یاڎەوەریەکېم
بەشو ویسی
بڕێ کتېبێ کە وانیشاوە و دلېشانە گەشت و گوزار کەرینە، تاوییەیوە دلېشا و لیپاولیپ مەست و حەیرانت کەرانە. پەڕتکەرانە کەلیمێ و قسێ. نەزانی چېشەن و جا و مەکانشان چکۊن!خومار، بې لەش و وەنەوزاوی.بێ ئازار و تەنەلەش، قورس. بە هەزار منێوە کەوتەنی و بە مسقاڵێوەیچ نمەجووڵییەیوە. ئاسمانەرە مدییەی و بنۆدارا بەرۊتوە. گجارێ چەم پروونی و بې ئانەی چەمېت ئازارەشا بۊنە و یام چەم ئێشێوەت گېرتەبۊنە. ۋیرت چوار دەورش گیریان و پەل نمەجمنۆنە. تاکو چڵاکییەیرە ڕۊ تەمامیان و شەوە بە گرڎو هېزیشوە تەماشات کەرۊنە، واقت مەنێنەنە و گۊشش پەی شل کەرڎەنی!سکووت مجیانرە مەنزڵەکې و ڕاوڕاداری نمەدۊ.عەینەکەکات سەرو مێزەکەیوە لاشا ئاستەنەرە و کېشیەینێ و پەڕێنێ دیای و چەم ئێشەشان گېرتەن. کەلیمێ قووڵتەر جە زرێبارێ هەسێ بییێنێوە خیاڵات. وەرشا دەیوە و بەرەشان پەی کەریوە، نۆڤێلە شێعرێوە درېژە و ڕۊمانێوە پېچڵاوپېچ پېسە ( ڕەددێ گۆم/ ڕدېگُم - کارپانتیه)ی خولقنۆنە. (وا) و (بۊران) و ئاشوفتەگی و سەرئەوەشێویای دەورووبەری مەکەنۆوە و کەرۊش بە ئێپیزۆتێوە دەنگ و ئەوەگېڵنای. کەلیمێ بە ملبەرزیېوە مات و سەنگینێ دەممەوە گنێنېرە و سەرڕېز کەرېنێ.ژیوایێوە بې کەڵک و بې فایڎە، ئاشوفتەگیی ڕۊیم، بې ۋیری و بې ئاوەزی شەوانەیم زێهنیمەنە، نەقاشی کەرېنێ. پېسە گوناهبارېوە شەهوەتی و بې نام و نیشان سەرەکەرینە ئەوبنۆ دیوارا.شەوەزەنگەی بې نام و نیشان. پی زمسانەنە سیسەرگێش هورئاردێنێ و جریوەشان تاکو چوارڕاو ئەسڵی ملۊنە!
نەدییەنم کەلیمێ ئەئاڼە قورس و منەتبارت کەرانە. نەپات ڕامڎۆ و نە چەمېت بیناییشان درۆشییاوە. تاویانیوە سەرو پایات، پېسە قیرێ هامنەنە خیابانی قرچنۊوە و هەڵمەیچش پەی دەرمانی نەشۆنە. ئیجا بی بە تەندیسێوە حوکمڕان کە پەنجا ساڵېن گەنان و پەل نمەشەنۆ.خەریکا حەیبەتیێ ئازادینە تۊقۆ و دڵش هوربێوە!پېسە نویسەرو ڕۊمانەکې ماچۊ: کە ئینسان جە بازنەو ئینسانییەتی دەسش کېشت بە زەحمەت تاوۆنە دووبارە بێوە دایێرەو ئینسانییەتی.
بورهان ئەختەر.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 140 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!