یاڎەوەریەکېم
بەشو ویس و یەکەمۍ
بێ سەروشۆن/ ڕدِگُم
دەمێن دلې کتېبێوەنە گوم بیەنا، وێچم نمەزانوو ئینانا چکۆ، چېش کەروونە و چېششم گەرەکەن! ئەجۊ کەوتەنانە سەفەرو دۆزەخو دانتەیکومێدی ئێلاهی. نمەزانو جە کام دێڕێ و لاپەڕێوەنە خولەم مەی و دەمەتەقێ کەروونە، کام کەلیمە و پیت واچەنە نانە وەرو و تەغزییە کەروو، جە کام پاژەنە تێر بوونە و مەست و حەیران گنوو ڕا و پیاسەکەروو! سەرەم سڕەن و هەنیچتەر تەژنەمەن و دەمم وشک بییەنوە، ڕام گومە کەرڎېنە و هەرمانېکتێرەکاو کتېبەکەی نمەشناسوونە؛ هەرچن ئاڼە ئاگام بۊنە دە کەڕەتێ و گېرە زیاتەر، شتەناش و یاواناشاوە. پاژبییەن دە کەڕەتێ وانانمەوە و دلېشنە مەلێم کەرڎېنە و حەیران بییەنا، وەشیی و تشیم چنە کەرڎېنێ و نامېم داینێ و درکنەینێ و زەردەخەنێوەیچم پەی ئاستێنېرە! بڕێ کاتیچ دڵتەنگیم تەقانەوە و گرەوانا.
داخم ئینە چېش بۊ؟! ویسەرەکەش چېشش گەرەکەن و چېش ماچۊنە؟! ماتریال و مەلاتش چېش بییەبۆ؟!ن ئاڼە دلې ڕۊحیشنە و دلې دڵیشنە گېڵانا و پیاسەم کەرڎەن و نان و ئاوش واردەنم و پاڵشنە ئاووچەرەم کەرڎەن! هیشتای نمەشناسووش و نمەزانو چېشش گەرەکەن، چېشش خولقنان!
دنیاو ئارۊی_کە ماچاش سەدەو 21ی و مودێرنیتەی_ڕەنگا چامنە بۊنە؛ بې سەروشۆن_گوم و گۆڕ-نە تەنیا دلې کەل و پەلی مەسرەفی و بې بنەماینە گوم بی و بې سەروشۆن شارودەگا و کووچە و کۊڵان و خیابانەکانە چەم خشنی و چەم وینی و گۊش بدەی و گۊش گیری و لەمس کەری، گەرما و سەردا چەشیی.دلې نام و نیشانانە، دلې قسانە، هەواڵێ بې سەروبنانە، غەفڵەت و ناهوشییاری کۊمەڵگاینە، تەماعوو تێرنەبییەی و خونخواهی و ون متەی و ون هورلووشتەی ڕامیاریمەدارا و ڕامیاریزەدەی بەشەری ئارۊینە تاویەیوە و سۆچیەی و گوم و گۆڕ بینە! نە نامې کەسیت ویروهۊش بۊنە و نە بزانی کەس و کارت کێن. وێچت؛ حاڵیت نەبۊنە دەردو نەوەشی و گرفتاریت چېشەن؟!
بورهان ئەختەر.[1]