بییەی نەتەوەیی کورڎی میانو فەلسەفە و سۆسیۆپۆلەتیکینە
هۊرئەوەگېڵنای و ئاماڎەکەرڎەی:
ئەسعەد ڕەشیدئەسعەد ڕەشید
بەشۍ ویس و یەرەمە
دلۍ کۊمەڵگا ئیسلامییە تەقلیدییەکانە، جیاتی ئامېری، ئاکار هەن و پېوەڼی ئا یەرە گروپەو کۊمەڵگای پیشەسازی بە ئامېرەکاوە، عەینو پېوەڼی یەرە گروپەکەو دلۍ کۊمەڵگای ئیسلامییەکان بە ئاکاریۆ. گروپی یەکەم دلۍ کۊمەڵگا ئیسلامییەکانە گروپو ئاکارخولقنەکان، ئینېچ ئا کەسا مەگېراوە کە جە سەردەمو محەمەدینە ئاکارێ تازە مەخولقنان کە وەڵ چاڎیشا بییەیش نەبییەن، ئانۍ خاوەنو زانای خولقنای ئا ئاکارا بېنۍ، ئا زانایەیچشان جبەرو وېشاوە وەرنەگېرتەبۍ، چوونکووم وەڵ چاڎییشا دلۍ ئا کۊمەڵگایا کە جبەرو ئاڎیشاوە بېنۍ ئاکارێ چا تەعرە بییەیش نەبییەن، تاکو ئاڎۍ جبەرو وېشاوە وەرشبگېران. ئانۍ بە تەنیا خولقنەرۍ کەلتوورێ ئاکاری نەبېنۍ، بەڵکوم شېوەگیرکەرو سازکەرۍ ئا ئاکارەیچە بېنۍ دلۍ هورستە و نیشتەی ڕوانەو وېشانە.
گروپەی دوەمە ئاکارسازەکېنۍ، ئانېچە ئا یاساسازکەرا ئاکاری بېنۍ کە یاسێکۍ ئاکاریشان بە تەقلیدکەرڎەیۆ یاساکانو ئا ئاکارەیە سازکەرېنې کە ئاکارخولقنەکۍ دلۍ ئاکارو ڕوانەو وېشانە وەرجەسەشان کەردېبېنۍ. ئی گروپە پېسە گرووپو ئامېرسازەکا ئانەی کە خولقنیان دلۍ پروسێوەرە مەبەرانش و شییای تەقلیڎکەرڎەیۆش چەنە وەشکەران و مەکەراش بە زیڼەوەرێ تەقلیدکریا. گروپەی یەرەمە یاساجابەجاکەرەکېنۍ، ئینېچە گرڎو ئا کەسا مەگېراوە کە ئا یاسایا جابەجا مەکەران کە یاساسازەکۍ بە تەقلیدکەرڎەیۆ یاساکانو ئا ئاکارە خولقیا سازشانکەردېنۍ کە ئاکارخولقنەکۍ جە ئاکارو وېشانە شېوەگیرشان کەردېبېنۍ. ئی گروپە بە عەینو شېوەو گروپەو یەرەمو کۊمەڵگا پیشەسازییەکا یەرۍ لاقۊرۍ جە سەرچەمەو زانایی ئا ئایاسا ئاکاریاوە دوورېنۍ کە زانای ئاکارخولقنەکۍ سەرچەمەش چەنەوەرگېران.
پەی پېڎابییەی کۊمەڵگا ئیسلامییەکا بە عەینو تەرزەو کۊمەڵگا پیشەسازییەکا، زانای ئاکارخولقنەکا مەگنۊ جبەرو ئا زانایەی کە کەلتوورو کۊمەڵگا ئیسلامییە تەقلیدیەکا سەرچەمەش چەنەوەگېرۊن. زانای یاساسازەکانیچ پېسە زانای ئامېرسازەکا کۊمەڵگا پیشەسازییەکا وەرو ئانەیە شییاو ئانەیش نییەن چەنە ببۊن بە زانایێ سەرتاپاگیر، نمەبۊن بە کەلتورو کۊ کۊمەڵگا ئیسلامییەکا. ئا زاناییەی کە دلۍ کومەڵگا ئیسلامییەکانە مەبۊن پا کەلتورە ئایینیەی کە مەشۊم پاڕەوی کریۊن و زانای جابەجاکەردی یاسا ئاکارییەکان نەک سازکەرڎەیشان، واتا ئا زانیارییەن کە مامۊسێکۍ دلۍ مەڵڵاکانە منیاش، مەڵڵێکېچ پېسە کەلتووری ئایینی وەڵاشمەکەراوە.
چېگۆ مەیاومۍ پا دەرئەنجامەی کە زانای جابەجاکەرڎەی یاسا ئاکارییەکانی پېسەنە ئا زاناییەی کە مامۊساکۍ دلۍ وانگا مۆدێرنەکا کۊمەڵگای پیشەسازینە پېسە کەلتووری نەتەوەیی دلۍ وانکارانە منیاش و ئاڎیچۍ پېسە جابەجاکارێ یاساکانو ئا کەلتوورەیە، یاساکۍ و زانای جابەجاکەرڎەیشان فېرۍ مەبان و دلۍ کۊمەڵگاکاشانە هەرمانەش سەرکەران.
جیاوازی میانو کولتورو کۊمەڵگا ئیسلامییە تەقلیدییەکانو سەردەمو خەلافەتەکا و کۊمەڵگا پیشەسازییەکا سەردەمو مۆدێرنەی، تەنیا ئانەن کە کەلتوورو کۊمەڵگا ئیسلامییەکا کەلتوورێ ئاکاریین و کەلتوورو کۊمەڵگا پیشەسازییەکا کەلتوورێ پیشەیین.
ئی دوە کەلتوورە چانەینە یۊی مشان کە بە عەینو سیستەم و میکانیزمی دلۍ خەڵکینە مەنریا و هەر تاکێ جە تاکەکانو کۊمەڵگای پانەیە مەبان بە ئەندامو دلۍ کۊمەڵگای، کە ئا کەلتوورەیە جبەرو وېشۆ بە تەرزێ سەلبی وەرگېرۊن و بەپاو سیستەم و یاساکاش بگنۊ پېوەڼی چەنی ئەندامەکانو تەرو دلۍ کۊمەڵگاکەی. ئا سیستەم و میکانیزمەیچ سیستەم و میکانیزمێ تازە نییەن و بە تەرزێ ناڕېکوزیا سەرەتاییتەرین کۊمەڵگا پەی نییای کەلتوورەکەو وېش و پروسەو بە ئەندامکەرڎەی تاکەکانی دلۍ کۊمەڵگاینە پاڕەوی مەکەرۊن.
ئینەیچە ئانەیە مەیاونۊن کۊمەڵگا پیشەسازییە مۆدێرنەکۍ چاگۆ مۆدێرنۍ نییەنۍ کە ئینێ دلۍ پروسەو ئاردەنەیێ یەکبینینە، تەنیا چاگۆ مۆدێرنېنۍ کە کەلتوورەکەشان کەلتوورێ ئاکاری نییەن و کەلتوورێوە پیشەیین، چوونکووم سیستەمەکەشان عەینو ئا سیستەمە تەقلیدییەینە کە دلۍ کۊمەڵگاکا تەرینە بییەیش بییەن.
بەشێ جە کتېبو بییەی نەتەوەیی کورڎی میانو فەلسەفە و سۆسیۆپۆلەتیکینە، نویستەی عیرفان مستەفا، هۊرئەوەگېڵنای پەی سەرو زوانی هۆرامی: ئەسعەد ڕەشید.
[1]