بەشێ جە ڕۊمانەو: قووڵ پېسەو غەریبی کاڵێ
سەدام حسەین هەڵەبجەش کیمیا واران کەرڎە بې و تەپڵوو زڵمی دنیانە دەنگێ دېوە. نەو وەهارش پڕووزنا و شارەیوەش بە گرڎو ڕەونەقیشەو و بە گۆرەیی هەماللەو ژیوایشەو متنە بېدەنگیو زیارەت تەڵانا. ئانە تاوابېش بەر شیە بې و ئانە نەتاوابېش بییەبێ فەرشوو کووجیە و کۊڵانی. کام وێنەگیر، کام نەقاش، کام شاعێر یا کام نویسەر تاوۆ بارەسایی مەزڵوومی هەڵەبجەی دلې قتوولێ هۆنەروو وېشنە ڕا کەرۊوە؟ تەقە تەقوو تەختەکڕێڵەکەیم بارەگاو موقەدەسو هەڵەبجەینە ڕەنگا کەڕ و لاڵەی بۊ هەمامەو مووسیقاینە. مەزانوو!
ارغوان!
این چە ڕازیست کە هر بار بهار
با عزای دل ما می ئاید؟؟
کناچەکېش نیمە گیانە بې و نەتەمامیەی بې. دلې کۊڵانانە و بە لاقۆرێ سەرو جەنازانە ویەرێنێ، ئەجې قیامەتا، ئانە زیڼە بې تەنیا تاوێ ڕەممۆ و کەس کەسی نەژناسێ، کەریم و دوە کوڕەکەش وەڵێشنە بېنې و وێچش تڼ باوشیش کەرڎېبێ گۆڕاڵەیرە و ڕەمێ شۊنیشارە، نۆکوو پایش هۆرکەوت و هەر دوە زرەپیەی زەمینرە، کەریم دیاوە لا و چن هەنگامې ئاما دمارا، هۊرش ئێزنەیوە و گۆڕاڵەش داوە باوشی و فامناش پەنەش مشۊم تاکو تاوا ڕەمما، گۆڕاڵە هەناسەش تەنگ و تەنگتەر بېوە و قۆزێ، مەنیجێ چن کەڕەتێ چڕیش بە کەریمی و واتش گۆڕاڵە پەکەشەنە، کەریم زانێ مەتاۋۊ هەرمانېو کەرۊ دەسو کوڕەکاش وەر نەدێ و ڕەمایوە نەمدرێوە و قێڕنێ ڕەممە مەنیجێ ڕەممە.
سەرو ملەگایێوە مەنیجێ مدرا، کوچێ دیا دمارا مەرگ بە هەراز سەرېوە نیشتە بې ملو شارەکەیرە، دیاوە پەی گۆراڵەی، چەمېش خجڵ بې قووجیا و نیمە گیانە بییێبێ، نیاشرە زەمین و کوچېو شۆکناشنا یۆ: گۆراڵە، گۆراڵە، چەمۍ کەرۊ ڕۊڵە...گۆراڵە.
گۆراڵە مشتەش کەرڎېبێ سۆرانیەکەو ئەڎایشرە و تڼ گېرتەبېش.
کەریم چن هەنگامې ئاما دمارا؛
-مەنیجی هۊرزە مشۊم بلمێ.
-ئەی کناچەکېم؟
-مەتاومېش بەرمێ. بازەش جیاتی، هۊرزە...ئېمەیچ مرمێ.
ئانە زیڼە بې ڕەمای ڕەمێ و گیانش دابېش چېرو کەشیش.
-هۊرزە مەنیجێ، گرڎما مرمێ، هۊرزە بلمێ....بازەش جیاتی.
مەنیجی هۆرئێستەو، هەنگامەیش هۆرگېرتە، سۆرانیەکەش کېشییا، گۆراڵەی مشتە کەرڎە بې پۊرە و وەرش نەڎێ! یەرێ ساڵېش بې، هەڵەبجەنە بییێبېشا. کەریم نەما بې دەسو دوە کوڕەکەیش و کەمەی وەڵتەرەو هاوارێ کەرې:مەنیجێ بڕەمە، مەتاومې بەرمێش، نیمەگیانەنە مەنیجێچ سۆرانیەکەش کە هیچ ڕەحموو ئەڎایی بییەبێ پسماری و کوەیبېش زەمینرە. چەمەیش کەریمیوە و کوڕەکاشەو بې و چەمەیش مشتەکې گۆراڵەی و دیڎەی نیمە قووجیاشەو. لایێوە هاوارێ کەریمی بېنې و لایێوە نکەنکوو گۆراڵەی و لایێوە دەنگێوە مەلوول گیانوو ڕەحمی ئەڎایی. چېش تاوۆ کەرۊ؟ چېش؟ کاتەی کاردەو مەرگی ئینا ملو گرڎینە و مشۊم بلۊ، بلۊ... ناچارەنە... پەی ساتەی کەڕە بییە. هیچ نەژنەوێ...جگەم دەنگو ئەڎا ئەڎاو گۆراڵەی، کاتەی خوێ و پڕێنە باوشیش، بە چەمۍ زانێ کەریم ڕەمۆ و دەسێ شانۆ و چڕۊش...دیاوە پەی جەرگەکېش دوې هەرسی چەمېشنە پڕەیرە و بە بەرزی مێهروو ئەڎای قاوەی بەرزش کەرد و سۆرانیەکەش کېشت تاکو مشتەو گۆراڵەینە وەر بې و لوا.... سارای بې تاکو دوورێ بیېوە دیاوە دما و وینێ گۆراڵە مد٘یۆ شۊنیشارە.
ئێشوو ئا چن سەعاتەی دڼە دڼە لاشە و ڕەوانوو مەنیجێش شی کەرڎەو.پەی کەریمیچ مەرگەی بې بەڵام...نا، ئەڎا وەرگە مەگېرۆ! ویرێ و خیاڵې شێتەش کەرا!
کاڵێ تووڕێ بییە وەنەو زاڕۆڵەکا و دوورێ کۆتېوە، مەنیجێ پەرداخەی ڕۊحین دەسەیشەو و چراوە دەسیەی دەسەی تەرشەو مدرەیبێرە و دیێ، زەرڎەخوەیش کەرد. تاڵ...وشک...خەمبار...مازی مەڕیا...مەزانوو! خوێوە کە تەنیا ژەنەی مەینەت دیێ و ورڎە تاوێ هۊرش گېڵنۆوە سەرو زوانو کەلیما. خوێوە کە هاوار، ناڵە و ڕۊ ڕۊ دەسو گەردوونیوە نەیاوێنێ دەمقاچەو پایش! داخۆ گەردوون. فەڵەک...دنیا.. یا هەر چی شمە ماچدېش کاتەی چەمۍ بڕۊنە زەرڎەخوەکاش خەجاڵەتیێنە چەنی نەبۊ دڵۆپەی ئاوی و نەتکۊرە؟ کاڵێ وەراوەرشەو، بە گلکەو خیاڵی مەینەت نامەیش پەلێ دېوە....یاوا پەلو گۆراڵەی، هەڵەبجەی...کیمیای...یانە وېرانی، نا...ڕەحموو ئەڎای! ئاستەی جیاتی...و ئا نێگایێ مەنیجێ لکەشا واردێ بې چەمەکاو گۆراڵەیوە و کېشییای.. کېشییای تاکو پڕچیای و مەنیجێشا کېشتە زەمینرە. پاسە کای نەتاواش هۆربېزۆوە....ساڵیادش نزیک بې و مەنیجێ وەهارێنە فرەتەر شېویێ. پەرداخەی و چراوە دەسیەی گېرێ و شێتانە گنێ کۊڵاناو دنیای. داخۆم چی پەرداخ و چراوە دەسیێ؟ تۊ واچی ئاوی یاونۆ لچە وشکەکاو گۆراڵەی؟ یا ئاویروو هەڵەبجەی کوشنۆوە؟ ڕەنگایچ ئاویروو دڵیش....تۆ واچی دنیا تاریکەنە و پی چراوێ ڕا یۆزۆوە، یا گۆراڵەی؟ مەزانۇو!
ژوان.[1]