وېش مەی
بەشو چواری
یاوانۍ نەوەشخانە ڕاسە لوانی پەی لاو وەرپەرسو سنۆقی. یۊتەر ئاما بې یاگې وەڵینەکەی. کلکەوانەکەم دلې وڵەو شیشەکەیرە کۊشش دا وسم ئۆ دیم. ئەوەڵ نەزاناش، کاتێ سەرەنجش دا واقە بییێبېنېوە واتش: ئینە ئێتر چېشەن؟
واتم: پووڵم پەی جۊر نەبی با ئانە لاتاوە بۊ تاکو پووڵم دەس گنۊ ئیسە با ئەڎایم بوسنوو. واتش: نمەکریۊ، کلکەوانەکەش کۊشش داوە ڕوو بە من. منیچ دیسان وسموە پەیش، تووڕێ بېنا، تن قێڕنام ملشەرە. واتم: ئاغە گیان من ئیسە پووڵم نیەن بڎەوتا ماچی چېش کەروو؟
خاس دەی ئی کلکوانە گرۆتانە بۊ تاکو پووڵ گنۊ دەسم. ئا مۆرێ کوە ملو ئا قاغەزیرە تاکو ئەڎایم بووسنا. ئاڎیچ تن خۆڕا ملمەرە و واتش: نمەکریۊ خانم، نمەکریۊ..
دمایی ئارام و سەرو وێ واتش: بەرە ورەشەش و پووڵەکەش بارە پەیما.
بە تووڕەییوە واتم: سەرەنجېو سەعاتەکېت بڎە بزانە کام تڵاورەشی ئیسە وازەن؟
هیچش نەوات و دیسان وېش سەرقاڵ کەردوە. دەنگم کز کەرد و واتم: براکەم من سەوا پووڵتا پەی ماروو، بەڵام تۊ خوڎا ئیسە ئا قاغەزمە پەی مۊرە کەرە با ئەڎایم بووسنوو. بە دنگێو چیا و تن قێڕناش ملمەرە و واتش: خانم ئەسڵەن نمەکریۊ، تۊ پەی چێ حاڵیت نمەو؟ ماچوو پەی من مەسوولیەتش هەن. تەرسانۍ هەنگامیە وېم کېشا دماوە. دڵم پەڕ بییەبێ واتم ئیسە من هەڕەو کۆگەی گېروە پەی سەرەو وېم خوڎا هاوار؟
تا ئا ئڼازە دەور و بەریێم پەنەم بزانا دەنگم بەرز کەرڎەبێ. گرڎ تەماشام کەرېنێ. چەمېم پەڕێ بییێ هەرسی، هەرسی پەنگشا واردەبێوە دلې چەمامنە و خاس نەتاوێنێ بوینوو کێن پاڵمەنە. کتووپڕ دەنگو یۆوی کەوت گۊشم کە چەنی کابرای قسێ کەرې. پەنەش واتش، خەرجوو نەوەشینوو ئا خانمە هەر چن هەن وزەش پاو من. کاتېوو چەمېم سەڕیێ و دیانی دەنگو ئا کوڕە جوانەنیە کە ئارۊ داما یۊترینیرە، بەڵام ئاڎ ئەسڵەن تەماشام نەکەرې. گەرەکم بې پەنەش واچوو لازم نمەکەرۊ تۊ حەساوش کەری. قسێم وسە گەڵوەم و بە وېم واتم سەهەر تەمەنا مەکەروو فەقەت ئێمشەو وېت لاڵ کەرە. واقوە بییێبېنې ملو هەر دوەیرە، کاتېوو قاغەزە مۆر کریاکەم دی عازا ڕەمانی ڕوو بە ئۆرژانسی. تەنانەت دەس وەشیچم نەکەرد. هەرمانە و باروو وسنای ئەڎایم تەمام بی، دوکتەرەکەش واتش نێگرانە نەبی. دمایی ئەڎام سەرو تەختەکەیشوە وەرمش پۊرە کەوت. بە وېم واتم: یاخوڎا بمری سەهەر تەنانەت نەتاوات دەس وەشیە کەری. گېڵانی شۊنیشەرە تاکو بەشکوم پېڎاش کەروو. دلې ساڵۆنەکېنە نەبې، گرڎ یاگېو گېڵانی هەر نەبی. لوانی بەر دلې حەوشەکې، چ دیم قەراخێوەنە مات و مەلوول نیشتەنەرە و دلې حاڵوو وېشەنە نۆقم بییەن.
نویسەر: ئارەزوو ئەمانی
هۆروەگېڵنای: گوڵزار شەریفی_بېساران.[1]