عومر کوڵ و کۆتان
ئی دنیێ پسە ئانەی مێ وەرو چەمیم گرڎما دلې پاسێنەبیمێ، ئەها هەرکامشا یاوۆ یاگې وېش وەزۊرەو جیامامازۆ! ئانەشا کوچێ عومرش چەویشاتەری زیاتەرا خەمش نەبۊ ئاڎیچ دماین مەوقیفنە ئشۆم وەزۊرە، سەفەرما مەوداش دورە نېیەنە، ئەر یوەیوەی حاڵیمابۆ کاتما کەمارێ گرڎما دلې ئی پاسینە وەزمېرە، ئیتر یاومێنە کە فێڵو تەڵەکە دروێو ناڕاسی واتەی، نەبەخشای یۊترینیو کرڎەۋەی بې سەمەر، ناحەقی و ستەمکەرڎەی، ئینێ گرڎ عەمر فۆتناینو پېچواردەو هەڵۆئاسا ژیواین. هەتا عومر بلۊ سەر جەسە نزیکبۊوە جە سەفەرکەرڎەی پەی قەبرێ تەنگێ، زمسان دەوار هور مڎۊنەو ئاخێ پەی جوانی وەریو داخێ پەی وەهاری، تەنیا گۆچانە مێ دەنگتۆ. با باوشی نەکەرمې دنیێرە پېسە شێتی، هەرپاسە کە (سەیدی) فەرماوۆ؛ ئەر کەسێ نەبۊ وێڵو دېوانە، وەبانی پلدا کێ کەرڎەن یانە. دەفتەرچەو نامەو کارو کەرڎەویما سەرمایەو سەفەرەکەیمانە، ئاخر سەفەرەن ڕاخەیڵێ دوورەن، مەنزڵ بې پایان تۊشە زەرورەن. با سەرو وێ بیمێ و بەخشمێ سەفەرما کوڵو کۆتانو عومر بې بەقان و نیشتەنۆ باڵێ.
ئەخیرەن،
پیربییەی و عومر لوای ناچارین، بەڵام گۆرەبییەی ئیختیارین.
گەنج دڵوەشا، چوونکەتی تەواناو وینای جوانیەکاش هەنە، هەرکەس تاوۆ جوانوینای وېش پارېزنۊ هەرگیز پیرنمەبۊ، هەرپاسە کە ساموێڵ ئۆلمان ماچۊ؛ گەنجی کات نییا دۊخێ دەرونین.
هەر خاسە خاسا.
فراوان عەفان دەرەمەڕی.[1]