پېخاموو ئەنجوومەنو فەرهەنگی و ئەدەبی ڕۊجیاری بۊنەو 2و سیاوکامی ڕۊجەهانی زوانی ئەڎایی
زوان بنەمان پەی گرڎوو قۆناغەکاو ژیوای
چا کاتەوە زوان پېسە ئەشناسەو خەڵک و نەتەوەیە دریا قەڵەم، تاکە ویر بەرزەکې گلێرگای هێمەتشا فاڕاوە پەی ماندگاری زوانو ئەڎایی و بڕیارشا دا بە پشتیوانی گەلی و خەڵکی ئی ئەرکە پیرۊزەیە یاونا بە مەخسەد.
یاگې شانازینە ئارۊ بۊنەو چەم و ویر کریاوەیی جە دنیانە چەمکو زوانی پېسە داغتەرین و وەرچەمتەرین ئێلمان ئەژمارە کریۆ و گەل و نەتەوە وېشا تەیار و ئاماڎە کەرڎەن چی بارەوە بە دڵ و گېیان هەزینە و مانیایی وزا سەرو شانەیشا، نازا هازەو زوانیشا کزە و لاوازە بۊ.
پەرمای بە وێ، قەڵاو پشتیوانی نەتەوەی وزەش جە ئا بانگەوازە زانستی و عێلمیە گېرتەن: زاڕۆڵە ئەر بە زوانو ئەڎایی وېش جە وانگانە وانە نەوانۆ، پەی هەمیشەی ڕۊح و زەینش کاڵ و سیس و ناپۆختە مەنۆوە. هەست بە کزی و لاوازی کەرۊ.
هەڵمەتۊ پائەرەگیرتەی و سەرەمڕەیی داواکاری گەلە ماف وریاکا جە باری زوانیەوە، پاڵپشتی زوان شناساشا کەرڎێنە نوونگە و عەلەمەو داخوازیشا ئانەن گرڎ تاکێ مافو ئېنسانی و مرۊیی وېشا بە زوانو ئەڎایی وېش وانگانە وانۆ، میدیاش بۊ و قسێ کەرۊ. ئینە سەرەتاییتەرین مافو و حەقوو ئېنسانەکان.
وەڵاتە وەڵکەوتەکانە گرفتو چند زوانیشا چارەسەر کەرڎەن و تاوانشا ئا تاپۆ و وەرپەنگا لابەرا. گرڎٚ کەس ئازادانە بە زوانی ئەڎایی وېش قسێ کەرۊ و... بېدەردیسەر بۊنەو ئەقڵیەتی کریاوەی و فەزاو دیموکراسینە، درېژە بە ژیوایش مدۆ.
یاگې داخێنە هێشتەر لاو ئېمە دەسبەرڎەی پەی قەڵاو زوانی ئەڎایی لاو ئەقڵیەت و ئاوەزی دوگمەوە بڤە دریۆ قەڵەم.
حەڼاو بانگەوازی و نویستەی و قسە کەرڎەی و پەرەدای بە زوانو هۆرامی و... وشەو ناڕیک و سەقەتوو ناوچەگەرایی و خێڵەکی و عەشیرە گەرایی زۆڵمێ ناڕېک و ناڕەوا پەیما تاشییان .
ئېمە پېسە کوردێ ڕاستەقینەی، کوردەسانی پېسە وېش وینمێ و باوەڕما پاسەن کوردەواری چند پازێڵێ ڕەنگاوڕەنگا و مشۊم ئی ئەمرەو واقێعیە لاماوە پەسەند و یاگې باوەڕی بۊ. ئی ڕەنگاڵەیە بە فرسەت زانمێ، بوەو هەڕەشا جە دماخیما دوور وزمېوە. گۆزار جە دەورانوو نەریتی و قەبوڵوو ئاۋەزیەتی سەردەمی خاڵێ ئەرینێ و پۆزیتیڤە لەیکدەیمێوە.
ئەنجوومەنو ڕۊجیاری پېسە مەکۆیە فەرهەنگی هۆرامانی ئەوپەڕوو سەحیە و تەلاش کەرۊ پەی ترۆقی و گەشەدای بە فەرهەنگ و ئەدەبېیاتو هۆرامانی. هیچ کات حەز و باوەڕما بە جیاوازی و پەرتەوازی و قڵیشییای زوانی و نەتەوەی، وەش کەرڎەی گولانەتەرین ئاژاوێ و هەزینەدای چی ڕاسەوە نیا.
بەرەو گوفتمان و باسی بە کریاوەیی مازمێوە و باوەڕمەندێنمی دیالۆگ بەرزتەرین و سادەتەرین ڕاو پێوەرەیی، شێوەو ئەندێشەی و ویرین.
فەخر و شانازین تاومېچی وەزعە گێچەڵاویەنە ئەرکوو پارېزنای و پەرەدای بە کولتوور و فەرهەنگوو هۆرامانی بەرمێ ڕاوە.
گەشاوە و بەرز بۊ ئاڵاو لایەنگیری جە زوانو ئەڎایی.
ئەنجوومەنو فەرهەنگی و ئەدەبی ڕۊجیاری.[1]