ڕۊی جەهانی زوانی ئەڎایی و مەرزنایرەو پلاتفۆرمو هۆرامی پیرۊز کریا
نویستەی: #جیهاد هەورامی#
بۊنەو ڕۊی جەهانی زوانی ئەڎایی و ساڵیاڎو مەرزنایرەو پلاتفۆرمو هۆرامی، جە شارو شەفێڵدی جە وەڵاتو بەریتانیای مەراسیمېو ڕاوەبریا .
مەراسیمەکە بە ئاماڎەبېیەو ژمارێ فرە جە هۆراما ئەرەنیشتا شارە جیاوازەکاو بەریتانیای و بە ساتێ مدرای پەی ستایېشو گیانبەختکرییایا ڕاو ئازاڎی کورڎەسانی دەسش پەنە کەرد و دماتەر بە پېشکەشکەرڎەو چڼ وتارېوی زوانەوانی و ڕۊشنۋیری دۊڵەمەڼ کریا.
مەراسیمەکە بە چن پەخشانە شیعرێ و واتەو سیاوچەمانەی زیاتەر ڕازیاوە، جە بەشێ تەر جە مەراسیمەکەنە سەرو نامۊ پلاتفۆرمو هۆرامی کۊششکار زەردەشت هۆرامی بابەتېوەش پېشکەشە کەردە و واتش: پیرۊز کەرڎەو ڕۊو زوانی ئەڎایی و ساڵیاڎو مەرزنارەو پلاتفۆرمو هۆرامی ئەرکېوی ئەخلاقی و نەتەوەیی و فەرهەنگیمانە و ئەشۆ تاکو پارېزناو یەکجاری زوانەکەیما گرڎ ڕوېما ڕۊو زوانی ئەڎایی بۊ تاکو جە فەوتنای پارېزنمېش.
هەرپاسە داواش کەرد کە مشیۊ چی قۊناخېنە گرڎیما کۊششو ڕېکوستەی و یۊگیری بڎەیمۍ تاکو زوانما، فەرهەنگما، کولتوورما جە فەوتیای پارېزنمۍ و ئی هەنگامېچە پەنەۋازیش بە کەرڎەیۆ فېرگەی هەن، چ بە ئۆنلاین، یان کلاس، تاوەکو زاڕۊڵەکاما زوانی ئەڎایی وېشا فېرۍ کەرمۍ و بە فەرهەنگ و کولتووری هۆرامییانە پەروەردۍکریا.
جە دما بەشو مەراسیمەکەیچەنە بە گۊرانیواتەی و هۊڕپڕای مەراسیمەکە پیرۊز کریا.[1]