کارسڵۆندی ساڵەو (2000ز.) جە وەڵاتو سۆئدی سوکە وچانېوەم دا!! ئی فیلمە حەڕئاما و لواو، پەڕ بې جە بەرزی و نزمیێ. چېگەیچ هەر پېسە هۆرو وەهاری گېڵایەنە بېنئ، تاکو پڕێوەنە کاکە ڤیاری کوڕیم چڵاکنانیرە:تاتە گیان بۊ با یاریەکەیما کەرمئ، وېت وەڵتەر قۆڵت دا.
هەرمەندێ وەشیەنە.[1]