یەرە ششې و لاوانەزەرد
نوستەی: ئیبراهیم میکە عەلیئیبراهیم میکە عەلی
هامڕایا وەهارتا مەبارەک، موازوو وەهارو ئېساڵی وەهارو خەیر و بەرەکەتی و سەرفرازیی بوٛ پەی گرڎو ئانزانیەتی و پەی ئېمەی هۆرامیچ هەردوی دیمې وەڵاتیۆ و سەرانسەرو دنیاینە پاڵنەرێو بوٛ پەی ژووژنایۆ حەزو وېبییەی دلېمانە و لاکەرڎەیۆ لاو زوانی و فەرهەنگی نیمچە فەوتیایمارە تاکو فرەتەر بلمېوە وېمارە و کۊتایی بارمې پا حاڵەتە ناهەمواریە کە چېوەڵی و ئیسەیچ دەسشۆ ناڵنمې.
ئیجاریچە باسێوی فەرهەنگیم پەی ئامادې کەردېندې و مەوزووش خزمەتتا.
وەڵې گرچېوینە سپاسی گەرم پەی ئېژایا (عەفان دەرەمەڕی و هومایۆن ساحیب) ی کە هامکاریشا کەردا جە گلېرۆکەرڎەی وردەکاریا ئی بابەتینە.
یەرە ششې و لاوانەزەرد:
دلې کەشئەژناسی هۆرامانینە هەژدە ڕوې سەرەتاو وەرزو وەهاری، یانی یوەم ڕۊ مانگەو نەوروٛزیۆ تاکو ڕۊی هەژدەیەمش، پەنەشا وچیوٛ یەرە ششې (سێ شەش). چوون شوٛنەو یوٛیرە شش ڕوې وا، شش ڕوې واران، شش ڕوې وەرەتاو مێ.
دمای ئا هەژدە ڕوەیە یەرې ڕوې شوٛنەو یوٛیرە هۆرە گرمە و قرم و هوٛڕو ئاسمانی و واران و لېزمە و توٛفان چەنی سەردایێوە ڕاگوزەری مەیا، پا یەرە ڕوەو کۊتایچە وچیان: لاوانەزەرد.
قەدیمیا واتەن: ئەر ڕوێ لاوانەزەردی کەوتێ زمسان قاڕەکەر بڕې.
هەرپاسە ساڵانە کەسە خاس و ڕاساڵەکې لاڵیێنېوە ئەو خوڎای جە وەیەو لاوانەزەردی لاشابدوٛ.
بەکۊتایی ئامای لاوانەزەردیچ، سەردا و تەڕ و تووشیی ساڵې بەیەکجاری کۊتایش مێ و دمای چند ڕوێوی وەرز هەروەرەنە پا منیوٛ دلې مانگەو پاژەرەژی کە مانگەو دوەمەو وەهارینە و کەش و کۊ و دەشت و دەر گرڎ وەشبوٛ و ئاژەڵ و گەلە گنۊ جبەر.
سەرنجە: ئیسەتې کە بڕێ چی حسابا فاڕیێنې مەڵامەتەکەش ئانەن کە کەش و هەواو گرڎو دنیێ فاڕیان، نەک حساباتو قەدیمیاما هەڵە بییەبوٛ.
(1) زەواری: هەسەرەو سەرکارۋانو کارەوانی.
وېنەکەیچ نەوروٛزو ئېساڵین جە ئی لام.
هامدەردان ئامان ئەر مەندەن هوٛشم
سەدایێ وەش هەن مەیوٛ نە گوٛشم
چمان زېڵەی زەنگ زەواری مەیوٛ (1)
زرنگەی قافڵەکەی وەهاری مەیوٛ.[1]