یاڎەوەریەکېم
بەشو ویس و یەرۍ
سەلاران سەلاران بازاڕەوە گېڵانێوە. عەسرێوە بې کەلام و بەبې دەنگی پاییزی چپنێ گۊشێمەرە. جارووبار خیابانە تەسک و پەڕ جم وجۊڵەکەو هۆرامییەکا، بە دەنگو لالۊ تاهێر گاراجداری و بۊقە تاییبەتتییەکەو شێخ مەسعوودی چڵاکیێرە.پاساروو دووکانە یەک نهۆمییەکاو شاری لووکشا ئاستەبێرە و سێوەرشا وستوبێ ئەو میاچەماو خیابانی. سێوەرو درەختە شێڵانەکېو حەوشەکېما ڕەنگەش سەرشیێ بې. جریوەو مریچڵا سەروبنوو پاسارو درەختە شێڵانەکې، کوچەو کۊڵانش کەلامنە سڕ کەرڎەبێ. دام بەرەی و تاکو لاو کتېبەدەرسییەکام یانەی دلېڕاسەنە، نەمردانێوە. کتېبەکې دلې تاقەکەینە کە بە مێعماریێوە قەڎیمی ئاخرو ئۆخروو چلەکانە دلې دیوارینە هیشتای قسېش پەی کەرڎەی بېنې، هورچنیێبېنې.ڕەنگ و ڕۊشا نەشێویابێ. مەند و بېدەنگ دەمشا وشک بییەبێوە! کەس مەنزڵەکېنە نەپێویێ. ئەدام بې ئینەی بزانوو ئینا چکۆ و کام منزڵگانە نماش گیسنەینەنە، دەنگش دیوارەکەنە جمەش ئەی و ورەوروو دۆعا و سڵامیش گۊشام زرنگنېوە. کتېبخانەکەو تاتەیم تۊزێ گېرتەبێ، زوو-وە بې کەسی نەدۆنابێ و سەرەنەکەرڎەبێ پۊرە. هەرپاجۊرە مەنەبېوە و نەشێویابێ. مەگەر کۆلکەمەلایە کە گجارێ و ساڵې دەفعێ تاسەو دیداریش چڵاکیۆرە و سەرەکەرۊ یانەمارە.کەس سەوادوو ئانەیش نەبې کە کتېبەکا بەر کەرۊ و تۊزۆ گەردیشا گېرۆ. تابلۊیېوە نویسیا بە چن ئایەتێ هاڵۆچیابێرە دیواروو مەنزڵەکې. گجارێ بې ئێختیار بەبې ئانەی کە بزانی بەوېت، دەورش کەرېنێوە. پۆرترێوە عەکسی نە یەکجار کۊنە و قەدیمی_ڕەنگا 65 تاکو 70 ساڵانە- سەرو تاقەکەیوە بې ئانەی ئاوێزانوو دیواری کریۆ نریابێرە، هورم ئێزناوە سەرو وێ. چەمم چەققانە خشتە برێژیاکێ زەمینەو عەکسەکەی کە تارېخیش وانێوە و جوغرافیایش نیشانە دێ. نیگا نوورانییەکەش وېرەگا عەسرێوە پاییزی شێتین، گەرم و لەزەتی دەس نیشان کەرې. دیار بې شێخ میاچەماش غەریبیی بەردەبێوە و بې تاقەتتەر جە پاییزی ئەرمانێنە. ڕووبە خیابان تەماشاو ئاخروئۆخروو پاییزی و عومری وییەردەی کەرېنە. ئاڕوە ڕۊجیار چەمېش چەقنەیبېنېنە گەڵاڕېزانی. شێخ زاهێد ڕیش نوورانیېوە 75 ساڵانە. بە تەماموو تامەزرۆ و وەشەویسیوە، دیای دیێنە ئەو تەمام بییەی تەمەنیش. تەسبێحەکې گەرماو دەسە نەرم و نیاکەیش هورچنییەبێ و ئاسوودەگیېوە ڕۊحانیش ئاستەبێرە دەورووبەری.تەماشاش یاڎەوەریێوە قووڵ و بې بن ئارێوە بانجیڵەکە. وەرەتاو ڕەنگەش پەوە نەمەنێبێ. جەستەی ئاسمانیش تەلیلە کەرې و لیپاولیپ جە نما و ڕۊچێنە هەڵمیش هورزێ.
بورهان ئەختەر.[1]