چەنی زوانەکەیما پارؽزنمؽ؟
زوان ئا وەسیلەنە کە تاوی ڕاو ئاڎیۆ مەبەستەکات یاونی لاو کەسی وەرقسەیت، هەم ئاڎ چەتۆ بیاۉنەو هەم تۆیچ چاڎی بیاوینە، ئانە پاسەکەرۆ پەی پۆڕنایو هەرمانەکاما هەمیشە زوان بەکاربارمێ و خەمەنە بیمێ کە زوانەکەیما چە دلێشیینە پاڕێزنمێ، جا ئا چێوێ کە پاسە کەرا زوان پاڕێزیۉ فرێنێ، بەکوڵی چێنە چند چؽوێشا وزو ڕووە، بەهومێڎو ئانەی بتاومێ زوانەکەیما پاڕێزنمێ و نەوەو ئایندەیما بە ئاسانی بتاوۉ قسؽش پەنەبکەرۉ و یاگی فەخریچش بۉ.
یوەم: واتارەو جومعەی بەهەورامی بڎەیمێ، کە بەداخەوە ئانێ ئیدیعاو پاراستەیو زوانی مکەرانؽ ئی ویارشا فەرامۆش کەردەن، کاتێو کە مەڵڵێوی ئازیز بە هۆرامی واتارە پێشکەش مکەرۆ یانی ئانەی کە پەیامێوی نەمر بیاونۉ، هەر ئینە بە زوانحاڵ ماچۆ ئێمە خەریکێنمؽ ئایەتێوی خوڎای بەرجەستێ مکەرمێ ژیوایمانە. ئینە زیاتەرو گرچیوی کۆمەڵگانە ڕاو وێش مکەرۉوە و قورسی مڎۉ بە ویارەکەی.
دووەم : قسؽ پەنەکەردەیش یانەنە دلێو زاوڵانە. هەمیشە هەوڵدەی خێزانەکەیت باریرە بە زوانو وێشا قسؽ بکەرانؽ، کە پەنەش وچیۉ زوانو ئەڎێ.
یەرەم: مۆچیاری یام مۉچنای. جەڕاو واناینە و مەکتەبەکامانە دەرسێو جە دەرسەکا هەورامی بۉ پەی ئانەی گرنگی زوانەکەی بەربوزۆ پەی ئا کەسییە کە سەرقاڵو فێربییەیا (مۉچناین).
چوارەم: وانایۆ و نویستەی. هانی دەوروبەری بدەی سەرو ئانەیە کە هەم بواناوە و هەمیچ بنویسا بە هەورامی.
پەنجەم: بەکارئاردەیو گرد دەسینەکاو ئەرەیاونای (ڕاگەیاندن) یام وەشتەر بواچمێ تەکنۆلوژیا بوزمێ خزمەتو زوانەکەیما تا چا ڕێوە خەڵکی تەریچ مەجبورێ با فێرؽ زوانەکەی با.
ششەم: کۉڕ و سیمینار و چالاکی ڕۉشنویری و فەرهەنگی بەزوانو ئەڎێ سازبکریۆ سەرەمڕە.
حۆتەم: پېوەندیە کۆمەڵایەتیەکا بوزمێنە خزمەتو زوانو ئەدێوە هیچ عەیبە نییەن، چوون زوان هەر زوانێو بۉ، کەسما عەریزەما نەڎان پەی ئانەی فڵان زوانما بۉ، بەشؽوێوی گردین زوان ئایەتێن چە ئایەتاکاو خوڎای بەکارئاردەیش بەرجەستەکەردەیو مەفهومو ئا ئایەتێنە.
پەوکای پارؽزنایو زوانو ئەڎێ کەسیبییەو ئەشناسەو وێتا، پارێزنای فەرهەنگیەن. هەر زوانێو هەنی تۆ یاگی ئێژانەینی.
کەمال ئەمین گوڵپی.[1]