یاڎەوەریەکېم
بەشو ویس و دوەمۍ
بێ سەروشۆن/ ڕدِگُم
تەوەنیی بییێنە نۊشدارو دەواودەرمانەو عومری هەزاران ساڵەی وەتەنی. هەرلایێوە ملی لاشێوە سەرکەش، ڕووش، تووش، کەمێوە فەقیرە بې قسێ، بې ئازارە کەوتێنە، لارە بییێنەوە و وتێنەرە... ڕاویارێ پاگەرە بلۊنە سکووتەنە و تەنیایینە گۊشگېرۆ پەی ورەوریش و پچەپچیش.کەس نمەزانۆ گیانش ئینا چەنە یام هەر بې قسێ و بې دەنگێنێ. لاوکەسېوە نمەدرکنۊش، نمەواچۊش. ئەر چی لتێوەیچش قرتنی و دالێوەیچش چنە پڕچنی! نمێ زوانشرە کە فڵان کەس ئامان فیسارە کەس پایەگارە لوان و بۊڵەبۆڵش ڕێوەڕا ئژنەویان، یام بەی زوانشەرە ئینەش واتەن و فیسارش کەرڎەن. تەوەنییوېش ڕۊحێوە زیڼەن-نۊشداروون. کاتێ کە میاچەمایش و لاشەیش وینی و تەماشاش کەرینە، ئەجۊ ڕەفێقێ ھەزاران ساڵېتەنە و جە تولو عومریتنە ھەزار کەڕەتێ دیێنەت و عال مشناسینەش.ماچی؛ دەکەڕەتێ چەنیش نیشتەنیرە و دەردەدڵێت کەرڎېنێ. تەندیسێوە زیڼەی هەزاران ساڵەن. فیلسووفێوە بې قسەن، پزیشکێوە حازق و ئاگاداروو دەروونی و ڕۊحیت. ئادەمیزاد وېش گرفتاروو شەھوەتی و لەممێ و چەما و غەرقوو ئوقیانوسو غەریبی و دوورەوەڵاتین و سەرگەردان و بې سەروشۆن! سەرەش کەرڎەنەنە خیاڵا و دەشت و دەریی بېتەوەن و بې ڕاویار و بېڕا و مەکان.
دەشتە وېش بیابانێوە تەنیانە؛ کەسی نمەدۊنۆنە و چەنی کەسی قسێ نمەکەرۊنە. لەوەڕێوە مشەممەر و خزێنێوە ڕەها. ئازادیێوە بې حەدوحەشر.
دونیا بییێنە بە دەشت و دەر- زرێبارە- لەجەن و لەبان؛ پېسە تازە باڵغێوە کە شەوڕۆنە لاشەش بۊ بە زەڕافێوە چن ساڵانە...ملی درێژ و قاچ و قولی نابار و بې قەوارە. ئیجا لەبان و زەل و نەیجە دەورووبەرو زرێبارێش گرتەبۊنە کەرڎېبۊنەش گەلکاوێ پیس و پۆخڵە، بوەوبەرامەش ئازارەت بدۆنە و دەم و لوتێت پەڕکەرۊنە و لیپاولیپ سەرڕېز کەرۊنە...ڕا گوم کەرۊنە...تەنیایی...جەهەڼەمێوە ئەسفەلەسافلینی.
بورهان ئەختەر.[1]