وېش مەی
بەشو دوەمی
یەک حەفتە ویەرد و هەڵای هەواڵێوەم جە پەیمانی نەبې. تاقە شمارێ کە چەنەش بېم هەر ئا خەتە دما بڕیا بې کە داییمە کۊشنابېشوە.
ئاشنایی من و پەیمانی کتووپڕی بې، ڕوێوشا ئەڎام وەرمەنە چڵەکیارە و واتش: ڕۊڵە ماچی یۊ هەر دوە پا پڕان سەرو دڵیم. ئەوڵوە قسەکېش فرە پەیم گرینگە نەبې. واتم بۊنەو ئانەیوە پاسە مەکەرۊ کە من نەزیەورە. ئاخر من دما نیمەڕوانی نزیک بە سەعاتەو پەنجی لوێنا گېڵای و سەرېو دێنێ پارکەکەو لاو یانەیما. ئەڎام جە قساو خەڵکی تەرسێ، پاسە زانێ ئا ئامە و لوایمە بۊ بە هۆکاروو ئانەیە قسێ وزا شۊنیم. منیچ واچېنا ئەڎا گیان بازە با ئڼە قسێ کەرا تاکو تەقاوە.
خۆلاسە سەرەنجوو ئەڎایم دام دیانی وردە وردە ڕەنگەش پڕا. واتم بە خوڎا ئەڎام چېویەشەن. گۆرج پېچاموە و بەردەم پەی نەوەشخانەی. دلې ڕاینە هەر هۊش و هەواسم لاو کیفوو پووڵەکەیموە بې. ئاخر و ئۆخروو مانگێ بې و بې‌پووڵ کەوتێبێنمېرە خەمم بې بووسناش و پووڵما ڕەسایی نەکەرۊ. ئۆرژانسوو نەوەشخانەی فرە شلۆق بې، چەمېم گېڵنای تاکو سەڼەڵیە هاڵیم پېڎا کەرد و ئەڎام بەردە چا نیشنامەرە.
بەردەم لاو دوکتری و سەرەنجېوەش دا و ماچۊ ئێشەو مێمانەو ئېمەنە. حاڵم گیریا و لاشەم پېسەو یەخی چیاوە بی. عازا لاپەڕیه قاغەزش پەنە دانی تاکو گنوو شۊنی کاروو وسنایش.
وەرپەرسۊو بەشو وسناکەی فرمېوەش پەنە دانی تاکو پەڕش کەرووە. کرژ قاغەزێوە پووڵەکەیچش دا دەسموە. سەرەنجوو قاغەزەیم دا، دڵم کەوتەرە. واتم یا ئەڵڵا پەی یەک شەوی و ئی گرڎە پووڵه!؟؟
واقە بییێبېنې ملو قاغەزەکاو دەسیمەرە، واتم وەی یائەڵڵا من چېشم کەرڎەن؟! پەی چی ئەڎامم ئاوردێنە نەوشخانەی تاییبەتتی؟ تازە زانام چ شا شاکارێوەم کەرڎەن.
نویسەر: ئارەزوو_ئەمانی
هۆروەگېڵنای: گوڵزار شەریفی_بېساران.[1]