تەۋېڵۍ ماۋاو قەڵایا و شۊنەمایانە
نویستەی: #ئاکۆ مارانی#
تەۋېڵۍ ماۋاو قەڵایا و شۊنەمایانە، من وېم خاس ۋیرم مەنەن، کاتېۋ جادەو تەۋېڵۍ - Teṿᴉľᴉ پان کریا و بی بە دۋە سایت، کاتېۋ بلدۆزەرۍ و شۆڤڵۍ داشا ئۆ کەڵەکۊ تەڵانەکاو ۋەرۊ باۋاسەرەنگی، قەبرۍ کۊنۍ چیرو تەڵانەکا بەرکۆتۍ و هەڵای کەللۍ و پاچەکېشا چنە مەنېبېنۍ و ئېمە کە ئا کاتە زاڕۊڵۍ بېنمۍ، دەس بەرېنمېنە وڵۊ نیمەقەرە وڕاکا و کەللۍ گولانۍ بەرئارېنمۍ و تەماشەشا کەرېنمۍ، فرەو کەللەکاو دلۍ ئا قەبرا بەپاو گولانەیشا کەللۍ زاڕۊڵا بېنۍ.
بېژگە ئانەیە، من ئەژنەۋیەنم، کە چە دەرەو تەرتیبا سکۍ کۊنۍ ئېزیێنێ و دلۍ باخا دەرەو ئاۋېسەرینە گۊزۍ ئېزیێنێ و تەنانەت دماو (1991ز.) کاتو دروسکەرڎەی یانەکانە چە هۊرکەنەی بناخەکانە کەللەسەرۍ ئېزیێنێ. بەڵام هیچ یاگېۋەنە باسو ئا چېۋا نمەکریۊ و تەنانەت بە تیمەکا شۊنەماشناسی ڕانمەڎیۊ بەیا تەۋېڵۍ!
کریۊ ئېمەی تەۋېڵەی و خەڵکو بەرو تەۋېڵۍ مەڵامەتو ئانەیە بزانمۍ؟
گەنجەکۍ تەۋېڵۍ چی ئاستو ئانەینە بېدەنگۍ بېنۍ و هەنۍ؛
گرنگی ئا شۊنەمایا نمەزانا و هۊشیاری تارېخیشا نېیا، یان تەرسایتەرسا؛ چە چېشی و چە کۍ تەرسا.[1]