بەشێ جە کتېبو ئاوەڎانییەکۍ هۆرامانی
ئاماڎەکەرڎەی و هۊرئەوەگېڵنای:
ئەسعەد ڕەشیدئەسعەد ڕەشید
بەشۍ سەڎ و چل و یەرەمە
ئا پېخامئاوەرەیچ سەرو یەرۍ بنەما مەحکەماوە پېخامەکەش یاونان، کە ئارۊ سەرتاسەرو دنیێنە ئا پېخامۍ پاڕەوی کریان، پېخامەکېچ (ۋیری خاس، گوفتی خاس، ڕەفتاری خاس). دلۍ کتېبو ئاڤێستاینە (گاتاکۍ) کۊنتەرین سروودۍ کورڎیۍ جە لاپەڕە (10) ئامێنۍ: (گەر بە وردی سەرنجەو پۊشاکی کورڎی بڎەیمۍ وینمۍ بیبینی یەرە گرۍ و کەشیۍ کە ناوچەو بارزانی و هۆرامانینە بەسیان هەر عەینو (سەدرەو کوشتی) سەردەمو زەردەشتیەکانۍ کە پەیمان مەنېنێ، پیێ کورڎی کاتێ ساعبەنە وېشان کۊکەراوە یەرۍ لکۍ مڎانە بیبینەکاشا بە نېیازو تازەکەرڎەیۆ پێمانو وېشان پەی پیرەکا زەردەشتی و پەی بنەما سەرەکیەکا ئایینەکەی، پی تەرزە:
(لکەی یەکەمە نیەتی خاس، لکەی دوەمەگوفتاری خاس، لکەی یەرەمە ڕەفتاری خاس).
دلۍ عەینو سەرچەمەینە لاپەڕە (11) ئامان: (بەڵۍ کپ بییەیۆ و بېدەنگیەکەو ئېمەی کورڎی نەک دوۍ سەڎۍ، بەڵکوم چواردە سەڎېش خواینا، بەڵام بە وەشحاڵیۆ گەنجۍ تازۍ ئارۊی چڵاکیێنېرەو خەریکەن مەیاوە وېشارە چەمۍ مەگېڵنا شۊنەو خودی نەبییەیشارەو مەزاناچ سەردەم نە سەردەمو شمشېری دوە دەمین و نە گورزەی حۆت سەرە و نە هینو ئافسانە و ئەفسونین، بەڵکوم سەردەمو ژیوایۆ و پېوەرە ژیوایەن، سەردەمو دیالۆگو مېیانو گرڎو کەلتوور و شارەسانیەکان، ئیتر مەشۊم ئارۊ بە جیلە تازەکەیمان بواچمۍ کە ئېمە کېنمۍ؟ کۍ بیېنمۍ؟چېشمان بېیەن و هەنما؟چکۊوە ئامێنمۍ و ڕوەو کۊ ملمۍ و مەیاومۍ کۊگە؟
چی ئېمە توشو قەیرانەو کەسی بییەی ئامێنمۍ و چکۊنە گومۍ بیېنمۍ و مەشۊم شۊنەو چېشیرە بگېڵمۍ و چکۊ بېزمېشۆ؟
گەر سەراپاو دنیێ بگېڵمۍ و چڼین بەرگۍ جۊرا و جۊرۍ فاڕمۍ و چڼین کەرەسۍ بېگانەی تېکەڵ بە کەلتووریمان بکەرمۍ، چوار دۆریما ڕازی بکەرمۍ، هەرگیز نمەبۊ ئەپا (چەمچە چۋینە)ی کە بە دەس و پەنجەو هەجیجیەکاو وېما وەش کریۊن، یام پا هونەرە بەرزەو سېیاوچەمانەی و هورەی ئاهورایی، کە نەوەڎ و نۊ پیرەو هۆرامانی فەرماوانشا، پەوکەی مەشۊم فرە بە وریایی و ئاگاییۆ هەرمانە چەنی کەلتوورو جەهانی بکەرمۍ، تاکو ئېمەیچ بتاومۍ ئا کەلتوور و هونەرە بەرز و زەریفەیە نیشانەو ئاڎیشا بڎەیمۍ، پەی نموونەی ئینگلیزەکۍ شانازی بە قوماشو وېشاوە مەکەران، ئەی چی ئېمە شانازی بە بیبینو هەجیجیاوە نەکەرمۍ، کە دلۍ سەخت تەرین یاگېنە بە دەس و پەنجەو وېشان وەششان کەرڎەن؟ یانی هەر میللەتێ ئاگاش جە ویەردەو وېش نەبۊن، نمەتاوۊن دماڕۊ وېش بە وەچەکاش بشناسۊن. دلۍ کتېبو (هۆرامان باشتر بناسن)، لاپەڕە (10) ئامان: (ئېمە گەر باسو جوغرافیاو ئەدەبو هۆرامانی بکەرمۍ، پا تەرزە مېیاومېنە تەمامو ئا ناوچا هۆرامیۍ بیېنۍ، پېسە بڕێ جە نویسەرا هەر ناوچێوەنە چن دېڕە شېعرێشا دەسکۆتېبان، خەڵکو ئا ناوچێشان بە هۆرامی زوانۍ نیێنېرە، بڵاو بییەیۆ ئەدەبی هۆرامی دلۍ ناوچەکانو تەرینە مەگېڵۊوە پەی دوۍ هۊکارا:
یەکەم: نزیکی زوانی هۆرامی جە زوانی پەهلەوی و ئاڤێستایی.
دوەم: ئایینو یارسانی فرە وەروەڵا بېیەن، کە دەفتەر و نویسیێکېشا بە زوانی هۆرامی بیېنۍ.
چڼین جارۍ ئیشارەم پەنە دان، کە پېویسەن پەیجوورکارۍ و نویسەرۍ زیاتەر باسو بابەتە مێڎانیەکا سەرو وەڵاتو وېمان بکەران، چوونکوم میللەت جە نویستەی و کەلتوورو وېشۆ دەس پەنەکەرۊن، تاکو زیاتەر شارەزاو تاریخو وېشان بان. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.
[1]