تەوەڼما
هۆرامی داییمە ساحیبو دین و ئایینی بییەن و سەر بە هەر دینێوی بییەبۆ، ئا دینشە پته و گېرتەن. کاتێ ئیسلام ئامانەنە هۆرامان، هۆرامی بە ئەشق و وەشەسیایی ئی دینشە قەبووڵ کەرڎەن و دەسوراتش ڕەعایەت کەرڎەن و داییمە نما و تاعەت درۊس بییەن. هۆرامی ئەر دەگانە بییەبۆ یا مڵکەنە و یا هەوارەنە، پەی وېش عێبادەتگایێوەش وەش کەرڎەن تاکو بە ئێخلاس ڕوە کەرۊنە خوڎااو وېش و عێبادەتش کەرۊ. ئی عێبادەتگا، تەۋەنېۋەی گەورێ و سافە بییێنە بە میزانێو کە ئېنسان بتاوۊ سەرشه و نما کەرۊ. ئی تەوەنېشە تراشتێنە و ڕوو بە قیبلە نیاینەشەرە. بە ئی تەوەنێ کە سەرشه و نما کریاینە، تەوەننماشا واتەن. ئیسەیچ ئاساروو تەوەننمایا جە هەوارەکانە و قراخوو هانەچەمەکانە و هەسارەکانە دلې مڵکەکاو هۆرامانیەنە مەنەن. ئیسەیچ ژەن و پیای پیر، هەنې کە سەرو ئی تەوەن نمایاوە نما بوانا. فره و یاگەکاو هۆرامانی بە تەواننمای، (تۆختان) ماچا. تۊختان یانېو تەوەنەی گەورێ و تەختە. ۋېیەرڎه و تەوەن نمای گېڵوه پەی وەڵێ ئێسلامی و زەمانێو کە عێبادەتوو خوڎاو ئاوێ کریان و بە ئامای ئێسلامی، ئی تەوەنمایێ هەر مەنێنێ و کاربوردوو وېشا پارێزنان.
ئیبراهیم شەمس.[1]
کوردیپێدیا جە دلېنەو ئی بابەتۍ ۋەرپەرس نېیەن، خاۋەنو/خاۋەنۊ بابەتەکۍ ۋەرپەرسیارەن. کوردیپێدیا بە مەبەسو ئەرشیڤکەرڎەی ئی بابەتېشە تۊمارە کەرڎېنە.
ئی بابەتۍ 693 جارۍ ۋینیێنە
پەیلۋاو وېت چە بارەو ئی بابەتۍ بنۋیسە!